【校園】想成為您的治癒: 20. 偶遇
去到放飯嘅時候，幫手嘅工作人員都番到自己班食飯，邱茗然比張萱淇先一步番到班嘅看台
「淇淇未番嚟呀⋯？」邱茗然企喺位前左望右望，睇下張萱淇人在何方，「咁我幫佢攞咗飯先啦～」
邱茗然將張萱淇嘅飯放喺櫈上，食飯嘅時候可以用手機，所以邱茗然喺等張萱淇同食飯期間就坐喺位睇手機休息下
「茗然你幫我攞咗飯啦？唔該晒～」張萱淇拖住疲倦嘅步伐行到邱茗然嘅身旁拎起飯坐低，「我都餓死啦！」
「咁快啲食飯啦！」邱茗然幫張萱淇拆開即棄餐具嘅透明膠袋，「幫你拆咗餐具啦～」
「唔該～」張萱淇心甜地笑，「有你真係好呀～」
「咁要我得啦～將來唔洗搵男朋友啦～」邱茗然同意地點頭附和張萱淇
兩人食飯嘅時候分享下啱啱比賽發生嘅事，都算係休息嘅一種，報咗名做工作人員都好過全日坐喺看台唔知做咩好
「陣間又要番去幫手⋯」張萱淇反一下白眼，「茗然陣間陪我買枝嘢飲呀～」
「好呀～冇問題！」邱茗然比咗個okay手勢
兩人食完飯就離開看台，掉飯盒後就趁住中六最後一個sports day去同其他人影下相留念
畢竟都中六啦，中學生涯中最後一個陸運會，唔少中六生、高中生都會拎住即影即有同手機同其他同學朋友影相
「淇淇你係唔係要去買嘢飲？」邱茗然睇一睇時間問道，「Lunchtime就嚟完。」
「呀係呀！我地去買咗嘢飲先啦～」張萱淇點點頭，然後就拉住邱茗然一齊去小食部一轉買嘢飲
啱啱先買完嘢飲，運動場內嘅廣播就響起：「請負責400、800米賽跑計時同記錄嘅工作人員宜家到召集處。」
「哎呀⋯」張萱淇企喺原地聽到廣播，瞬間就想喊出嚟，「洗唔洗咁快就召集呀～」
「好啦好啦～」邱茗然笑着安慰張萱淇，「你快啲去啦～我去廁所先啦，唔陪你過去。」
「好啦～咁部即影即有陣間幫我擺番去啦～」張萱淇無奈地講道，然後笑着揮一揮手就同邱茗然分開
邱茗然獨自一個去個洗手間，出嚟準備番去看台幫張萱淇擺好啲嘢之後再去另一個地方做工作人員幫手
「咦？嗰個咪殷書賢？佢企喺嗰度做咩？」邱茗然咁啱眼利留意到殷書賢企喺離佢一段距離嘅位置，企喺瓦遮頭下睇手機
其實都好難認唔到嗰個人個殷書賢，因為只有殷書賢會喺陸運會著住長袖冷衫周圍走
「嗨～」邱茗然走近殷書賢主動對佢打招呼
「嗨。」殷書賢抬頭見到邱茗然，禮貌地微微點頭
邱茗然行到瓦遮頭下嘅陰涼處，企喺殷書賢嘅旁邊，兩人相隔咗1.5個人嘅距離
「今日你都著住冷衫呀？」邱茗然微微一笑好奇地問，「你唔怕中暑呀？」
「唔怕，我有飲水。」殷書賢將冷衫除落嚟疊喺左手嘅前臂上
「哦。」邱茗然笑一笑後淡然咁哦咗一聲，目光朝殷書賢嘅手望一眼後開玩笑道：「今日冇帶住鎅刀喺身啦掛～」
殷書賢望住邱茗然一直暗暗偷笑，殷書賢沒好氣咁輕輕一笑，佢都唔知邱茗然笑咩，可能係笑佢，又可能唔係
或者因為邱茗然自帶嘅陽光笑容，令佢呢種冇咩好大感情起伏嘅人都會跟住一齊笑
邱茗然稍微低頭，偶然地見到殷書賢嘅前臂上又多咗明顯係新嘅傷痕
「有冇睇到？」邱茗然忽然記起自己貼喺殷書賢嘅水樽樽底嘅memo紙，「張紙。」
「有，多謝。」殷書賢禮貌地多謝邱茗然嘅生日祝福
邱茗然偶然稍微將手一提，發現自己手上仲掛住張萱淇嘅即影即有相機
「影唔影相？最後一個sports day⋯」邱茗然有啲猶疑，但最後都係開口問殷書賢
「哦好呀。」殷書賢微微點頭，佢又唔太抗拒，因為已經有好多識嘅人搵佢影咗相
邱茗然拎出手機打開相機嘅前置鏡頭，喺影相前用手機殼上嘅鏡面稍微整理一下儀容
「你整親？」殷書賢不經意瞄到邱茗然嘅手心貼咗紗布，兩邊膝頭都紅咗一片，殷書賢小幅度咁抬一抬下巴示意，「手。」
「哦係呀～啱啱跑100米去到終點嗰陣跌親，手落地然後就擦到啦～」邱茗然提起雙手望住自己嘅手心，左手手心只係泛起紅紅嘅一片，但因為右手係慣用手，所以右手先落地就擦傷咗，「洗傷口嘅時候都痛死啦！」
「Okay啦，忍一忍就唔痛。」殷書賢淡然地聳聳肩，對佢嚟講只係輕描淡寫一樣嘅痛，完全唔叫痛
「咩忍一忍呀？痛死啦！你唔去跌下洗下傷口？」邱茗然不滿地道，對佢嚟講先唔係「忍一忍」就可以唔痛嘅地步，係嗰種餘痛嘅痛令佢痛
「我都唔怕痛。」殷書賢講道
「我知，睇得出。」邱茗然望一望殷書賢嘅左前臂，然後抬起頭以自信嘅語氣回答，「影相先～」
殷書賢雙腳曲起微蹲，上身向前彎下腰遷就邱茗然；邱茗然調整角度，邱茗然提手喺臉頰前可愛咁比個Yeah，殷書賢雙手㩒住膝頭，臉上掛上淡淡嘅笑容
「喂喂。」行緊去小食部嘅趙遠寧離遠就見到殷書賢企喺瓦遮頭下，但目光一移就見到佢身旁企住一個女仔，提起手肘就撞佢隔離嘅謝澤謙
「咩呀？」謝澤謙循住趙遠寧嘅視線望去，張思群亦望下發生咩事
「嗰個係咪殷書賢呀？」張思群震驚地同另外兩人企喺原地偷偷觀察，「佢隔離嗰個女仔係邊個呀？隔離班㗎？」
「佢居然唔係同筆記一齊係同女仔一齊呀？」趙遠寧訝異地對兩人細聲講道，「真係殷書賢呀？真係呀？」
「喂！殷書賢！」謝澤謙喺冇知會另外兩個偷偷觀察緊嘅人嘅情況下對殷書賢大嗌
IG Link: https://www.instagram.com/nd_cotttoncandy/?hl=zh-tw