【校園】想成為您的治癒: 41. 兄妹
「佢嗰日終於還番啲筆比我，但佢特登去買番同我借比佢嗰幾支筆一樣嘅筆⋯」張萱淇有啲無奈，佢都唔太明李雨揚呢個操作
「哦～佢係唔係想同你用同款筆呀～」邱茗然掩住嘴笑
「佢仲要讚自己好有眼光，識問我借筆⋯」張萱淇聽完邱茗然講嘅嘢之後嘴角有啲忍唔住微微上揚
「嘖嘖嘖⋯哎呀～」邱茗然嘅笑意更明顯，輕輕地撞咗張萱淇兩下，「佢會唔會係借意想同你用同款筆，只係隱晦啲嘅表達咋～唔通佢對你⋯」
「我覺得佢對個個都會係咁囉⋯」張萱淇忍唔住反咗個白眼，「但嗰日撞到佢個friend，佢個friend一提起佢個ex佢就勁大反應。」
「可能都係咁啱啫～」邱茗然冇諗太多，「都分咗手啦～」
「因為好少見佢咁大反應，佢仲話佢比人飛⋯」張萱淇宜家諗番去都覺得愕然，「不過，我唔係中意佢⋯！」
「我冇講呀～你自己講㗎咋～」邱茗然面帶微笑點點頭，順便比多個okay手勢，「信你一定信你～」
「你都快啲暗戀個人啦⋯次次都係你喺度食我嘅花生⋯但又冇花生比我食番⋯」張萱淇扁起嘴，佢覺得太唔公平，但下一秒佢就發現自己呢個講法好似承認緊啲咩一樣，即刻就再次否認，「我真係唔係中意佢呀！我講明先呀！」
「好呀好呀～」邱茗然微笑着點頭，「淇淇咁講，我一定會信～」
「喂呀～」張萱淇知邱茗然唔信佢，即刻行上去拉住邱茗然嘅手前後晃
⋯
屋企只有邱茗然一人，今日佢喺放學之後直接就番咗屋企
邱茗然好似大爺咁坐喺梳化睇電視，嚟緊幾日終於都冇測驗，可以稍微咁偷懶一下
「咔—」門口忽然傳嚟開門聲，邱茗然嚇咗一跳即刻坐好回頭望向時鐘，「6點幾啦⋯！媽咪番嚟⋯！」
邱茗然企起身慌張咁左顧右盼，望到仍然播緊節目嘅電視嘅時候，即刻拎起放喺梳化上嘅遙控
「閂電視閂電視！」邱茗然即刻㩒遙控上嘅空色制，「絕對唔可以比佢發現，如果唔係又係沒完沒了嘅囉唆⋯！」
「冇，上次嗰間唔係都Okay?」「還好啦～下次食另一間⋯」
電視啱啱閂，屋企嘅大門就打開咗，邱茗然一個逃跑嘅姿勢企喺房門口
「你呢個pose企喺房門口做咩？」邱旻顥行入屋，輕皺着眉頭一臉困惑咁望住邱茗然
邱旻顥將鎖匙放喺門邊嘅櫃上後行入屋除鞋，喺佢身後仲有一個人，不過呢個人係邱旻顥嘅女朋友李逸彤
「哥哥你嚇死我啦⋯」邱茗然即刻鬆一口氣，「我仲以為媽咪番嚟⋯」
「做咗咩虧心事咁驚呀？」邱旻顥嘅語氣柔和，行到門前將大門閂上，接過李逸彤手上嘅袋行番房
「冇囉⋯」邱茗然聳肩，眼見唔係媽媽番嚟佢都輕鬆晒，「你知啦，媽咪番到嚟見到我睇緊電視嘅話，絕對會話我又唔溫書⋯」
「咁你考好啲比佢睇咪得，你講佢係唔明㗎～」早就經歷過呢啲嘅邱旻顥輕鬆地笑道，「就算你同佢講高中好辛苦，佢唔會明㗎。」
「你梗係咁講啦！你考得好唔好，媽咪都唔理嘅⋯」邱茗然扁起嘴講道，然後行到李逸彤身邊拉住李逸彤：「姐姐，哥哥咁講係因為媽咪最錫佢，無論佢考得好唔好、點都好，媽咪都唔會鬧佢。」
「不過，你哥哥最錫你喎唔係咩？」李逸彤細聲地對邱茗然講道
「哥哥最錫你就真，我呢個妹妹都要退居第二啦～」邱茗然挽住李逸彤嘅手臂，下一秒就鬆開手去廁所
邱旻顥喺房行出嚟，佢聽到晒啱啱邱茗然講嘅嘢，佢只係有啲無奈，邱茗然一直以嚟嘅想法佢都係知道，雖然佢冇覺得父母有偏心自己呢個情況
但佢亦改變唔到邱茗然嘅想法，可能因為父母都會拎邱茗然同自己比較，先會令邱茗然有呢種感覺啦⋯
去到夜晚11點幾嘅時候，邱茗然終於行出房去攞杯水飲，喺佢拎住杯水打算番房嘅時候，坐喺梳化嘅媽媽叫停咗佢
「平時番學跟唔跟得上呀？」媽媽問道
「嗯，跟到呀。」邱茗然飲一啖水，心裏道：「唉⋯又講讀書，攰唔攰⋯？」
「有咩唔識唔明問下哥哥，睇下哥哥教唔教到你。」媽媽又講道，「你有唔明可以問哥哥都好，哥哥之前都要靠自己⋯」
邱茗然當自己好認真咁聽，一邊聽一邊點頭，偶爾飲啖水
「哥哥靠自己都可以考得好，我覺得你都做到。」媽媽拍一拍邱茗然嘅膊頭，想比少少鼓勵佢，等邱茗然有信心
「嗯。」邱茗然只係答咗個嗯，對於媽媽嘅鼓勵，佢完全冇因為咁而有信心：「做咩又要拎我同哥哥比較⋯」
「問下同學都可以㗎，同學唔會唔教你咁衰㗎～大家一齊學嘛～」
「你肯比心機嘅話一樣可以做到㗎～」
「睇下哥哥咪又係冇補習，最後咪又係靠自己考到29分，你努力啲都可以㗎～」
媽媽一直講，邱茗然就一直當聽唔到，一直喺度飲水，飲完一啖又一啖
「嗯，好呀，我會㗎啦⋯！」邱茗然聽到攰嘅時候就喺媽媽再講下一句之前先企起身，拎住水杯入房然後將門虛掩
邱茗然唔中意其他人成日拎自己同哥哥、同其他人比較，因為冇咩好比較，比較完之後亦唔會令自己開心啲叻啲
「唉⋯」邱茗然嘆一口氣，將水杯放到書枱上，然後就爬上床灘住睇手機，「攰⋯」
IG Link: https://www.instagram.com/nd_cotttoncandy/?hl=zh-tw