【校園】想成為您的治癒: 60. 被偏心
喺邱旻顥番嚟嘅時候，一推開屋企門就察覺到今日嘅氣氛異常
「番嚟啦？」爸爸回頭望去見邱旻顥閂門
邱旻顥輕皺起眉頭探頭望下喺廚房嘅媽媽，又望一望緊閉嘅房門
「咩事呀⋯？」邱旻顥用口型問坐喺梳化嘅爸爸
「佢地，嘈交。」爸爸即刻用口型加手勢比劃，避免咁大聲講出嚟令大家更尷尬
「點解？」邱旻顥一臉訝異行到梳化邊低聲問道，「咩事？」
「你媽太偏心，又喺度比較，妹妹駁咗兩句。」爸爸指一指廚房，又指一指睡房，「兩個都發緊脾氣。」
「哦⋯」邱旻顥微微點頭，然後行到房門前敲門，見冇反應就直接開門
「你番嚟啦？」邱茗然淡然咁回頭望一眼，就好似平時一樣
「有冇人想食糖水呀？今日買咗豆腐花～」邱旻顥提手示意
「我食！」邱茗然即刻舉手回頭望邱旻顥，「多謝哥哥！」
「嗱。」邱旻顥將糖水放到書枱上，然後拆開膠袋上嘅結，將入面嘅紅糖同匙羹拎出嚟
「耶～」邱茗然就好似平日一樣冇異樣，邱旻顥坐喺一旁觀察住佢嘅表情，仍然係開心食糖水嘅邱茗然
「食完唔好發脾氣啦⋯」邱旻顥起身拎起放上格床嘅衫褲，喺去廁所沖涼前伸手輕輕拍咗邱茗然嘅頭頂一下
邱茗然望住邱旻顥行出房閂埋門，佢回頭望住自己眼前嘅豆腐花扁起嘴，唔係佢想發脾氣，只係媽媽偏心得太明顯又一直拎佢地做比較
邱茗然望住眼前嘅宵夜，佢唔會怪佢嘅哥哥，因為佢知道佢嘅哥哥係真心好錫佢，所以呢啲家庭事唔會影響到佢同哥哥嘅感情
「豆腐花好好食⋯」邱茗然將一啖沾滿紅糖啖面嘅豆腐花放入口中，「好彩哥哥永遠偏心我多啲⋯」
⋯
「早晨～」「早晨。」
邱茗然一如既往咁喺上到巴士之後搵到殷書賢，主動咁同佢打招呼；殷書賢似乎都已經習慣喺朝早番學嘅巴士上見到邱茗然
「唉⋯今日有數學class test呀⋯」邱茗然嘆一口氣冇自信咁講道，「你地班test咗未？」
「琴日test咗。」殷書賢望住邱茗然手上拎住嘅數學書回答道，然後望向窗外
「難唔難呀？」邱茗然聽到之後即刻就好奇起嚟
「Okay啦，都偏簡單。」殷書賢講道，對佢嚟講份卷又真係幾簡單，「class test唔會難得去邊。」
「係咩⋯」邱茗然冇自信咁扁起嘴，喺殷書賢又一次撇開臉望向窗外嘅時候，邱茗然發現佢今日冇戴耳機，「你今日冇戴耳機，好少見你搭車嗰陣會冇聽筆記。」
「唔係，我聽緊。」殷書賢將頭往右邊擰，示意自己嘅左耳有戴耳機
「你真係可以分到心聽筆記咩？唔覺落車嘅提示聲會影響到咩？」邱茗然微微側一側頭望住殷書賢問道，「可以一心二用到呢個地步？」
殷書賢諗咗一諗，然後先望住邱茗然微微點頭：「嗯，可以。」
殷書賢往左邊轉頭望向窗外，邱茗然將殷書賢由頭到腳打量一次，佢手上明明拎住數學書，但對數學一啲興趣都冇嘅邱茗然完全唔想望數學書一眼
「原來佢都幾高⋯」邱茗然默默打量，然後自己企直個人，「呢個身高一定過175啦⋯淇淇都170，但佢好似高過淇淇好多⋯」
邱茗然挺直腰桿企直，殷書賢嘅餘光都係可以見到邱茗然忽然奇怪嘅行為，心入面默默地講咗句：「做緊啲咩奇怪嘢⋯」
「你幾高呀⋯？」邱茗然目測打量咗一陣之後都係揀咗開口問
「182。」殷書賢回答
「182⋯咁咪高我成20cm⋯」邱茗然喺心裏愕然地道，「突然覺得自己好渺小⋯」
「你好矮。」殷書賢望住邱茗然沉思嘅模樣淡家咁緩緩開口
「我咩都冇講你做咩要攻擊我！？」邱茗然輕皺起眉頭擺出可憐嘅樣望住殷書賢，「我只係對你嚟講比較矮咋嘛⋯！」
殷書賢露出淡淡嘅笑容，對佢嚟講邱茗然真係唔高，可能對其他女仔嚟講邱茗然嘅身高算好平均，但對殷書賢嚟講就係矮
⋯
C班數學堂，小測
邱茗然嘅原子筆猶疑不決咁喺紙上寫低答案，然後掀去下一頁，踏入乙部後面嘅題目
「講緊啲咩⋯」邱茗然望住題目，大腦開始空白，「好似火星文⋯」
數學完全唔係佢拿手嘅科目，基本上數學對唔識數學嘅人嚟講，就係一埋識嘅中文或英文字，加上一堆好簡單而明嘅數字，成為世上最難明嘅新語言
「做下一題先⋯」邱茗然嘅目光由上面嘅題目移到下面嘅題目，「咁難嘅⋯上面嗰題做咗a part先⋯」
邱茗然拎起cal機，比起b part，佢有信心做a part多啲，至少寫a part嘅時候都比較肯定
邱茗然抬頭望一望時間，仲有20分鐘左右，佢唔擔心做唔切，因為佢睇到後面嘅題目，似乎都唔太識，最多都係做到a part
「呢個⋯上次殷書賢係咪講過類似嘅題目要點做⋯？」邱茗然掀頁做下一題，一望到題目佢就記得大概要點計，「試下計唔計到先⋯」
「叮噹叮噹⋯叮噹叮噹～」
「啱啱你識唔識做呀？」張萱淇拎住西史書走向邱茗然嘅座位
「最後唔識，淨係計咗a part。」邱茗然將memo撕落對摺放喺櫃桶擺筆袋嘅位置
「你搞掂未呀？」張萱淇問道
「搞掂啦⋯」邱茗然從櫃桶拎出西史書同筆袋後行離座位，「行啦～」
邱茗然同張萱淇踏出課室向左邊行，殷書賢同張思群就喺E班行過嚟，行入C班班房；邱茗然瞄咗殷書賢一眼，殷書賢同邱茗然對望一眼，邱茗然朝佢微微一笑就從佢嘅身旁同張萱淇一齊行開去上堂
殷書賢行到邱茗然嘅座位拉開櫈坐低，喺佢要擺筆袋喺櫃桶嘅時候，眼尾瞄到放喺櫃桶、對佢嚟講好顯眼嘅memo紙
IG Link: https://www.instagram.com/nd_cotttoncandy/?hl=zh-tw