【校園】想成為您的治癒: 35. 會後悔嗎？
「你咁好肯教人嘅？我班考第一嗰個女仔都唔肯教人⋯」邱茗然諗起上次佢問佢班嗰個第一名，嗰個女同學明顯唔想教人，仲要講句自己都係咁啱計到
「我教完人又唔代表人地會即刻成績好過我。」殷書賢淡然地講道，聽起嚟就好似表達緊佢嘅自信一樣，「而且講解比人聽都係講解比自己聽。」
「咁⋯教埋我呢題得唔得？」邱茗然指住另一道比佢圈住咗題號嘅題目
「邊度唔明？」殷書賢對題目嘅魅力係無法抗拒，見到題目係有星嘅題目，佢頓時有興趣
「果然讀書上嘅嘢都難唔到佢⋯」邱茗然喺心裏講出心聲，將自己計咗嘅部份遞比殷書賢，「呢個人唔會有讀書以外嘅興趣啦真係～」
喺邱茗然做晒佢唔識嘅題目之後，佢就起身番去自己本來坐緊嘅位
殷書賢喺邱茗然坐低嘅時候望咗佢一眼，忽然間諗起趙遠寧同佢講嘅嘢
「啪。」邱茗然一拉開櫈準備坐低，一張紙仔就飛到佢面前落喺枱上
邱茗然坐低嘅動作都放慢咗，佢打開張紙，上面寫住：「你咩名」
「佢⋯完全唔知我叫咩名⋯」邱茗然嘅無奈感一湧而上，無奈又好笑，「講咗咁多次嘢原來都唔知⋯」
「睇呢度↑」邱茗然隨便拎咗張WS，將memo紙貼喺自己嘅名下面，然後將功課紙推比殷書賢，仲要補多句：「原來你唔知我叫咩名」
「邱茗然⋯」殷書賢見到邱茗然嘅名，然後喺memo上寫：「冇特登留意」
「你真係對讀書以外嘅嘢冇興趣」邱茗然寫嘅時候，莫名地露出笑容覺得有啲想笑
「唔會特登睇」殷書賢一本正經地回答
「咁做咩突然問起？？？」「有人托我問」
「邊個！？」「我個frd想知你叫咩名」
「佢個friend？」邱茗然諗緊成日同殷書賢一齊嗰幾個男仔，「問我名做咩⋯」
殷書賢見邱茗然冇再寫嘢比佢，佢就繼續做自己嘅嘢，佢準備緊後日嘅默書內容
「眼攰⋯」殷書賢除低眼鏡捏一捏鼻樑，「休息兩分鐘先⋯」
殷書賢拎出機，手機啱啱已經震咗好耐，一拎出嚟睇就見到係家庭group講緊食飯聚下
「學術會議⋯」殷書賢淨係見到都已經幻想到到時食飯嘅情況，一家人坐喺枱前講呢個嘅成績嗰個嘅成績，然後再炫耀起嚟，「諗到都唔想去⋯」
⋯
「你仲喺度？」殷書賢行到巴士站，見到邱茗然企喺瓦遮頭下等緊巴士嚟
「嗯⋯啱啱走咗班車⋯」邱茗然笑一笑，然後又低頭睇手機
此時殷書賢嘅手機震動起嚟，殷書賢一睇就見到係媽媽嘅來電顯示
「喂？」「你今晚去唔去食飯？」
「唔去。」「點解唔去呀？冇人煮飯比你食。」
「唔想去⋯我自己買外賣都得。」「仔呀，冇人煮飯比你食，媽媽唔想你食咁多外賣⋯」
「我唔想去，我番去溫書。」「咁⋯唉，咁你自己搞掂啦⋯」
「唉⋯呢個仔真係⋯」殷媽媽無奈咁望住手機嘆氣，「真係寧願溫書都唔去⋯」
殷書賢最唔中意去呢啲所謂嘅家庭聚餐，平時就算係佢唔中意做嘅嘢，佢都可以勉強自己去，除咗家庭聚餐⋯
「做咩寧願食外賣咁慘？」邱茗然雖然一直睇手機，但都聽到殷書賢講嘅嘢，於是笑一笑問殷書賢
「唔想去。」殷書賢講出同啱啱一樣嘅回答，「只係學術會議由屋企轉咗去餐廳。」
「唔⋯你講緊同屋企人食飯？」邱茗然好快就估到，畢竟佢自己屋企都會有呢啲情況
「嗯。」殷書賢回答
「好難避免，我屋企都係咁～」邱茗然無奈咁笑着聳肩，「一食飯就講呢個嘅成績、嗰個嘅讀書狀況⋯不過去慣㗎啦～」
「去食飯好麻煩，番屋企溫書好過。」殷書賢講道
「目標高嘅人真係唔同，真係好呀～」邱茗然對殷書賢笑道
「冇咩特別。」殷書賢唔理解有咩唔同，明明都只係一個目標，又有咩特別可言？
「嚟緊好快就要報大學啦⋯」邱茗然嘅微微抬起下巴，望住被染成橙紅色嘅天空，忍唔住慨嘆：「又中六啦咁就⋯」
「你最後揀咗咩科？個Draft。」殷書賢問道
「都一樣，都係社工囉～另外揀咗Social Science。」邱茗然講道，「你除咗揀醫仲揀咗咩？」
「Chem。」殷書賢講道
「哦～」邱茗然點點頭，忽然覺得佢同眼前呢個人嘅世界真係差好遠好遠：「純Chem⋯要計好多數⋯」
「你唔會後悔揀呢科⋯？」殷書賢忽然間問道，邱茗然都稍微一愣
「唔會呀～係我想讀㗎嘛～呢兩科隨便一科派到比我，我都Okay～」邱茗然喺講嘅同時，喺心裏都祈求讀到，「讀到就最好啦～」
「努力啲溫書，考好個試咪得。」殷書賢嘅手插喺褲袋，摸到放喺褲袋嘅鎅刀，「嗯。」
「我當然一定會努力溫書啦！」邱茗然以肯定嘅語氣講道，「希望最後考嘅時候，成績真係會係同我嘅付出成正比⋯」
「咁你加油。」殷書賢淡然講一句
「你都加油！彼此彼此～」邱茗然露出笑容，係一如既往嘅開朗笑容
殷書賢定睛望住露出笑容嘅邱茗然，低頭後喺臉上掛上淡淡嘅笑容，喺心裏輕嘆一口氣：「可以咁輕鬆真係好⋯」
只有殷書賢自己知道，上到嚟中六之後佢每日都喺無法排解嘅壓力中徘徊⋯亦只有佢自己知道，佢嘅手上又多咗幾多道傷痕⋯
連佢自己都唔知道由幾時開始，佢嘅日程就變成只有做功課同溫書，好似連放鬆一陣都係一種錯一樣⋯
「番到去之後⋯又要溫書啦⋯？」殷書賢喺心裏猶疑地問自己，「番到去先算⋯」
IG Link: https://www.instagram.com/nd_cotttoncandy/?hl=zh-tw