【校園】想成為您的治癒: 61. 喜歡的類型
「寫咩比我⋯？」殷書賢一睇就知邱茗然係寫咗嘢比佢，平時邱茗然有嘢寫比佢都會將memo紙對摺放喺呢個比較當眼嘅位置
殷書賢拎起memo紙放喺自己面前，當佢打開咗一半嘅時候，張思群忽然拍佢：「有冇多支筆？我呢支冇墨⋯」
「嗯？」殷書賢嚇咗一跳，即刻將memo紙朝自己嘅懷裏收同時回頭望向張思群，「你要原子筆？」
「嗯，係呀。」張思群講道，「做咩嚇一跳咁？肯定又諗緊啲溫書嘢入晒神啦⋯」
「嗱，筆。」殷書賢喺筆袋拎咁支原子筆遞比張思群
「唔該，陣間落堂還番比你。」張思群接過筆後道，然後打開Bio書準備上堂
「比佢嚇死⋯比佢知仲死⋯」殷書賢啱啱比張思群咁樣嚇一嚇，心都未平靜番落嚟
殷書賢打開手心，今次佢嘅雙手雖然未到貼住自己嘅身嘅狀況，咁樣嘅話太明顯，所以佢嘅雙手只係比啱啱近自己多啲咁打開張memo紙
「同你講個好消息，多得上次你講咗類似嘅題，我識計乙部最後一題嘅b2題～」
「多謝學霸上次嘅解題」
殷書賢睇到後輕輕一笑，然後拎起筆喺memo紙上寫道：「恭喜你，咁c題有冇解到？」然後佢將memo摺番好放喺筆袋後面嘅位置
邱茗然喺落堂番到嚟課室之後番到埋位，第一時間留意自己嘅櫃桶有冇嘢
「冇嘢喺櫃桶邊⋯」邱茗然望向櫃桶，見到本來放喺最外面嘅紙唔見咗，佢坐低喺位，將書放入櫃桶嘅時候，順便咁伸手朝櫃桶入面摸，「喺度⋯」
邱茗然喺張萱淇行嚟搵佢前打開張紙睇下殷書賢留咗啲咩答覆比佢
「佢似乎關心我有冇做到c part多啲⋯」邱茗然無奈咁笑一笑，將紙對摺番好
「行得未⋯咦～」張萱淇喺邱茗然摺緊將memo嘅時候行過嚟，望到邱茗然手上嘅紙，佢即刻露出笑容，「你地原來仲有寫紙㗎～」
「咩呀～行啦食飯啦～」邱茗然將紙放到筆袋，嗰日佢寫嘅機會卷已經比佢貼咗喺schedule book入面
「你地宜家係唔係熟咗好多啦？」張萱淇想食花生，關於戀愛話題嘅花生就更有興趣，好朋友嘅就一定要知，「應該係啦～」
「唔⋯我唔知我地叫唔叫好熟，不過好多時都會喺圖書館見到，我有嘢唔識都問佢，佢都會教我⋯」邱茗然思考咗一陣後以唔肯定嘅語氣回答，「都會傾下計囉～但又唔係好熟嗰種⋯」
「好想知你地平時講開啲咩～」張萱淇笑問道，「殷書賢比人嘅感覺都係中意讀書嗰種⋯」
「佢係真係中意讀書⋯！對讀書以外嘅話題佢真係唔多嘢講！」邱茗然絕對認同張萱淇所講，「講讀書嘅話佢真係惡魔嚟⋯！叫佢教我數學佢真係解完題就算，提示都唔比！」
「咁點算呀？」張萱淇問道，「佢見你一直計錯會唔會唔耐煩？」
「又唔會，做數學應該係佢嘅興趣之一⋯」邱茗然一臉無奈，稍作回想，好似都冇見過殷書賢唔耐煩嘅表情，「佢又唔會唔耐煩，佢會問番我知唔知自己計緊咩，然後問我點解嗰個位會咁計，我再唔識佢會引導一下⋯」
「有耐性嘅男仔好正～」張萱淇對邱茗然豎起手指公比個like，邱茗然無奈咁笑着搖頭，「不過同佢拍拖應該會好悶⋯行程應該唔係溫書就係去溫書嘅路上⋯」
「咁樣嘅話佢應該唔啱同普通女仔拍拖。」邱茗然笑言，「佢完全唔似嗰種對拍拖有興趣嘅人，佢應該會覺得比起戀愛，讀書更有意思。」
「咁會單身一世。」張萱淇呢種想拍拖嘅人，完全唔想要單身，對佢嚟講戀愛係美好嘅，「而且佢完全唔似你中意嗰類呢～唉～冇得食花生添～」
「吓⋯？你講咗去邊？我從來都冇講過我對佢有嗰方面嘅意思，你諗多咗啦～」邱茗然伸手輕輕咁拍一下張萱淇嘅額頭，「我唔係你，日日都諗緊戀愛嘢⋯」
「咁不過有啲嘢好難講嘅～宜家唔係可能將來係都唔定㗎嘛～」張萱淇搭住邱茗然嘅膊頭，佢望向佢地行緊去嘅餐廳微微抬一抬下巴，「睇下～緣份就係咁簡單～」
邱茗然望向餐廳，見到殷書賢佢地幾個都係食嗰間餐廳，佢地早一步推門行入餐廳
邱茗然無奈咁望一望張萱淇，佢都知道張萱淇一講呢啲嘢就上腦，但邱茗然又唔會話好介意張萱淇講呢啲
「行啦行啦～去捉住你嘅緣份啦！」張萱淇興奮咁拉住邱茗然小跑起嚟，跑到去餐廳推門入去
邱茗然同張萱淇坐嘅位置喺佢地四個男仔嘅後方，張萱淇坐喺近走廊嘅位置，邱茗然坐喺入面
睇完餐牌決定好食咩嘅殷書賢等埋佢地先點餐，坐佢對面嘅謝澤謙同趙遠寧仲睇緊餐牌，討論緊食咩
「睇下食咩先⋯」張萱淇掀緊餐牌
邱茗然斜着坐托住下巴睇餐牌，喺呢個角度都可以望到殷書賢，落堂後嘅殷書賢冇戴眼鏡，少咗一份學霸嘅氣息，亦冇戴咗眼鏡之後睇起嚟咁斯文
「茗然你食咩呀？」張萱淇邊睇餐牌邊問邱茗然，佢仲猶疑緊要食咩
「餐蛋飯～」決定好嘅邱茗然將餐牌合埋
邱茗然同張萱淇都決定好食咩之後，兩人就落單點咗餐，喺等餐嚟嘅時候，邱茗然無所事事周圍望下，目光又不自覺咁望向後殷書賢
殷書賢同謝澤謙唔知講咗啲咩，然後微微點頭，喺佢向後靠番住櫈背嘅時候，佢嘅目光偶然同邱茗然對上
邱茗然對殷書賢側着頭微微一笑，殷書賢嘅嘴角只係以小幅度嘅上揚作回應；邱茗然忽然靈機一動，朝殷書賢拎起手機指咗一下
「見學霸教我咁好，順便講你知」邱茗然喺IG send咗個message比殷書賢，「c part計唔到答案，計到無盡小數」
兩人嘅對話框嘅第一個message係同讀書有關嘅內容；邱茗然望住殷書賢拎起手機，見到佢嘅message快速咁睇完，然後抬眼同邱茗然對望咗一眼
IG Link: https://www.instagram.com/nd_cotttoncandy/?hl=zh-tw