【校園】想成為您的治癒: 63. 好朋友

「哦⋯多謝喎～」張萱淇先係愕然，然後欣然接受，隨後又瞇起雙眼懷疑起嚟，「做咩突然咁講？想點呀你？」

「冇呀～就係一番比較之後覺得同你相處起嚟最舒服啫～」李雨揚笑道，可能張萱淇聽完會懷疑，但呢句係李雨揚嘅真心話

「渣男發言⋯！」張萱淇指住李雨揚講道，李雨揚一手撥開張萱淇嘅手

「飲完就行啦，去補習。」李雨揚遞咗張紙巾比張萱淇同時拎起書包示意起行

⋯





「嘟—」「嘟—」

邱茗然行上車朝入面行去，未上車佢就發現今日企喺放輪椅嘅位置嘅角落頭唔係殷書賢

「仲以為今日會見到佢添～」邱茗喺喺心裏講道，然後企喺走廊近上車嘅位置

喺巴士駛咗兩個站之後，邱茗然望住門口睇下有邊個上車；車門抗開，邱茗然望到許洛霏

「早晨～」邱茗然喺許洛霏拍咗卡之後伸手拍咗佢一下





「嗨～早晨⋯」許洛霏嘅身後有人行過，佢企近邱茗然借位比人行，「今日見到你啦～好少會撞到你～」

「小心⋯」邱茗然伸手扶一扶許洛霏，「有時追到車就追，追唔到就下一班。」

「琴晚有冇睇我send比你嗰個？好唔好睇？」許洛霏問邱茗然，「我覺得兩款都唔錯～」

「我覺得啡紅色嗰個袋靚啲。」邱茗然打開許洛霏琴晚send比佢嘅網店link，「雖然象牙白都幾好睇，但宜污糟囉⋯」

「咁我就買啡紅色啦～信你嘅眼光～」許洛霏笑一笑





「話說琴日我睇到呢個，唔記得咗send比你⋯」邱茗然又開咗另一間以首飾為主嘅網店比許洛霏睇，「我見你上次話中意呢類，咁啱又見到⋯呢個⋯」

邱茗然同許洛霏因為之前陸運會一齊做工作人員嘅關係所以熟咗少少，後來又因為一樣讀地理，調位之後兩人嘅位置近咗，講嘅嘢都多咗

兩個人宜家多數都係私下聯絡，喺IG見到靚嘅嘢、好似係對方中意嘅嘢嗰陣都會順手send比對方

「呢隻幾好睇⋯係開口戒添喎⋯」許洛霏湊近邱茗然同佢一齊睇手機，「有咩色⋯？」

許洛霏怕企唔穩，手一直輕力捉住邱茗然嘅手

當巴士駛到站嘅時候，邱茗然行去平時買開早餐嘅小店，許洛霏跟喺佢身後一齊去

「平時你都會買早餐㗎？」許洛霏問道

「間中啦～不過最近都冇特登過嚟買早餐⋯」邱茗然搖搖頭，最近佢一直都撞到殷書賢，所以都冇買到早餐就直接番學校，「你洗唔洗食？」





「唔洗啦～」許洛霏搖搖頭，但諗咗一陣之後，佢都係決定要食，「都係食啦～」

「茗然！」張萱淇見到邱茗然買緊早餐，直接就飛奔過去攬住邱茗然

「嚇死我⋯！」邱茗然拍一拍自己心口，「一大清早就嚇人⋯！」

「嘻嘻～耐冇見你嘛～」張萱淇鬆開手，佢宜家就見到許洛霏喺邱茗然旁邊，「你地一齊嘅？」

「搭車咁啱撞到～」許洛霏微微一笑講道，同邱茗然一樣拎咗份餐蛋治，「萱淇洗唔洗食嘢？」

「淇淇唔食餐蛋治～」邱茗然代張萱淇回答

「餐蛋治好好食㗎喎！」許洛霏訝異咁瞪大眼





「我好少食三文治。」張萱淇搖搖頭，「麻麻地中意。」

「茗然，咁你睇下要邊隻，我地夾單一齊訂呀～」許洛霏對邱茗然講道

張萱淇有啲好奇但又唔係幾好意思即刻開口問，一番到學校同許洛霏分開咗，張萱淇即刻就拉住邱茗然問

「你同許洛霏一齊訂啲咩呀？」張萱淇問邱茗然，佢終於問咗令佢心思思嘅嘢

「戒指，咁啱都係中意嘅款，又有中意嘅色咁咪一齊訂囉～」邱茗然笑道，佢下意識瞄張萱淇一眼：「淇淇又要呷醋啦⋯」

「哦⋯」張萱淇一副唔情願嘅樣，「你地幾時咁friend㗎？仲一齊買嘢添⋯！」

「咁你買唔買？」邱茗然為咗避免張萱淇發小脾氣就問佢，「我地可以一齊戴呀～你唔係中意手鏈咩？睇下有冇啱嘅款，我地一齊戴呀～」

「好啦⋯」張萱淇聽到邱茗然咁樣講佢先冇咁多小情緒，「算你啦⋯」





「你係我好朋友嘛～」邱茗然拉住張萱淇嘅手，然後挽住佢嘅手臂

「當然啦⋯！你唔可以搵其他人取代我㗎⋯！」張萱淇扁起嘴講道，佢心入面對邱茗然係自私嘅，邱茗然對佢嚟講係最好嘅朋友，佢亦最在意邱茗然嘅想法

「知啦知啦～我地淇淇係獨一無二嘅，點可以比其他人取代呢～」邱茗然輕戳張萱淇嘅臉頰一下，佢咁講絕對唔係為咗氹張萱淇，佢講緊嘅係真心話

⋯

「掀去下一頁，上面呢一段講緊⋯」

殷書賢聽住企喺電腦枱前嘅阿sir講書，班上一如既往安靜到得風扇轉動嘅聲音

「3分鐘做筆記P.12嘅第二題。」阿sir講完就㩒計時器





殷書賢睇完題目，基本上喺一秒內就落筆寫答案，佢好似有人人都想有嘅超能力一樣：望一眼題目，答案就自動喺紙上浮出嚟

「寫完⋯」殷書賢抬頭望一眼計時器，仲剩咗成分鐘，佢瞄到坐佢前面嘅同學寫咗一大段嘢，相反佢自己只係寫咗兩行半，「寫多啲又唔會高分啲⋯」

殷書賢之所以成日做住past paper，就係要熟悉評分準則，熟咗標準先唔洗嘥時間寫啲寫完但冇分嘅嘢

殷書賢順便睇埋其他題目，掀去下一頁望一望後面嘅題目；佢只係睇題目然後喺心入面答題，連墨水都慳番

「嗶嗶嗶嗶！嗶嗶嗶嗶！」時間一到，大家都習慣性放低筆

「宜家對埋答案，揀個同學拎出嚟一齊對。」阿sir最中意用呢招，避免佢地唔做課堂練習，「揀邊個好？」




IG Link: https://www.instagram.com/nd_cotttoncandy/?hl=zh-tw