【校園】想成為您的治癒: 62. 他會⋯
「救唔到，操多啲paper」殷書賢嘅回覆好有佢嘅風格
「數學係唔會背叛我，唔識就係唔識」「點考DSE？」
「靠運氣啦！！！」「操熟A1同A2，B再做到啲，穩3」
「講到好簡單，對作為學霸嘅你嚟講」「真係簡單」
邱茗然抬頭望向殷書賢，毫無顧忌咁對佢反咗個白眼，殷書賢微微聳肩
「茗然，佢咩星座⋯？」睇緊手機嘅張萱淇忽然間問道
「星座？我點⋯唔⋯」本來邱茗然仲想話唔知，但陸運會嘅事喺佢嘅腦海中閃過，「上次陸運會好似撞正佢生日，9月尾⋯應該係處女座⋯」
「處女座⋯」張萱淇即刻喺手機search啲咩，「茗然係⋯雙魚⋯」
「你又睇星座呀？唔好咁迷信啦⋯唔準㗎～」邱茗然搖搖頭，佢唔太信星座「好事就準，壞事就唔準」呢一套
「睇下咋嘛～又冇壞嘅，都係參考啫～」張萱淇星座達人上身一樣，睇完搜尋結果之後望住邱茗然露出想收但收唔埋嘅笑容
「點呀～你又睇到啲咩呀～」邱茗然沒好氣咁問，但見到張萱淇笑佢又忍唔住笑，「分享下你嘅高見？」
「雙魚座同處女座係喺性情上互補嘅星座，而且係一齊成長嘅類型⋯！」張萱淇邊睇邊講，「而且仲好易過電～」
「係咩？」邱茗然笑問道，然後開玩笑講道：「我又唔係書，唔會同佢過電囉～」
「都係嘅～唉～」張萱淇失望咁嘆氣，但下一秒佢對邱茗然單眼講道：「有咩新進展記得同我講呀～」
「嗯嗯嗯⋯」邱茗然敷衍咁點頭，佢都唔知張萱淇點解可以諗咁多，戀愛腦真係唔一樣
⋯
喺放學之後，張萱淇番屋企換完衫準備去補習
「你出門口未？」李雨揚喺張萱淇出門口前send咗個message比張萱淇，「一唔一齊去？」
「我未出門口喎，你到邊？」張萱淇回覆道
「要唔要一齊食完嘢再去補習？」李雨揚問張萱淇
「搞咩呀李雨揚⋯？」張萱淇覺得有啲意外同時又覺得好奇怪，李雨揚平時好少會約佢喺補習前食嘢
「食唔食老麥」李雨揚見張萱淇未覆又追問一句
「都得，咁喺嗰度等啦」張萱淇回覆道
張萱淇估李雨揚都已經喺外面，佢即刻就拎齊嘢出門口去同李雨揚約好嘅地方等
張萱淇獨自一人去到M記，見到李雨揚已經坐咗喺度等佢，張萱淇行過去坐低喺李雨揚對面
「到啦？食咩呀？」李雨揚嘅目光落喺張萱淇身上，「你今日番屋企換咗衫先出嚟？」
「係呀，你去叫咗先啦～」張萱淇笑一笑講道，「幫我叫杯朱古力奶昔就得啦～」
「Okay～」李雨揚爽快答應
過咗一陣之後，李雨揚拎住個餐盤行番嚟，張萱淇一手拎咗喺盤上嘅奶昔，然後比番錢李雨揚
「你今日做咩咁好死叫我食嘢？」張萱淇問出佢喺嚟嘅時候一直諗緊嘅問題，「冇約其他女咩？」
「冇⋯今日心情唔係幾好⋯」李雨揚搖搖頭，望向張萱淇苦笑道，「所以約你食飯。」
「我又唔係樹窿，你唔開心對樹窿講嘢先有用⋯」張萱淇無奈講道，但佢嘅心入面覺得李雨揚喺呢個時候揀搵自己，代表佢信任自己
「我今日見過清菁⋯」李雨揚忽然講道，都冇講前情提要就突然掉一句出嚟，嚇到張萱淇都窒咗一窒
「呀⋯？咁、咁突然嘅⋯？」張萱淇怔一怔後輕皺起眉頭，但呢個話題係介乎喺佢想聽同佢唔想聽之間，「咁⋯然後？」
「冇咩點⋯」李雨揚想露出同平時無異嘅笑容，但佢嘅難受偏偏從笑容中滲出嚟，「就冇咩特別⋯」
「明明就有⋯」張萱淇拎起奶昔，喺飲管放到唇邊前淡然地講咗句，「講嘢講一半唔講一半咁⋯」
「只係見到，佢都好似冇咩咁，所以咪冇咩特別。」李雨揚聳肩無奈咁講道
「咁你期望佢點？行上前同你講佢仲中意你？」張萱淇輕輕一笑，問出呢句嘅時候，張萱淇嘅心用力咁跳咗一下，佢垂眸望住枱面
「痴線⋯」李雨揚冷笑一聲後搖頭，「佢唔會講啲咁嘅嘢㗎，大家都知。」
「咁⋯如果佢講呢⋯？」張萱淇壓抑住心入面嘅不安感緊張咁問道，問出呢句嘅時候，佢拎住奶昔嘅右手一直微微顫動，「咁你會唔會同番佢一齊⋯？」
「吓⋯？唔會啦～」李雨揚先係下意識一怔，然後笑着搖頭，佢嘅指尖落喺汽水杯上，喺水珠間劃出一條線
張萱淇一直留意住李雨揚嘅表情，望住佢嘅表情變化嘅時候，張萱淇就笑唔出，連強擠出笑容都做唔出⋯
「佢會復合⋯嗰個女仔仲中意佢嘅話，佢應該真係會同番佢一齊⋯」張萱淇輕咬着飲管喺心裏獨自難過，「嗰個女仔可以令李雨揚一直惦記住佢⋯搞到我都好想知佢係咩人呀～」
張萱淇托住頭拎住奶昔飲，本來應該好香甜嘅朱古力奶昔都變得淡而無味，李雨揚都冇發現張萱淇望住佢，佢一直自己喺度睇手機
「做朋友好過做情侶啦⋯」張萱淇喺心裏嘗試說服自己唔好再對李雨揚有異心，「佢又唔會淨係對我一個人好，佢對所有人都好⋯我想要個淨係對我好嘅人做我男朋友⋯唉～好難搵到個咁好嘅男朋友⋯」
張萱淇望住李雨揚，佢由識李雨揚嘅時候，身邊比佢早識李雨揚嘅人都已經提醒佢唔好對李雨揚動心，因為李雨揚對所有女仔都一樣，佢係個中央空調、係公眾暖爐⋯
但感情唔係可以控制嘅事，張萱淇都只係同好多女仔一樣，跌入李雨揚嘅溫柔陷阱之中，比佢輕易咁捉到心思
「望咩呀？」「呀⋯」
李雨揚終於發現到張萱淇望住佢，佢自然咁伸手用指腹輕力咁推咗張萱淇嘅額頭一下，張萱淇嘅眉頭輕皺一下，然後用指尖輕碰自己嘅額頭
「諗緊咩？有心事就講啦，我會聽你講。」李雨揚拎住薯條指住張萱淇，睇起嚟調皮嘅舉動卻又令張萱淇感到一絲暖心
「冇咩。」張萱淇笑笑口講道，伸手拎咗條薯片放入口，「嘻嘻～你太大意啦～」
「豪比你！」李雨揚無奈地講道，佢望一望張萱淇，喺耷低頭又拎起條薯條放入口嘅時候輕描淡寫咁開口： 「同你一齊最自在⋯」
IG Link: https://www.instagram.com/nd_cotttoncandy/?hl=zh-tw