【校園】想成為您的治癒: 29. 偶遇（下）

太陽不知不覺升到最高點，陽光穿過落地窗照到枱上，剛好照到邱茗然坐嘅位置，枱面嘅書有一瞬間都反光

「好熱呀⋯」邱茗然覺得自己都就嚟比太陽曬到出緊汗，「反晒光點睇⋯」

邱茗然隔離嘅位置冇人坐，佢毫不猶疑咁坐去隔離位，一個順手將枱上嘅嘢都推到佢宜家坐嘅緊坐位

「涼晒⋯」邱茗然頓時覺得透心涼，冇陽光照到嘅位置連風都涼啲

殷書賢挺一挺直腰，坐等太耐感覺腰都僵硬咗





「腰痛⋯」殷書賢揼咗自己嘅後腰兩下，佢望一望時間，「差唔多食飯。」

殷書賢將自己位置嘅書都疊好，筆袋拉上拉鍊放喺書嘅旁邊，筆記合上夾喺書入面，轉身喺袋拎出銀包同手機

「就嚟1點啦⋯」邱茗然拎起手邊嘅手機

邱茗然放低筆伸懶腰嘅時候，見到殷書賢已經執緊嘢打算去買個lunch番嚟食完先再繼續溫書

「你去唔去買飯？」邱茗然見殷書賢打開袋，估佢應該係買飯





「嗯，都差唔多。」殷書賢微微點頭，將手機袋入褲袋，「你唔洗買飯？」

「都好似未係好餓⋯咕～」邱茗然前句剛落，肚就打鼓

邱茗然仲同殷書賢望着，肚喺度叫嘅一刻，邱茗然滿面通紅，覺得尷尬又搞笑

「好似都唔係唔餓⋯」邱茗然尷尬地笑道，然後拎起銀包同手機，「買飯，買飯⋯」

兩個人一齊行開去買飯，但殷書賢顯然地有啲唔自在，佢冇將所有嘅感覺放上面，只係下意識同邱茗然保持一定嘅距離





兩人喺路上都冇講嘢，但都係默默行向同一個方向，經過地鐵站行到商場嘅入口時，兩人同時開口：「我行呢邊⋯」

「呀？你都行呢邊呀？」邱茗然先一步笑道

「嗯。」殷書賢露出淡淡嘅笑容，今日呢個笑容夾雜咗少少嘅尷尬

「你打算食咩呀？」邱茗然喺邁步繼續行嘅同時好奇地問道

⋯

「我唔客氣啦～」邱茗然雙手合十，兩隻拇指夾住木筷子高興地笑道，然後將筷子啪開

殷書賢夾起壽司放入口，視線落喺比佢推咗去隔離打開咗嘅Chem書上，心入面都係忍唔住默默地溫書

「好好食～」邱茗然嘅內心喜滋滋，肚餓嘅時候食嘅嘢特別好食





佢嘅左手拎住手指，拇指滑螢幕，右手拎住筷子，夾起壽司就擺入口

「早知啱啱我買多個花之戀啦⋯」邱茗然望住殷書賢面前嘅兩盒花之戀就有啲後悔

殷書賢嘅目光離開書本，夾起花之戀一啖食一個，但同一時間佢發現邱茗然嘅目光落喺佢嘅Chem書上

「嗯？我好奇下只係。」邱茗然見殷書賢望住自己，下意識露出微笑，然後用筷子指一指自己面前嘅三文魚小卷，「你食唔食一件呀？」

邱茗然望住殷書賢嘅猶疑、好似有啲想食但又唔好意思開口嘅表情，就將放喺自己面前嘅壽司推前咗

「多謝。」殷書賢講完後就夾一件放入口，然後禮尚往來咁問：「你食唔食一件？」

「可以呀？」邱茗然忍唔住露出笑容，其實佢係想食，只係唔好意思開口，「咁⋯我唔客氣啦～」





邱茗然拎起筷子就伸手夾，一啖就將成個花之戀放入口；殷書賢望到成個過程，咩都冇講只係默默地挑一挑眉，然後邊食嘢邊望放喺隔離嘅書

「咔。」殷書賢將膠盒蓋蓋上，將外賣盒擺番入膠袋然後推埋一邊

喺邱茗然都食完，打算起身拎埋膠袋打算去掉垃圾嘅時候，殷書賢起身拎走膠袋：「我去掉。」

「哦⋯」邱茗然稍微呆一呆後點頭，然後拎起地理書放番喺自己前面又準備溫書

邱茗然雙托着額，喃喃自語背測驗範圍內容，背兩句又望一望書，背兩句又再望一望

「背書背書⋯」邱茗然掀到下一頁，然後又繼續背，背到一半嘅時候，邱茗然打開筆記簿，背抄咗喺筆記嘅內容

「噠！」殷書賢打開裝住薄荷糖嘅鐵盒，食咗一粒之後再打起精神繼續溫書，「食唔食？」

「呀⋯？多謝⋯」邱茗然見殷書賢將鐵盒遞比佢拎咗一粒放入口，口腔內即刻冰涼一片





兩個人各自安靜地開自己嘅科目，食完飯又要繼續努力

⋯

喺放學前嘅兩堂係PE堂，大家都會喺PE堂前嘅小息去換衫；殷書賢拎出放喺書包中嘅PE衫，等埋謝澤謙先再出去

殷書賢去到更衣室，將校服除落嚟換上PE衫，喺行出去前著上運動服嘅薄風褸，因為係透氣同薄薄嘅質地，唔會真係好熱

「你又著外套呀？你真係唔熱？」謝澤謙整理衫領之際見到著住薄風褸嘅殷書賢

「唔熱。」殷書賢搖搖頭，對佢嚟講熱唔熱係其次，唔比人發現佢手上嘅傷痕先係重點，「差唔多打鐘。」

喺行出更衣室前，殷書賢將放喺校褲褲袋嘅鎅刀放番入書包





「好彩今日有風⋯」殷書賢喺熱身跑步嘅時候喺心裏道，感受着迎面吹嚟嘅涼風，「鎅手⋯到底係幾時開始⋯？」

喺感受涼風同時，殷書賢喺心裏回想，冷靜地問自己關於呢個壞習慣嘅「起步點」

呢個壞習慣，好似喺不知不覺間持續咗一段長時間，好似係由中五開始，正值最多測驗、最多新知識要吸收嘅時候⋯

手上嘅傷痕一直累積，殷書賢自知一直咁樣落去唔係一件好事，但呢種痛就好似毒品一樣令人戒唔到⋯

「叮噹叮噹⋯叮噹叮噹～」尾二嘅堂完結嘅鐘聲響起，最後一堂緊接而來

「放個5分鐘短break，洗個面先番嚟繼續啦，一個二個都飯氣攻心咁。」阿sir眼見個個都就瞓著咁，決定喺繼續講書前比大家休息一陣

「茗然，你去唔去？」張萱淇細聲地朝坐佢斜前方嘅邱茗然嗌道，兩人嘅座位都只不過係相隔兩個

「哦好呀。」邱茗然正好就係就瞓著嘅其中一人

兩個女仔結伴一齊去廁所洗個面，踏出課室後，邱茗然貼住矮牆行，朝樓下操場探頭望

「隔離班PE堂呀。」邱茗然好似自言自語一樣講道

「係喎⋯邊個著風褸咁癲？」張萱淇聽到邱茗然咁講，都行到牆邊望落去，一望就見到著住風褸嘅殷書賢，「大熱天時著住風褸打波唔熱咩？」




IG Link: https://www.instagram.com/nd_cotttoncandy/?hl=zh-tw