【校園】想成為您的治癒: 47. 兩種形象

Lunch前嘅X2堂

喺鐘聲響起嘅同時，殷書賢同謝澤謙佢地幾個踩點行入C班

「好肚餓，陣間食咩好？」趙遠寧一坐低就已經頹廢咁諗緊食咩做午餐，「你話？」

「是旦。」比趙遠寧捉住手臂嘅殷書賢敷衍咁回答，佢拎咗支筆就將筆袋同啱啱嘅Bio書收入櫃桶

「沙啦沙啦—」殷書賢嘅筆袋一放入去，櫃桶裏就傳嚟嘶嘶沙沙嘅聲





「咩聲？」殷書賢心中有啲疑惑，彎腰側身望入櫃桶，順手拎開筆袋好奇望一眼

一望就見到櫃桶嘅最入放咗兩包糖仲有包朱古力，殷書賢頓時一臉無言咁坐番好嘅同時將筆袋擺入去

「呢個人連櫃桶都有糖⋯」殷書賢喺無奈地喺心裏道，「咁食法會唔會有糖尿病⋯」

喺lunch之後就係全校週會，時間差唔多到打鐘嘅時候，個個都喺操場等打鐘集隊

「話說嗰日我經過格仔店嘅～」張萱淇輕力咁拉一拉邱茗然嘅手，「見到呢個好靚嘅⋯手鍊，然後我上網睇一睇，佢好多款～」





「哦～真係幾靚～」邱茗然望住張萱淇開比佢睇嘅IG shop，「呢款呢款！呢款好睇呀～」

飾物對女仔嚟講果然係有致命嘅吸引力，女仔果然都係貪靚嘅生物，見到靚嘅飾物嘅時候雙眼都會發光

「我地一齊買呀～」張萱淇激動咁捉住邱茗然嘅手晃，「佢好多都有兩款～」

「好呀～」邱茗然都有興趣，佢同張萱淇其實已經好多閨密裝，「睇下有冇其他款⋯」

「喂！你有冇聽到我地講嘢？」張思群用手肘撞咗殷書賢一下





「嗯？冇。」殷書賢回神過嚟之後淡定咁講道

「你聽下人講嘢啦殷書賢⋯」謝澤謙出一個無力嘅拳，殷書賢提手擋住謝澤謙嘅拳頭，「唔好淨係諗住啲題目點做啦⋯」

「冇諗嘢⋯」殷書賢無奈笑道，「我放空唔得嘅。」

「呢個好唔好？」張萱淇指住其中一款手鍊問邱茗然

「好呀～」邱茗然點點頭，然後從裙袋拎咗包糖出嚟，打開包糖拎一粒放入口

邱茗然嘅目光偶然咁落喺企喺離佢有一段距離嘅斜前方嘅殷書賢身上，因為唔係上堂嘅關係殷書賢冇戴眼鏡，但冷衫仍然係必備

「好似得喺圖書館先會見佢戴眼鏡，平時都係唔戴⋯」邱茗然喺心裏道，「佢戴咗眼鏡之後個樣好斯文⋯」

邱茗然眼中嘅殷書賢，一戴咗眼鏡就成個斯文feel出晒嚟，但如果話冇戴眼鏡，係冷淡feel多過斯文feel⋯





「嗯？」邱茗然見殷書賢忽然望向佢呢邊，「佢feel到我望住佢？好恐怖⋯」

邱茗然拎起手上包糖微微前後一晃示意一下，然後低調咁比咗個Yeah，臉上掛住開朗活潑嘅笑容

「又係好酸嗰個糖⋯」殷書賢認得嗰個包裝，淨係望到個包裝都已經令唾液腺受刺激，「救命⋯」

殷書賢望住邱茗然嘅笑容兩秒，然後小幅度咁搖頭，手掐住自己兩邊嘅臉頰想停止一直有大量口水喺口中嘅狀況；邱茗然望住同殷書賢比人嘅感覺違和嘅舉動不禁失笑

「好酸⋯」殷書賢收回視線微微低頭望住地面，呢種感覺令人太痛苦

邱茗然掩住嘴偷笑，同殷書賢對上眼嘅時候，殷書賢默默咁搖頭

「叮噹叮噹⋯叮噹叮噹～」隨住鐘聲響起，所有人都喺操場集合排隊，按次序去禮堂上週會





⋯

放學後嘅圖書館

「你今日冇功課呀？」邱茗然遞出一張memo

「冇，淨溫書」殷書賢寫道

「你地班做咗Ex.4未？」「做咗」

「你介唔介意教我少少⋯差兩題，真係兩題！」「點解又有唔識⋯都係用一樣嘅嘢」

「你係文理雙全嘅學霸嘛」「完全冇關係」

「教我同時你又可以解題，又可以溫數，一舉兩得，一箭雙雕」邱茗然一邊偷笑一邊喺紙上寫道，然後遞比殷書賢





殷書賢打開memo紙，喺回答前思考一下，好似⋯又真係好有道理，於是殷書賢寫道：「哦，邊題？」

喺半個鐘後⋯

「呀⋯又話可以教埋另一題⋯轉個頭就行咗去⋯」邱茗然哀怨咁望住最後嘅第37題，佢真係攰啦，因為討厭麻煩嘅數學

邱茗然拎住鉛芯筆，一直用筆尖輕戳堂課簿，佢苦惱咁扁起嘴

「解完題就行開，講一半又唔講一半⋯」邱茗然輕戳着簿面，紙上都有一個個黑點

其他科目佢都可以靠自己，唯獨數學唔可以，數學唔識就係唔識，唔會因為你好努力就一理通百里明，雖然都係會努力咁克服⋯

「唉⋯我個大腦真係唔係用嚟做數⋯」邱茗然感覺佢嘅大腦都就嚟爆炸，但佢都係諗唔通





邱茗然坐喺轉轉櫈上面，雙手推一下枱邊借力，佢成個人由面向窗變成面向身後嘅書櫃

「佢企喺度都要拎住書溫⋯」邱茗然悄悄咁探頭一望

殷書賢就企喺書櫃前，因為一直坐喺硬櫈度搞到腰痛屁股痛，所以只好起身行下企下

但佢又唔想溫到一半唔溫書，於是拎埋Bio書離開座位

「我應唔應該叫佢⋯」邱茗然望住殷書賢一副專心嘅模樣有啲猶疑，「但唔叫佢嘅話，我要諗到幾時先做到⋯！」

邱茗然轉身拎起堂課簿，然後用鉛芯筆嘅筆頭輕輕咁喺殷書賢嘅膊頭後戳兩下




IG Link: https://www.instagram.com/nd_cotttoncandy/?hl=zh-tw