【校園】想成為您的治癒: 28. 偶遇（上）

邱茗然灘喺床上靜心落嚟，佢望住下格床嘅床板，大腦入面諗住大學嘅事

「大學⋯係唔係考唔到就真係冇前途⋯」邱茗然不禁喺度諗，「將來讀完書出到社會，我會變成點⋯？」

看似有解嘅問題實際上係無解題，冇人知道將來係點，但係都會忍唔住去諗自己嘅前途同未來

「DSE唔知難唔難⋯應該都會難過學校考試⋯？唔知打開卷嗰陣我識唔識做⋯一試定生死嘅感覺真係唔太好⋯」

「如果最後每科都拎到4就好，西史同地理我都有信心拎4番嚟，但數學點算⋯？LS呢？中英2咗嘅話就連大學都入唔到⋯」





「唔知考DSE嘅時候係點⋯哥哥考嗰陣諗緊啲咩？會唔會好輕鬆定好緊張？哥哥就好啦～考到兩個5⋯我都想⋯」

「係唔係真係努力就可以考得好⋯我宜家咁樣叫唔叫努力⋯定我都要去補下習先叫努力？」

「哎呀唔理啦⋯！我瞓覺！聽日再算啦！」

邱茗然換咗個姿勢，側身攬住身邊嘅攬枕合埋眼想強制自己瞓著，但過咗兩秒又忍唔住輕皺起眉頭

「讀唔到大學就讀個asso，再轉上大學，GPA拎唔拎到高分呢⋯？」





「我真係要瞓啦⋯！再唔瞓真係天光！」

「但係拎唔到高分嘅話咪入唔番大學囉⋯！咁、咁點算呀⋯？即係又係得一次機會⋯？」

「人生點解咁多嘢煩⋯？唔得啦⋯真係要瞓啦⋯」

自從上到嚟中六之後，都唔知有幾多個夜晚會喺瞓覺之前諗起呢啲問題，呢啲問題就好似一直纏繞住一樣，直到新問題出現前都唔會停止⋯

⋯





「張萱淇，你做咩唔覆我機呀？」李雨揚一番到補習社見到張萱淇，就即刻行到佢身旁坐低兼問道，「叫你等埋我又唔等⋯仲要自己買嘢飲自私飲！」

「冇睇到手機咪冇覆。」張萱淇嬲爆爆咁講道

「做咩呀⋯」李雨揚一頭霧水，佢都唔知張萱淇突然嬲咩，「邊個激親你？」

「你呀李雨揚！」張萱淇冇將呢句說話講出口，只係喺心入面講，最後口講出嚟嘅係：「冇邊個，自己激親自己得唔得？」

「哦⋯唔好嬲啦～最多我蝕抵啲氹你？」李雨揚用手肘撞一撞張萱淇

「唔洗你氹。」張萱淇頓時無名火起，但佢好努力咁用平靜嘅聲線拒絕

「哦⋯」李雨揚見張萱淇唔講，佢都冇逼佢嘅打算，轉個頭就笑住對張萱淇講：「我冇帶筆，得你嗰枝，下次先還比你啦～」

「嗯。」張萱淇冷淡回應，李雨揚都唔知張萱淇嬲咩





「突然間就嬲人⋯女人都係難明嘅生物⋯」李雨揚打從心底覺得無奈，「突然又嬲突然又唔嬲，真係難觸摸⋯」

張萱淇默默地望向李雨揚，佢都知唔可以當李雨揚講嘅嘢係真，但一諗到佢呢頭答應自己嗰頭就送獎牌比第二個，張萱淇都係嬲咗

「中央空調⋯」張萱淇喺心入面不滿地講咗一句，「李雨揚你就係個中央空調，邊個中意你邊個黑仔⋯！」

李雨揚又小心翼翼咁望張萱淇一眼，佢都唔知張萱淇做咩突然唔覆佢機，仲要嬲咗佢，佢覺得自己有啲無辜

「唉⋯又嬲⋯」李雨揚無奈地喺心入面道，「最多下次還番筆比佢囉⋯」

⋯

十月嘅某一個星期六





邱茗然嚟到公共空間，打算先行一圈睇下有冇空出嚟嘅位置可以坐

「唉～星期六咁多人㗎⋯難得我咁早起身過嚟⋯」邱茗然望住好似滿座一樣嘅公共空間喺心裏慨嘆，「如果唔係樓上鑽嘢，星期一又有測驗我先唔出嚟⋯」

喺差唔多行到盡頭嘅時候，咁啱就一個好熟嘅身影獨自一人坐喺長方形嘅枱前；邱茗然企喺原地回頭望一望啱啱經過嘅座位，附近冇相熟嘅人，亦冇同級嘅同學

「與其同陌生人坐，同識嘅人坐好似冇咁尷尬⋯」邱茗然望向殷書賢嘅座位同時，喺心裏考慮，「問下佢可唔可以搭枱都得啫～」

邱茗然考慮好後便朝殷書賢嘅方向邁步，行到枱邊時瞄一眼殷書賢對面嘅位置：「應該冇人坐～」

「嗨～」邱茗然先禮貌地打個招呼，做緊題嘅殷書賢抬起頭，「有冇人坐呀呢邊？介唔介意我搭枱？」

「唔介意。」殷書賢抬頭見到係邱茗然，佢微微搖頭，然後再次低頭做題

「唔該。」邱茗然行到殷書賢斜對面嘅位置拉開櫈坐低，然後將書同文具喺袋中拎出嚟





邱茗然嘅左手一邊掀書，右手從筆袋中拎出原子筆同螢光筆

喺開始溫書前，邱茗然再好快咁睇一睇手機，然後先至心甘情願咁溫書

殷書賢嘅視線一直停留喺Chem書上手上拎住cal機，指尖喺cal機嘅黑色數字鍵中快速地輕敲着，右手拎住原芯筆將答案寫低

殷書賢平日得閒都會做練習題，除咗可以慢慢做之外，唔明都冇時間可以諗到明，同考試唔一樣，做每一題都要爭分奪秒

殷書賢對於課題、公式嘅熟悉，令佢望一次題目就知要寫咩答案，人地拎住雞精書溫，佢本雞精書就喺腦入面

「好熱⋯」殷書賢將筆放低後將身上著住嘅薄外套嘅衫袖拉起

邱茗然抬眼瞄殷書賢一眼，視線總會不自覺地落喺殷書賢嘅手臂上，有時好似因為知道而會下意識咁去留意一樣





殷書賢眼睛嘅餘光留意到來自邱茗然嘅視線，便抬起頭望向邱茗然，兩人對上視線，邱茗然若無其事一笑、微微聳肩




IG Link: https://www.instagram.com/nd_cotttoncandy/?hl=zh-tw