「我都話今次又係佢最高分㗎啦⋯」謝澤謙不忿地講道,豎起兩隻手指望向殷書賢,好似因為嗰小小分數而要飲恨而終一樣,「差兩分咋殷書賢!我就高分過你啦!」

「叫你努力溫書㗎啦!」張思群講嘅同時,將謝澤謙嘅手㩒低

「你有咩資格叫我努力溫書?」謝澤謙望向張思群,「你仲低分過我⋯」

「我未盡力啫~出盡全力一定同你差唔多囉!」張思群以肯定嘅語氣講道,佢唔信自己未盡力都低分過謝澤謙

「殷書賢,我下次一定高分過你!」謝澤謙講道





「嗯,好呀。」殷書賢望佢一眼,然後點頭

「睇下佢幾自在,你威脅唔到佢嘅地位。」趙遠寧喺一旁食花生笑道

「行啦行啦!我好想飲嘢呀!」張萱淇拉住邱茗然小跑到小食部,「快啲快啲!」

「你洗唔洗咁急呀!?」邱茗然比張萱淇拉住,佢唔想跑但都要跟住跑起嚟,「淇淇!」

手拎住嘢飲嘅趙遠寧偶然地望到邱茗然同張萱淇飛奔跑過,佢即刻諗起佢托殷書賢幫手問嘅嘢





「喂喂喂!殷書賢!」趙遠寧即刻就叫殷書賢,殷書賢望向佢,見到佢一臉期待,「問咗未呀?」

「咩問咗未?」殷書賢一時三刻唔明趙遠寧講緊咩

「名呀!」趙遠寧講道,然後回頭望向外面嘢飲機前企着嘅兩個女仔,「你有冇問呀?」

「哦,問咗。」殷書賢講道,嗰日喺圖書館佢問咗

「咩名呀?」趙遠寧即刻好所有嘅好奇擺上面





殷書賢望住趙遠寧,但佢冇即刻開口講,而係好快又將視線移開:「邱茗然。」

「哦~唔該兄弟!」趙遠寧滿意地點頭

殷書賢悄然望趙遠寧一眼,佢都唔明點解要托自己去問名,明明佢自己都可以去問,不過算啦,都唔係咩好重要嘅事

「陣間咩堂?係唔係LS?」謝澤謙眼見小息都就嚟完結就順口一問

「上完X2先上LS。」殷書賢罕有地開口回答,平時佢都係聽佢地講,好少會自己答

「咁死啦,老張又要話成日要等5分鐘先齊人啦~」張思群笑道,「今日肯定又操pp題啦,手痛手痛⋯」

「小練習嚟啫~」謝澤謙一臉輕鬆咁聳肩,「難我唔到。」

「睇下邊個高分!」張思群即刻發起挑戰,係唔係精英班嘅人都特別中意鬥嚟鬥去?





「好呀!驚你呀!」謝澤謙爽快咁接受挑戰,「邊個最低分請食雪糕!」

「10分鐘練習都要鬥?」趙遠寧望住士氣高昂嘅兩人無奈咁問

「鬥!咩唔鬥!」「我愈戰愈勇呀宜家!」

本來係謝澤謙同張思群兩人之間嘅比賽,忽然間坐喺隔離咩都冇講嘅人都被逼參賽;趙遠寧無言以對,殷書賢冇咩特別想法

「精神真係好⋯」殷書賢坐喺一旁食嘢時喺心入面道,「仲諗到要鬥高分⋯」



距離落堂時間已經過咗五分鐘,但似乎教地理嘅阿sir執意要講埋剩低嘅少少





「仲未落堂⋯我地班啲人都番晒嚟咁濟⋯」張思群望一望企喺課室外面嘅人,都齊得七七八八,「老張都嚟到啦⋯」

「仲未落堂?」張sir行到課室門口,同大家一齊等,「陣間你地拎定pp出嚟啦,我已經決定好今日做邊題。」

「不如今日唔做題啦~」「你地就想!」

張sir同大家一齊等嘅時候都有講有笑,張sir喺學校都算係比較受學生歡迎嘅老師,偶爾嘅小幽默令上堂嘅氣氛都比較輕鬆,雖然past papaer嘅題目都係要做

喺過多一陣之後,地理堂終於結束,上地理堂嘅同學都好快手執嘢,個個都趕住番去上堂

「番去上堂啦⋯!」邱茗然拎起嘢就急步行出課室

「茗然茗然!等埋我!」同佢讀同一科嘅許洛霏追上邱茗然嘅步伐行出課室

邱茗然企喺原地等許洛霏小跑過嚟,然後就同許洛霏一齊番課室





「叩叩⋯遲咗落堂⋯」「遲咗落堂唔好意思⋯」

兩個女仔小心翼翼咁推開課室門對Miss Tong禮貌地道

「快啲番埋位攞書。」Miss Tong微微點頭示意明白,高中落堂時間遲都係無可避免

「呼⋯」邱茗然將地理嘅嘢放入櫃桶,然後拎出中文書,「搞掂⋯」

「你地啲筆記拎定出嚟啦,有嘢抄呀陣間。」Miss Tong行到電腦前,邊開screen邊講道

「筆記筆記⋯」邱茗然從櫃桶拎出中文筆記,順手地往櫃桶嘅右邊摸索,因為筆袋放喺右邊,「嗯?筆袋⋯」

邱茗然低頭一望,櫃桶嘅右邊空空如也





「喺隔離⋯」邱茗然好快就知道筆袋喺邊,「難怪番嚟嘅時候好似冇咗啲嘢⋯」

邱茗然無奈地只可以問後面嘅同學借枝筆用住先,邊個叫佢咁可愛,連筆袋都可以唔記得拎

「點解有個筆袋⋯」殷書賢望住手上嘅筆袋,啱啱佢想拎筆嘅時候,有嘢頂住咗喺佢筆袋前面,「上完堂連筆袋都唔拎⋯」

殷書賢喺自己筆袋拎咗支筆,將邱茗然嘅筆袋放番喺櫃桶,冇理由將人地個筆袋放喺自己枱面

「佢應該陣間都會嚟拎⋯」殷書賢心裏道,「佢發現咗嘅話。」




IG Link: https://www.instagram.com/nd_cotttoncandy/?hl=zh-tw