【校園】想成為您的治癒: 40. 不好奇

張萱淇行入課室，佢好快就見到許洛霏坐喺邱茗然前面嘅座位同邱茗然傾緊計，而且佢地笑得好開心

喺張萱淇行去邱茗然嘅座位時，許洛霏就起身行出課室，邱茗然亦打回原形，收起興奮嘅心情

「講咩呀啱啱？」張萱淇坐低喺邱茗然前面嘅座位

「嗯？冇呀～就係講緊韓國嗰個長壽綜藝咋嘛～」邱茗然笑道，從佢嘅笑容中都知道，佢好高興，「原來佢都有睇，咪傾兩句囉～」

「哦～」張萱淇鼓起兩泡腮微微點頭，然後起身拉住邱茗然嘅手，「陪我去樓下買嘢飲呀～就到早會啦反正。」





邱茗然起身同張萱淇挽住手臂行出課室，一踏出課室門就見到殷書賢番嚟，手上拎住支嘢飲

殷書賢同邱茗然嘅視線不自覺咁對上，但殷書賢好快就將視線移開，邱茗然亦若無其事咁同張萱淇一齊喺殷書賢嘅身邊行過

「佢真係日日都著住冷衫，冇見佢除過⋯」張萱淇回頭望向已經離佢一段距離嘅殷書賢，拉住邱茗然細聲道

「可能佢怕凍呢～」邱茗然笑道

「佢體感溫度係-30度？」張萱淇反咗個白眼，「你唔係識佢咩？你有冇問下佢做咩成日著住冷衫？」





「我做咩突然要問呢個？問完又唔會點。」邱茗然當然冇問嘅必要，因為佢都已經睇過冷衫下面隱藏嘅秘密

「你冇好奇過咩？」張萱淇訝異地問道，「你識咗佢就冇好奇過呢個問題？」

「我唔好奇⋯」邱茗然一臉平靜地搖頭

「唔知點解佢成日都著住長袖冷衫呢⋯唔通佢有嘢唔比得人知？」張萱淇喺度估，聽到後半句嘅邱茗然頓時望向張萱淇，「例如受過重傷而有嘅疤痕⋯之類？」

「女人嘅直覺真可怕⋯」邱茗然喺心入面慨嘆，想扮冇事想一笑了之，但又不禁輕皺起眉頭，「我諗⋯都唔係重傷嘅⋯」





邱茗然嘅沉默令呢個話題冇再繼續落去，畢竟比人知道嘅話都唔係一件好事，再者，邱茗然應承咗唔講出去

⋯

「今日又做essay啦⋯上次嗰份寫到我手都就嚟斷⋯」邱茗然同張萱淇一齊番課室，「好彩佢後日先交⋯」

「後日先交⋯但要做兩題呢～」張萱淇嘆氣道，「同比一日係冇分別⋯」

上完X1堂之後係一個15分鐘小息，今堂Chem堂比起平時遲咗少少落堂

「今日居然遲落堂？」張萱淇有少少意外，番到嚟課室嘅時候居然見到Chem嘅同學

啱啱嘅Chem堂因為做小組功課，所以將枱都拍埋一齊、郁過枱櫈，C班嘅同學番到課室嘅時候，佢地先啱啱還原緊啲枱

「搬番啲枱。」謝澤謙將佢坐嘅位置嘅枱櫈移番去原本嘅位置





「噫—」因為冇拎起枱就移動，枱隨即發出同地面磨擦嘅刺耳聲

「你拎起嚟搬啦！」張思群即刻抗議，佢都已經起晒雞皮

邱茗然行到去自己嘅座位附近，等緊殷書賢將佢張櫈搬番去原位；殷書賢嘅嘢仍然放喺邱然嘅枱上，佢將枱拎起然後行番去枱嘅原位

「呯！」殷書賢將枱放低嘅時候唔小心跣一跣手，搞到張枱腳喺離地2cm嘅時候直接撞上地面

班上嘅人即刻嚇咗一跳，個個都望過嚟呢邊睇下發生咩事；邱茗然嘅膊頭都縮咗一下，手提起放到胸口安撫一下自己受驚嘅小心靈；謝澤謙佢地幾個都嚇咗一跳即刻回頭望

枱腳一掂到地面就即刻唔穩咁搖咗一搖，搞到邱茗然擺喺櫃桶入面嘅嘢都跌晒出嚟

「Sorry。」殷書賢面不改容咁開口講道





邱茗然無言地望住地上嘅嘢，然後抬頭望咗殷書賢一眼

「你唔係要人地女仔自己執呀嘛？」張思群笑道，佢地幾個就企喺隔離食花生

「快啲幫人執番啦殷書賢～」謝澤謙加把口講道

殷書賢將枱放好後就直接蹲低，邱茗然將自己嘅書放到枱上然後一齊執

「我懷疑你係特登⋯」邱茗然嘅手好快咁將啲書拎起拍兩拍

「冇，我唔小心。」殷書賢將散落嘅嘢疊番好後起身，「唔係特登。」

「Okay搞掂～」邱茗然企起身將啲嘢一次過再疊好，然後整齊咁放番入櫃桶

「行未呀殷書賢？」謝澤謙問道，然後望一望邱茗然，將佢由頭到腳打量一次，「幫人執完嘢就行啦～」





「係喎⋯名⋯」趙遠寧記得佢想做啲咩，上次叫殷書賢幫佢問，殷書賢明明問咗都唔同佢講，「佢咩叫名⋯？」

「趙遠寧，行啦！」張思群回頭，見趙遠寧仲企喺原地發呆

邱茗然坐低喺位拎起水樽飲啖水，趙遠寧聽到張思群叫佢之後回神望一望邱茗然

「算啦～冇咩所謂。」趙遠寧邁步行跟上佢地嘅步伐

「茗然，去唔去toilet？」張萱淇行到去邱茗然嘅座位，邱茗然自動就起身同張萱淇一齊出去

「最近好似都冇聽你提你個補習同學嘅？」邱茗然喺踏出課室嘅時候忽然提起

「我冇講你聽咩？」張萱淇一臉意外咁瞪大雙眼，「最近喎⋯！」





「有咩事呀？」邱茗然知道原來都係有嘢發生咗，臉上即刻寫住「我超想食花生！」嘅表情




IG Link: https://www.instagram.com/nd_cotttoncandy/?hl=zh-tw