【校園】想成為您的治癒: 48. 偶遇
殷書賢擰轉頭望，佢估邱茗然應該係解咗一半又唔識所以要問佢，但佢一望過去，淨係見到貼喺堂課簿上嘅一張新嘅memo紙：「我唔識計都係⋯」
邱茗然雙手拎住堂課簿，用堂課簿遮住自己下半塊面，誠懇又可憐咁望住殷書賢
殷書賢伸手將堂課從邱茗然嘅手中拎走，拎出放喺褲袋嘅筆，喺memo上寫：「已經解咗題，DSE又唔係我代你考」
殷書賢將貼住memo紙咗一頁轉向邱茗然；喺邱茗然睇到而無奈扁嘴嘅同時，殷書賢又喺紙上寫：「你再諗下先」
邱茗然可憐又苦惱，默默地扁一扁嘴後接過堂課簿，喺memo上又寫：「好絕情⋯簡直係惡魔⋯」
殷書賢反應冷淡，睇起嚟完全唔打算再幫一下；邱茗然默默地轉身坐番好又努力思考一下
「真係解唔到⋯？」殷書賢疑惑咁望一眼，「只係中等程度嘅題⋯」
殷書賢坐番埋位，望到邱茗然仍然係冇進度，然後係一直嘅思考、一直嘅計唔到、一直嘅小數點、一直嘅無盡小數⋯
「唔啱呀⋯」殷書賢安靜咁望住邱茗然寫嘅嘢，佢忍唔住就皺眉頭一皺喺心裏略帶痛苦地講着，「唔係呀唔係呀⋯計錯啦⋯錯晒啦⋯點可能計到答案呀⋯」
邱茗然一臉認真咁計數，殷書賢卻皺着眉頭；邱茗然覺得自己嘅膊頭離殷書賢好近，好似就嚟掂到，下意識抬頭望一眼，但就見到一臉嚴肅嘅殷書賢
「你知計緊咩？」殷書賢忍唔住開口細聲地問邱茗然
「搵緊呢個呀～咁我要計最後答案，都要搵咗呢個先，然後再搵呢個，計到先可以合埋一齊用⋯」邱茗然認真比劃着解釋比後書賢聽，但望住殷書賢嘅表情，邱茗然就猶疑起嚟，「唔係咩⋯？」
「講嘅係啱，但你都係計錯。」殷書賢將Bio書掀去下一頁
「呀⋯算啦唔做啦，等聽日對答案啦～」邱茗然生無可戀咁幾數學書同堂課蓋上，然後額頭貼住喺堂課上伏喺枱
殷書賢微微轉頭瞄咗邱茗然一眼，見邱茗然郁都唔郁伏喺枱上後，安靜咁繼續溫書
「做題數都做到腦出煙，呢個人考DSE點算？」殷書賢喺心裏講道，講完之後佢自己都替自己有啲擔心，「到時考嘅時候，可以同平時一樣就好啦⋯」
邱茗然緩緩抬起頭，用手臂將頭墊住，悄然咁朝殷書賢望咗一眼
「佢對讀書嘅事，從來都係百分百認真⋯」邱茗然喺心裏道，「就連我呢個同佢唔熟嘅人都睇得出⋯」
「叮噹叮噹⋯叮噹叮噹～」5點半嘅鐘聲響起，今日佢地都冇去天台，佢地執好嘢喺圖書館離開
兩人以相隔三步嘅距離一齊行，行緊去巴士站嘅時候，種喺學校外面路邊嘅大樹沙沙作響
「好快又11月⋯」邱茗然抬起頭望嘅時候忽然柔聲地講道，佢望住樹葉從樹上飄落嚟掉到地上，「好快又考DSE⋯」
殷書賢沉默不語，只係安靜抬起頭望向樹，同邱茗然一樣望住樹葉飄落掉喺地上，發出清脆嘅「噠」一聲
⋯
「淇淇，你係咪買嘢飲番屋企？」媽媽推住購物車，喺行入超級市場嘅時候望一望張萱淇
「好呀～」張萱淇毫不猶疑咁就快步行去放住飲品嘅地方
「咁你飲咩？我買緊啦，買咗個⋯麥精⋯」
張萱淇聽到一把好熟嘅聲從貨架嘅尾端傳嚟，佢即刻回頭望去後面
「咦～佢又會喺度嘅？」張萱淇忍唔住一笑，直接走向李雨揚，「喂！」
「咦你喺度呀？哦撞到熟人，轉頭再打比你。」李雨揚見到張萱淇之後就收咗線收起手機，「你喺度嘅？」
「同我媽嚟買嘢～」張萱淇回頭指一指後面，但媽媽其實喺賣生果嗰邊，「你買咁多嘢飲嘅？」
「約咗個friend去佢度玩，都唔可以兩手空空咁去嘅～」李雨揚笑道，然後就從架上拎咗一pack麥精落嚟
張萱淇蹲喺一旁，拎咗一pack蜜桃茶同一pack提子汁，雙手捧住兩pack嘢飲企起身
「你咁大力嘅？」李雨揚望住張萱淇捧起兩pack好重嘅嘢飲笑問道，「完全唔係弱質纖纖～」
「咁我都要拎過去我媽嗰邊先放得低㗎！」張萱淇即刻反駁，好可惜佢已經冇手騰空出嚟可以打李雨揚一下，「又唔見你gentlemen啲幫我拎？」
「可以㗎，你擺上嚟，我幫你拎過去。」李雨揚即刻講道，「我好gentlemen㗎！」
「咁我真係唔客氣㗎啦～」張萱淇笑道，然後將兩pack嘢飲都放到李雨揚雙手拎住嘅麥精上，「麻煩你啦～」
「嘩你⋯！你真係一啲都唔同我客氣⋯！」李雨揚因為突如其來嘅重量窒咗一窒，張萱淇只係笑起嚟
「你唔係話唔好同你客氣咩之前？」張萱淇笑問道
「啱啱識嗰陣講嘅嘢你都記得呀？」李雨揚道，「我都唔記得啦。」
「你對個個女仔都係咁講㗎啦～唔記得好正常～」張萱淇以輕鬆嘅語氣講，但心入面卻有一陣陰霾飄過
「講起女仔，我嗰日見到個好可愛嘅女仔！」李雨揚眉飛色舞咁講道，只係一提佢都好興奮咁，「早知嗰日問佢拎IG啦！」
「咁又比你撞到女仔咁好彩呀⋯」張萱淇即刻冇興趣，佢苦笑着回答，「下次記得問人拎，唔好後悔終生啦～」
「痴線啦，冇拎IG點會後悔終生？」李雨揚無奈咁反一下白眼講道，「大不了咪唔拎～」
「哦⋯聽住先啦～」張萱淇笑道，李雨揚講嘅嘢似乎令佢有啲開心，感覺李雨揚好似因為佢咁講所以先話唔拎
IG Link: https://www.instagram.com/nd_cotttoncandy/?hl=zh-tw