由上咗高中之後,媽媽就成日提住「努力讀書呀!」、「就考DSE啦!」、「考大學啦!」呢啲說話

「唉⋯以前都話有哥哥擋一擋⋯宜家哥哥上咗大學⋯戰火集中晒喺我度⋯」邱茗然望住盤中嘅生果扁起嘴,「唔係唔可以講,只係我唔想番到屋企都聽住DSE、DSE⋯真係冇壓力都搞到有壓力⋯」

邱茗然帶着少少嘅心靈疲倦伸手拎起提子放到口中,慢慢地咀嚼,然後又細聲地嘆一口氣,拎起手機睇,想好好休息一陣,聽日先再開始繼續努力去溫書

「唉⋯」邱茗然嘆一口氣後拎住手機,拎住兩、三粒提子行入睡房,趴喺床上睇一陣YouTube,「睇下有咩好睇先~」







另一邊廂,殷書賢食完飯就起身朝自己嘅睡房行去,一秒都唔想多留喺廳

「書⋯」「咔。」

殷媽媽見到殷書賢行入房嘅身影,想叫住殷書賢,但名字都未講到出口,殷書賢就已經將房門閂上

殷書賢灘喺床上,今日嘅佢先稍微休息一下,想唔溫書住,想頹廢一日,聽日嘅佢會真係努力溫書做功課

「呃⋯問下佢地打唔打機先。」殷書賢坐起身到書枱前坐低,打開Discord就問佢班friend一唔一齊打陣機





喺朋友們都答應後,殷書賢當然即刻開game;謝澤謙佢地個個都係讀得書嘅人,有時一齊打下機都冇咩所謂,溫書時認真努力,確保成績唔會跌就可以

「叩叩。」喺隻game仲load緊嘅時候,殷媽媽敲兩下門,然後就將房門打開

「唉⋯」殷書賢喺心裏嘆一口氣,佢默默地將耳機除落嚟回頭望向殷媽媽

「一食完飯就打機啦?今日溫咗書未呀?淨係打咗機呀?」殷媽媽望到load緊嘅game就問道,完全唔打算聽殷書賢解釋一樣,「你唔好淨係掛住打機,今個學期唔好再好似上個學期咁又跌落第二,唔好令媽媽失望呀!」

殷書賢都未嚟得切回答,殷媽媽就已經閂房門行出去;殷書賢無言地望住被閂上嘅房門,一時之間佢都唔知可以講啲咩,但想好好打場機嘅心情卻被影響咗





「我都只係啱啱開隻game出嚟⋯」殷書賢細聲地望住房門講出遲嚟嘅解釋

殷書賢默默地再次戴上耳機,宜家佢只想好好咁打場機再算,喺真正嘅努力前,想再好好咁打陣機



「快啲睇新嗰集!超好睇超甜!」張萱淇send咗個message比邱茗然,附上兩張cap嘅圖

「咚咚。」手機一陣,彈出一個WhatsApp通知,張萱淇㩒開message,係李雨揚send嘢比佢:「你今日冇嚟補習?」

「冇呀,我今日唔補,聽日先」張萱淇回覆道

「好啦,仲以為你今日會嚟補習添」李雨揚回覆道,張萱淇見到李雨揚嘅回覆不禁一笑

「聽日去,聽日去!」張萱淇回覆道,灘低喺床睇劇





「淇淇,洗咗生果呀,你拎嚟食啦。」張媽媽企喺房門口探頭入去望一望張萱淇,「喺枱面。」

「Okay~」張萱淇一下子坐起身行出去拎生果食,「唔該媽咪~」

「你今日冇去補習呀?」張媽媽問道

「冇呀,聽日先去。」張萱淇拎住雪梨企喺房門口同媽媽對望,「我唔係日日要補㗎,聽日先要。」

「哦好呀,你自己安排時間啦。」張媽媽點一點頭,拎起電視遙控,「你上次話你想考咩科?」

「我仲諗緊讀唔讀語言學⋯」張萱淇有啲猶疑,佢自己都未決定好係唔係真係讀語言學,「雖然最後應該都會揀語言學就係⋯」

「你中意啦,讀到嘅科係你想讀有興趣咪得。」張媽媽一臉隨和,對佢嚟講張萱淇最後讀咩科都唔緊要,最緊要係張萱淇想讀嗰一科





「Okay~」張萱淇笑一笑,然後行番入房閂埋門又繼續煲劇



殷書賢托着額耷低頭望住書本同雞精筆記,心中默念緊佢要背嘅內容,雖然今次嘅統測佢已經係成績最好嘅一個,同成績第二位嘅同學都已經相差咗一段距離,但佢都冇打算因為咁而鬆懈

「下次一定唔可以再有careless mistake⋯」殷書賢堅定咁提醒自己,「低分咗就死得⋯」

打開咗嘅卷中,其中一題4分題用紅筆圈咗錯住,本來應該係一個剔卻多咗一點,上堂對答案嘅時候,殷書賢發現自己寫漏嘢

殷書賢將漏咗嘅答案寫番喺筆記同書入面,免得自己下次又錯同一樣嘢

「佢嚟親都係坐喺牆邊嗰個位⋯」邱茗然今日都見到殷書賢喺度,殷書賢依舊坐喺牆邊嘅位置安靜溫書

每次見到殷書賢,佢一係耷低頭做緊功課,一係就埋頭苦幹咁溫緊書,邱茗然都有啲懷疑,殷書賢嘅人生入面係唔係只有溫書





今日邱茗然同琴日一樣去咗圖書館溫書,只係今日嘅佢冇功課做,琴日嘅佢好努力咁將功課都做晒

一直去到5點幾嘅時候,邱茗然坐好伸個懶腰

「佢幾時走咗㗎⋯?」邱茗然自然地朝住牆邊嘅座位望去,卻位置已經空空的,「咁神不知鬼不覺嘅⋯?」

邱茗然望多一眼時間,執好嘢孭起書包離開圖書館,但佢唔係落樓梯而係上樓梯,行到上天台嘅鐵閘前,雙手推開鐵門邁步行出天台

「佢喺度⋯」邱茗然望到企喺矮牆前嘅殷書賢,「仲以為佢走咗添⋯」

今日啱啱好有微風,殷書賢企喺矮牆前,著住長袖冷衫嘅佢罕有地將衫袖推起露出成個前臂,將手搭喺矮牆上托住下巴,從背面睇嚟就好似發緊呆一樣

「我仲未諗好Jupas Band A點擺⋯揀醫科喺A1⋯?」殷書賢思考緊關於下個月就要交嘅Jupas選科,「咁A2擺咩好⋯」








IG Link: https://www.instagram.com/nd_cotttoncandy/?hl=zh-tw