【校園】想成為您的治癒: 21. 口頭承諾
殷書賢同邱茗然頓時嚇咗一跳，兩人一臉困惑未回神嘅表情同時向謝澤謙佢地三人嘅方向望
「佢地嚟搵你？咁我番去先啦～」邱茗然講道，然後就轉身走，「張相⋯我之後send番比你啦～」
「嚇邊個？」殷書賢邊走向謝澤謙三人邊將拎喺手上嘅冷衫著番上身
「做咩即刻著衫咁驚呀？」趙遠寧即刻行到殷書賢嘅面前，「個女仔好似係隔離班㗎喎～幾時對女仔有興趣㗎？點識㗎？」
「等我嚟檢查下我地嘅學霸有冇受傷啦。」謝澤謙認真地講道，然後行到無奈嘅殷書賢面前將佢嘅衫領拉開
「咩事呀？」殷書賢無語地輕皺起眉頭，拉番好自己嘅衫領
「我地擔心你呀，你係唔係病咗呀？」張思群問道，「你居然同女仔一齊呀！單獨一齊仲要係！」
「世上唔係男就女㗎啦。」殷書賢無奈地回答，佢啲朋友過分擔心佢真係
「幾時識㗎？咩關係先？朋友？」謝澤謙好奇地問，佢最熟呢個只係對讀書同成績上心嘅殷書賢
「同學嘅關係，冇你地諗嗰啲關係。」殷書賢默默地加快腳步，佢真係怕咗佢地嘅好奇心同想像力
⋯
陸運會嘅第一日就此完結，個個都攰到骨頭散晒一樣
「哎⋯我番去就沖涼瞓晏覺⋯」邱茗然肯定地對張萱淇講道，但張萱淇似乎冇聽到佢講嘅嘢，「淇淇，你有冇聽我講嘢㗎⋯」
「嗯有呀～」張萱淇抬頭望咗邱茗然一眼後又耷低頭
「你唔好掛住覆人啦⋯！」邱茗然瞄咗張萱淇嘅手機螢幕一眼後頓時擺出不滿嘅表情
「咩呀～我有聽你講嘢㗎～」張萱淇比邱茗然睇到後連忙笑起嚟，「冇掛住覆機㗎～」
「哦係咩⋯」邱茗然忍唔住反一下白眼，「唔太信囉⋯」
「你話番去沖完涼瞓陣嘛～」張萱淇重複一次邱茗然啱啱講嘅嘢
「叻啦叻啦！」邱茗然輕哼一聲，「你陣間去邊呀？約咗人地食嘢呀？」
「係呀！」張萱淇見邱茗然都睇到唯有直接承認，臉上嘅笑容收都收唔埋，「不過其實我都想番屋企瞓陣⋯」
「甩佢底囉～」邱茗然講道，同時將啲相drop番比張萱淇
「咁樣太衰，做唔出。」張萱淇搖搖頭，其實佢嘅內心都係想應約，因為要真係約到李雨揚實在太難
張萱淇番屋企沖咗個涼換咗套衫先再出去，約人食飯著住件有汗臭味嘅PE衫始終唔太好
「好少可你會咁早到喎～」張萱淇行入餐廳見到李雨揚已經攞咗位，行到埋去嘅時候不忘窒佢兩句
「啱啱約咗人，早咗完咪早啲過嚟囉～」李雨揚將自己睇緊嘅餐牌放到張萱淇嘅面前，「睇下食咩。」
「哦⋯」張萱淇本來仲因為李雨揚早到同微微嘅細心而高興咗一秒，但宜家心入面又忍唔住唔高興：「肯定又約咗女仔啦⋯都唔知佢喺邊度識咁多女番嚟⋯」
「食咩呀？」李雨揚邊覆message邊問張萱淇，「諗好就叫啦。」
「哦⋯」張萱淇一副提唔起勁嘅樣，淡然地哦一聲
食飯嘅時候張萱淇都冇咩點講嘢，李雨揚同張萱淇講兩句又拎起手機覆兩句
「做咩唔講嘢呀今日？你平時冇咁靜㗎～」李雨揚察覺到又唔係完全察覺到問題所在，佢嘅提問令張萱淇有啲嬲
「你唔係嚟同手機食飯㗎咩？」張萱淇抬頭朝李雨揚冷冷一笑
「咁人地搵我，我都要覆咗人先㗎嘛～」李雨揚解釋道，「冇理由咁冇禮貌唔覆人㗎～」
「你同我食飯掛住睇手機，仲敢同我講禮貌？」張萱淇挑起眉，李雨揚真係太過份，對其他人就講禮貌，但又唔諗下同人食飯掛住睇手機禮唔禮貌
「好好好，唔覆唔覆！」李雨揚將手機放喺一邊，「唔覆啦得未呀？」
「你中意啦～」張萱淇滿不在乎地聳肩，「今日sports day攰死，我仲出嚟同你食飯算係咁啦⋯」
「我嚟緊都sports day喎～」李雨揚自顧自講道，「希望今年拎到獎牌⋯！」
「咁你加油啦⋯」張萱淇托住下巴，手拎起嘢飲，輕咬着飲管飲一喺特飲
「你有冇拎到獎牌？」李雨揚問道
「冇呀。」張萱淇搖搖頭，「參與咗開心咗咪得囉～」
「我拎到獎牌嘅話就送嗰個牌比你啦～彌補番你最後一年拎唔到獎牌嘅遺憾。」李雨揚講道
「哦，多謝定先啦～」雖然唔知李雨揚係講真定講笑，但佢個心都有少少開心
另一邊廂嘅邱茗然沖完涼行出嚟，行到櫃前拎出屋企有嘅紗布，將手上嘅傷口重新處理好
「做咩整親呀？跌到呀？」邱媽媽見邱茗然企喺櫃前貼紗布就行到佢身旁，「嘖嘖嘖⋯哎呀⋯小心啲嘛，我幫你貼啦⋯」
「唔該媽咪～」邱茗然將紗布遞比媽媽，見到媽媽擔心自己嘅時候邱茗然心裏好開心，「跑到去終點就跌親啦⋯」
「哎呀⋯損晒啦⋯貼好啦！」媽媽溫柔地貼上醫生膠布固定紗布
邱茗然拎起手機番房，佢灘喺床上睇番今日影嘅相
「唉～咁就最後一個sports day啦⋯」邱茗然細聲慨嘆
對其他人嚟講可能唔算係啲咩事，但對中六嚟講好似又有另一種感覺，所有活動都去到最後一次，再下一年大家都唔會再坐喺同一個課室一齊笑一齊癲
中六嘅最後一次活動，都係充滿以前唔會有嘅意義同感覺
⋯
「如使人之⋯」邱茗然悄悄地推開送喺枱上嘅數學書，露出早就抄好喺memo貼到枱上嘅默書範圍，「如使人之所欲莫甚於生⋯」
緊接住數學堂嘅係中文堂，而今日嘅中文堂有背默，所以放眼望去嘅話，基本上個個都係枱面放住數學書，但櫃桶放住中文書，數學堂嘅內容都聽唔入耳
個個都喺度喃喃自語，一直偷睇放淨櫃桶嘅中文書，把握最後嘅時間背熟課文
IG Link: https://www.instagram.com/nd_cotttoncandy/?hl=zh-tw