【校園】想成為您的治癒: 55. 一刻之間

「清菁出po啦⋯？」李雨揚心入面係有啲小激動，因為佢好耐都冇見過呢個女仔出po

清菁好中意喺IG po自己嘅相，每個星期都一定會po兩、三次相，但自從佢地兩人分手次後，清菁都冇再po過任何嘢，只有偶爾嘅story

「仲以為佢係唔係block咗我⋯」李雨揚喺見到清菁嘅po之後有種鬆一口氣嘅感覺，「原來唔係⋯」

李雨揚其實唔甘心同清菁分手，喺分手嘅時候兩個人都冇講清楚原因，清菁提出分手，李雨揚亦因為鬥氣而答應，最後兩人分手嘅原因亦不了了知

「佢係仲未放低嘅意思⋯？」李雨揚忍唔住猜測清菁嘅心思，「放低咗嘅話，唔會講呢啲⋯」





李雨揚拎住手機攤低喺梳化上，佢同清菁本來就唔係同一間學校嘅同學，只係friend搭friend喺一次食飯偶然認識

清菁甜美嘅笑容同偶爾自然嘅撒嬌好快就吸引咗李雨揚嘅注意，成日傾計嘅兩日慢慢就日久生情

李雨揚會特登去等清菁放學，同佢一齊番屋企；清菁亦會約李雨揚食飯，同佢一齊發掘新事物

但就算一切睇起嚟係咁美好，佢地最後都係因為冇講清楚嘅原因分開⋯係難過、係不忿、係遺憾⋯但冇人願意放低面子去挽回

「呀！」李雨揚唔小心㩒咗心心比like，佢即刻撤回紅心，「唉⋯」





李雨揚將手機嘅通知版面拉落嚟，見到張萱淇嘅message通知

「我冇對其他人咁好」李雨揚喺過咗半個鐘之後回覆張萱淇嘅message

⋯

「淇淇你⋯琴晚冇瞓呀⋯？」邱茗然望住張萱淇一直喺度恰眼瞓，有少少擔心

「嗯⋯我5點先瞓⋯」張萱淇緩緩點頭，用手輕拍自己嘅臉頰，「最衰就係個中央空調⋯打比我又唔講收線⋯」





「咁你cut佢線呀～」邱茗然直接笑道，「眼瞓就瞓呀～做咩仲要逼自己聽佢電話？」

「因為⋯我想聽落去⋯」張萱淇原本已經因為疲倦而無神嘅雙眸，宜家睇起嚟更加黯淡無光，「想知道佢點解咁緊張人地提佢個ex⋯」

邱茗然望住張萱淇失落嘅表情，佢都唔知道要點樣開口去安慰佢先啱⋯

「佢好似真係好中意佢個ex，唔知佢個ex⋯係咩人⋯」張萱淇托着下巴，手指一直喺枱上畫睇唔到嘅圈

「你就唔好唔開心啦⋯」邱茗然小心翼翼咁開口安慰道，「今日lunch係閃避球比賽，你唔係話想睇咩？我陪你睇呀～」

「嗯⋯都係你最好～」張萱淇點點頭，一臉委屈咁望住邱茗然

⋯

「嘩—」





「兩班啲人都好勁！」

「不分勝負咁癲㗎咩！？」

喺球場嘅觀眾們睇到嘩嘩聲，今日係E班對C班，兩班以每邊十人開始，但只淘汰咗兩人嘅狀態喺場上僵持咗成六分鐘

「左邊左邊！」「中咗佢啦！」

C班嘅人掉嘅球速度好快，而且精準度高，一拎到波就即刻跑前，基本上個波喺佢地手上只停留一秒

但E班嘅人面對對面嘅高速球時穩固咁接球，然後以最快嘅速度瞄準將排球掉出去

「啪！」「啪！」





球場上最明顯唔斷嘅係接球嘅聲音，兩班都唔讓對方半步一直僵持住

「你個friend著住外套係咩事？」張萱淇拉一拉邱茗然嘅手以無法理解嘅語氣細聲講道

「呃⋯」邱茗然只可以無奈咁笑一笑，因為除咗呢個反應，佢都唔知可以講咩

邱茗然望住喺場上嘅殷書賢，其實佢有啲意外，畢竟殷書賢唔似會參加呢啲活動嘅人

「佢居然會玩呢啲⋯？」邱茗然嘅目光落喺殷書賢身上，「真係有啲意外⋯」

「點解對面啲人咁癲⋯仲接到波⋯？」張思群以備戰嘅狀態微蹲着，佢都已經喘晒氣

對方嘅王牌一下子就穩穩咁接住咗張思群掉嘅排球，然後迅速瞄準最近佢而且最大機會掉得中嘅人

「估下會係邊班贏呀嗱！」張萱淇緊張咁捉住邱茗然嘅手，「佢地唔係打算打持久戰呀嘛？」





「好難講，E班好似都好勁，但我地班有王牌喺度都唔弱⋯！」邱茗然都有啲緊張，佢都好想知道呢場比賽會係邊班贏

「謝澤謙！」趙遠寧見對方瞄準謝澤謙頓時大嗌一聲

「啪！」謝澤謙捉住朝住佢飛過嚟嘅排球，然後朝住對面企喺最邊嘅位置嘅人掉去，「打中！」

E班見打中C班嘅人，即刻高興咁握一下拳，但比賽未完結，仲未可以放鬆

轉個頭C班嘅人又打中E班嘅幾個人，兩班嘅人因為體力都開始下降而令反應唔及一開始快

「每邊剩4個啦⋯！」邱茗然同其他觀眾一樣變得更緊張，「場外面嘅鬼愈嚟愈多⋯」

C班嘅主力王牌快速咁計算打量一下，然後將個波一個直線掉出去，E班剩低嘅四人即刻兩邊退開





E班除咗殷書賢同趙遠寧，場上仲有另外兩個男同學喺度；C班企場邊嘅「鬼」接住王牌掉過嚟嘅波，E班嘅人即刻後退拉遠距離

「係佢！」手上拎住波嘅「鬼」一眼就望到四人之中離佢最近嘅殷書賢，毫不猶疑咁將個波掉向佢

「殷書賢！」趙遠寧行開嘅同時大嗌殷書賢提醒佢留意，殷書賢喺個排球飛到埋嚟嘅時候微微座低個人將個波喺自己小腹前接實

「掉佢呀！」企喺佢隔離嘅男同學即刻指住C班嘅王牌，「快啲！掉佢！」

殷書賢捉住排球跑前兩步同時儲氣，喺行到最近嘅位置嗰陣向前踏一步，奮力將個排球掉向王牌嘅所在位置

「呀！」「嗖⋯啪！」

企場外嘅謝澤謙跑唔切去接波補刀，個波亦冇打中王牌，因為佢反應迅速咁避開咗

排球直往後飛，狠狠咁打到牆上，但場上、場外嘅人都呆咗一呆，因為個波差啲打到觀眾

「你死啦殷書賢⋯」趙遠寧即刻低聲對殷書賢講道




IG Link: https://www.instagram.com/nd_cotttoncandy/?hl=zh-tw