【校園】想成為您的治癒: 67. 撒謊⋯！

「食飯啦。」媽媽拉開櫈坐低，然後夾咗去煎魚餅放到邱茗然嘅碗中，「食多啲。」

「嗯⋯」邱茗然因為媽媽一個舉動，心瞬間就溫暖起嚟，佢喺心入面鬆一口氣：「呢個係媽媽嘅道歉⋯？」

邱旻顥望住佢地好似都真係冇嘢，佢都鬆一口氣，因為最近屋企嘅氣氛太尷尬

「咁樣都已經係媽媽嘅低頭道歉啦⋯」邱旻顥喺心裏鬆一口氣道

「最近番學點？啲嘢明唔明？」媽媽冇特登望邱茗然，只係邊食飯邊小心翼翼問邱茗然





「Okay啦，都係咁⋯」邱茗然抬頭望媽媽一眼，見媽媽冇望自己於是又耷低頭

「有唔識就同啲friend一齊傾下，叫人地教你，你地同輩嘅channel近啲，易明啲。」媽媽講道

「嗯⋯」邱茗然微微點頭，佢諗起佢每次有嘢唔明都會去問殷書賢，殷書賢都肯花時間教佢，「有呀⋯有人教我⋯」

「總之你比心機啦，都11月啦。」媽媽淡然地講道，「比心機考到大學。」

「嗯⋯」邱茗然點頭示意佢已經知道





雖然媽媽偏心係習慣性嘅事，但只要佢唔拎自己同哥哥做比較，邱茗然都已經覺得冇問題

⋯

「哼哼哼⋯哼哼⋯」邱茗然細聲哼着歌行去洗手間

喺經過隔離班嘅課室嗰陣，邱茗然都會好奇咁望一眼，睇下其他人做緊啲咩

「個個都喺度睇手機⋯」邱茗然經過D班嘅時候，見到番咗嚟等早會嘅人基本上都係托住頭睇手機，「D班啲人都咁早番。」





再行前幾步行到E班嘅班房，邱茗然望入去就見到殷書賢，今日佢同殷書賢搭同一班車番嚟

「一大清早就溫書咁勤力。」邱茗然見殷書賢枱上放咗本Bio書

殷書賢拎起放喺枱角嘅咖啡飲一啖，最近佢成日都唔係幾夠瞓，琴晚都唔知灘喺床望咗天花板幾耐先瞓得著

「最近好似都冇聽我媽提過讀醫嘅嘢⋯」殷書賢忽然間諗起佢媽，可能因為咁啱溫緊Bio，「不過佢唔提都係好事嚟。」

殷書賢將手從枱上移開垂低，偷偷拉起左邊衫袖搲一搲前臂；成日要著住長袖冷衫的確幾麻煩，但總好過連減壓嘅機會都冇⋯

⋯

「默書前派番上次嘅默書比你地。」Miss Li講道

Miss Li係教Bio嘅，佢平時都會定期叫大家默書，因為Bio除咗理解之外，就係背、背同埋背





殷書賢接過前面同學傳比佢嘅默書紙，拎咗自己嗰張就將其他往後傳

「全部啱晒。」殷書賢望住全剔嘅默書紙，唔洗睇分都知自己滿分

殷書賢呢一下先望去右上角，Miss Li喺右上角嘅分數下面寫住「Perfect！」，可以話係Miss Li嘅慣常做法

殷書賢嘅默書從來都係滿分，佢唔會理嗰個默書係計分定唔計分，只要係同成績有關嘅佢都會溫書

就算只係一個小測驗，殷書賢都會好在乎，會努力溫書，為咗都只係令成績同自己嘅心態保持喺同一水平

「幾分呀？我錯三個。」張思群拎住自己嘅默書紙比殷書賢睇

「滿分。」殷書賢平靜咁拎自己嗰張比張思群睇





「唉⋯我先退下啦⋯」張思群即刻坐番好喺自己位

「默書，收埋嘢啦。」Miss Li企喺老師枱前準偏派默書紙比大家

殷書賢對默書好有信心，因為佢知自己都會係拎滿分，佢從來都冇擔心過呢個問題

⋯

邱茗然一放學就去咗小食部買嘢食，番到嚟課室嘅時候手上仲拎住一包蘋果汁飲緊

邱茗然孭住書包打算去圖書館，喺行到D班窗前嘅時候，見到殷書賢喺男廁行出嚟，手從褲食抽番出嚟

「你仲喺度嘅？都⋯4點2啦喎～」邱茗然行到殷書賢嘅面前

「啱啱有嘢做。」殷書賢將衫袖拉番落嚟





「Okay～明白。」邱茗然望到殷書賢嘅舉動就明白，佢比個Okay手勢，「你係唔係去圖書館？」

「走啦。」殷書賢行入課室，孭起書包前拎出鎅刀，喺書包中拎出消毒紙巾抹一抹刀片

「哦，咁拜拜啦～」邱茗然喺佢嘅課室門口探頭望佢，對佢講聲拜拜然後就行後梯上圖書館

邱茗然上到圖書館啱啱坐低，今日牆邊嘅位置因為殷書賢唔嚟而冇人坐，位置鬆動咗

邱茗然坐喺第三個位，同牆邊嘅位置隔咗一個

「一個人霸晒成行～」邱茗然將未飲完嘅蘋果汁放喺櫃桶

邱茗然啱啱打開書包拉鍊，眼尾就望到有人喺牆邊嘅座位坐低；邱茗然朝嗰邊望去，見到殷書賢將書包除落嚟放喺櫈上





「又話走嘅⋯？」邱茗然疑惑咁皺起眉頭

邱茗然喺殷書賢坐低之後，掉咗張摺成小正方形嘅memo比殷書賢：「唔係走？？？」

「我講你就信」殷書賢好快就將memo掉番比邱茗然

「講大話⋯」邱茗然微微鼓起兩泡腮，佢冇預計到殷書賢會講大話，佢拎起筆喺memo上寫：「我比較天真:)」

本來想掉過去比殷書賢，但眼見殷書賢專心咁做緊功課，佢又唔係幾想打擾佢，於是將memo先放喺自己嘅筆袋上面




IG Link: https://www.instagram.com/nd_cotttoncandy/?hl=zh-tw