【校園】想成為您的治癒: 56. 機會卷
邱茗然提起手摸一摸自己嘅耳仔，然後微微張開口、忍唔住瞪大眼、呆呆咁望向殷書賢
啱啱個排球就喺佢耳邊「嗖」一聲飛過然後打到後面嘅牆上，佢忍唔住嗌咗一聲
殷書賢都呆咗一下，謝澤謙佢地幾個即刻望一望殷書賢，但裁判好快將個波交番去C班手上，佢地冇時間發呆，因為佢地要贏
「你有冇事呀？」張萱淇緊張又擔心，佢探頭望一望邱茗然嘅右邊耳仔
「冇⋯」邱茗然嘅心都未平靜落嚟，啱啱真係嚇咗佢一跳就真，「嚇、嚇死我啦⋯！」
「嗶嗶—」喺最後以C班打中E班嘅最後一人勝出呢場比賽
「換衫⋯！」張思群拎起衫領抹汗
佢地行到場邊拎起放喺場邊嘅袋準備去更衣室換番校服
「番課室啦～」張萱淇拉一拉邱茗然嘅手，「我地班贏咗～」
「耶～」邱茗然伸出手同張萱淇give me five
「你真係冇嘢呀？冇打到你呀嘛真係？」張萱淇都係有啲擔心，特登由左邊行到邱茗然嘅右邊撥開佢嘅髮絲再望一眼
「冇呀冇呀～」邱茗然笑一笑搖頭，「只係嚇到我個心噗噗跳！」
「冇事就好啦～」張萱淇鬆一口氣一樣笑起嚟
邱茗然同張萱淇拖住手離開籃球場之際，邱茗然回頭朝住喺場邊拎好嘢起行去更衣室嘅殷書賢，但好快又將視線收回
「你唔洗同人道歉呀？」謝澤謙咁啱望到邱茗然望過嚟便問殷書賢一句
「係囉，你個強力球差啲打到人，你點都要道個歉掛？」張思群用手肘撞一撞殷書賢，仲要陰陽怪氣咁講，「小心人地嬲咗你呀～」
「轉頭見到佢先。」殷書賢微微點頭，佢都覺得差啲打到人唔係幾好意思
⋯
「冇背嘅就自己企起身啦⋯」Miss Tong喺開始叫大家背書前先講道
班上冇背書嘅人真係自動自覺咁企起身，大家見到起身嘅人都笑咗出嚟，又係嗰啲常客
「仲笑仲笑！冇背書仲夠膽咁自豪咁起身！」Miss Tong望住企起身嘅人又嬲又好笑咁講道，「番去抄書啦！抄兩次聽日交！」
「我唔抄會點？」其中一個男同學作死問Miss Tong
「你聽日留堂抄。」Miss Tong微笑道，「其他人自己執生啦陣間，因為有人冇背，次序亂晒啦。」
「吓～」有背書嘅人即刻一臉愁容
「冇計啦～由最角落頭開始。」Miss Tong冇打算對佢地寬鬆，只係無奈聳肩然後示意開始
佢地班嘅上堂氣氛一直都唔錯，有時咁樣笑下都可以令大家精神啲開心啲，上堂嗰陣自然就會專注啲，有時認真一陣又笑一陣咁樣就上完一堂
放學之後，謝澤謙佢地同殷書賢行到後梯，不過佢地係喺呢個位置分別，殷書賢會上去圖書館，而張思群就番屋企，謝澤謙同趙遠寧就因為陣間仲有物理補課所以只係送佢地嚟呢度
「多謝你送我地到呢度喎，番地獄補課啦。」張思群露出惡魔微笑講道
「你又去圖書館？」趙遠寧望向殷書賢
「嗯。」殷書賢微微點頭，畢竟佢寧願喺圖書館都唔太想番屋企溫書
「你咁努力會將我地拋離太遠⋯」謝澤謙搖搖頭
「你地努力追上嚟。」殷書賢講完就踏咗一級行咗一步
「學霸係囂張啲㗎啦⋯」張思群無奈咁講道，然後行落樓梯，「走啦拜拜～」
殷書賢去到圖書館呢靜到得冷氣聲嘅地方時，佢發現只有自己坐開嘅位置空咗出嚟，但佢嘅牆邊位隔離坐咗邱茗然喺度
「都太逼啦掛⋯」殷書賢小心咁坐咗入去，邱茗然抬頭望咗佢一眼，然後又靜靜地自己做功課
「你快啲同人道歉，差啲打到人。」
殷書賢拎晒功課出嚟之際諗起今日喺閃避球比賽之後謝澤謙佢地講嘅嘢，殷書賢望一眼邱茗然，就喺度諗要點樣開口同邱茗然道歉先唔會顯得咁尷尬
喺一個快速嘅思考後，殷書賢打開自己嘅功課簿，喺角落頭寫：「你有冇功課唔識做？」然後將簿往邱茗然嘅方向微微推一下
邱茗然感覺到有嘢撞咗佢隻手一下，下意識望一眼就見到簿上角落頭寫嘅嘢
「冇呀」邱茗然喺功課file中拎咗疊黃色嘅memo出嚟寫道，然後撕落嚟貼到自己同殷書賢中間嘅位置
「有冇啲咩可以冇咁尷尬咁道歉嘅方法⋯？」殷書賢有啲苦惱，但眼見邱茗然冇功課唔識，佢好難開到口道歉
邱茗然見殷書賢好似有啲欲言又止一樣，撕下memo寫上一句「做咩打算教我咁好人？」之後又貼回原位
「今日差啲打到你唔好意思」殷書賢喺紙上寫道，佢諗唔到原因所以直接講出意圖
「唔緊要呀～冇真係打到我，雖然真係嚇一嚇」邱茗然笑一笑然後寫道，「嗖一聲喺耳邊飛過」
「抱歉萬分」「唔緊要～強力球好勁！！！」
「真係冇唔識嘅功課？」「冇呀，今日冇數學做」
「冇得計數，好可惜」「唔可惜囉！」
「做數可以鍛鍊大腦」「大腦我有⋯」
殷書賢好似都諗唔到點答，只係喺望到紙上嘅字後嘴角微微上揚一下；邱茗然諗咗一諗，然後靈機一動一笑，喺memo上寫：「咁呢個機會卷我留番下次用得唔得？」
「你決定」殷書賢睇到之後寫到，佢覺得呢個女仔有時有好多鬼主意一樣好有趣
「收起呢張紙先～」邱茗然邊細細聲咁講，邊用螢光筆highlight咗最後兩句，然後將張紙貼喺自己嘅schedule book入面
「驚邊個會唔記得走數⋯？」殷書賢望住邱茗然嘅舉動有啲無言，但不自覺咁露出又淡又唔明顯嘅笑容
IG Link: https://www.instagram.com/nd_cotttoncandy/?hl=zh-tw