【校園】想成為您的治癒: 68. 口袋
殷書賢做完一份功課，佢睇一睇自己嘅功課file，喺心入面輕呼一口氣：「仲差份LS essay⋯做埋先⋯」
殷書賢將眼鏡往上推，伸手捏着鼻樑令自己冇咁攰；邱茗然見殷書賢短暫休息，拎起筆袋上嘅memo紙就拋過去
「有啲焗⋯」殷書賢拉兩下冷衫嘅衫領，回頭望一陣之後，佢決定將冷衫除落嚟，將冷衫掛喺佢嘅左手上，「涼晒⋯」
「噠。」memo紙準確咁落喺殷書賢嘅功課file上，殷書賢聽到明顯嘅聲音便睜開眼
佢拎起memo紙打開嚟睇，諗一諗之後拎起筆寫道：「小朋友，咁天真唔係好事」然後將memo掉番比邱茗然
「17歲嘅小朋友:)都唔小啦」「中朋友」
邱茗然望住手上嘅memo紙不禁一笑，佢望向殷書賢，有時覺得殷書賢有另一個有趣面，雖然一講讀書就好認真，但有時原來都有令人意外嘅一面
「有時真係有啲意外⋯可能因為睇起嚟唔似佢啦～」邱茗然望住memo紙上整潔端正嘅字喺心裏笑道，臉上都忍唔住掛上微笑
「寫咩好⋯？」邱茗然拎住筆望住memo紙沉思
上嚟前喺E班門口見到殷書賢， 佢拉衫袖嘅動作喺邱茗然嘅腦外中閃過；邱茗然拎起書包，喺書包中拎咗一筒糖出嚟，拎咗一粒糖出嚟，但佢先將memo紙掉過去
「望過嚟」
殷書賢打開memo見到後按紙上嘅指示望向邱茗然，頭啱啱擰到過去，邱茗然就細聲講一句：「接住」
邱茗然喺一個好短嘅距離將粒糖拋比殷書賢，殷書賢有啲手忙腳亂咗伸手接，佢雙手合埋，但喺手打開嘅時候，糖並唔喺手心
「糖呢⋯？」邱茗然朝殷書賢嗰邊嘅地下望去，但地上咩都冇，佢又拎開件冷衫望一望，但都唔見粒糖嘅跡影
殷書賢都耷低頭左望右望，但都見唔到粒糖飛咗去邊；喺殷書賢彎腰去望嘅時候，偶然瞄到自己校服裇衫嘅左邊口袋，餘光見到好似有個銀灰色嘅嘢喺入面
「喺度⋯」殷書賢將喺左手口袋嘅嘢拎出嚟，一拎出嚟就聞到好香甜嘅提子味
「喺邊呀？」邱茗然瞪大眼望住殷書賢手上拎住嘅糖
「呢度⋯」殷書賢拉一下釘咗校徽嘅口袋，佢望住邱茗然無言地笑，「眼界咁好，咁都掉得中。」
「真係㗎⋯？」邱茗然自己都覺得好神奇，粒糖咁都掉得中入口袋入面
邱茗然笑起嚟，露出開朗嘅笑容，佢嘅笑容永遠都好似太陽一樣燦爛，好似有種可以融化人冰冷嘅心一樣嘅能力，令其他人喺見到佢嘅笑容嘅時候都會跟住一齊出笑容
「快啲食！」邱茗然細聲笑道，然後將手指抵喺唇前：「噓⋯」
「圖書館唔食得嘢。」殷書賢無奈地講道
「哦⋯」邱茗然慣性咁微微鼓起兩泡腮
「陣間先食。」殷書賢講完就默默咁坐番好，拎起筆繼續做功課
「啵—」邱茗然吐出口中嘅一口氣，望向戴好眼鏡嘅殷書賢，嘴角微微上揚露出甜美嘅微笑
喺時間去到5點嘅時候，邱茗然將所有嘢收番好，佢打開寫滿功課嘅schedule book
「做晒～差一份係後日交嘅未做啫～」邱茗然細聲地講道，今日佢好滿意自己嘅工作進度，「今晚番去就整理埋份筆記就搞掂啦～」
邱茗然望向殷書賢，見到殷書賢開始執嘢，佢拉埋書包拉鍊、將書包孭到膊頭上走近殷書賢，行到兩人中間嘅空位
「你去唔去天台呀？」邱茗然細聲問殷書賢
「去。」殷書賢將眼鏡除落嚟放入褲袋，拎住書包起身
「一齊行呀～」邱茗然朝佢一笑
⋯
「喂⋯！李雨揚⋯！」張萱淇皺起眉頭望向李雨揚，李雨揚一直喺度睇手機，都冇認真聽補習阿sir講嘢，「你仲睇手機？你還番支筆比我啦⋯！」
「得得得！唔睇唔睇！」李雨揚即刻收起手機，完全冇再睇嘅意欲，乖乖坐好聽書
「你自己又唔係冇帶筆，做咩死都要借我嗰啲啫？」張萱淇不解咁問李雨揚，佢明明見到李雨揚有帶筆袋，「我啲筆就咁好用咩？」
「幾啦～你啲筆真係好用啲～」李雨揚擺出一副無奈嘅表情聳肩
「你真係好麻煩⋯」張萱淇口不對心咁抱怨，明明佢就唔介意李雨揚借佢嘅筆用
之前見到李雨揚特登買咗同佢同款嘅筆之後先再將筆還比佢，張萱淇嘅內心係開心又甜蜜，雖然成日提自己唔好比李雨揚氹到，但次次都比佢氹到
「你嫌我煩嘅你坐其他地方囉～」李雨揚講道
「我坐先，係都係你坐開啦係咪呀⋯？」張萱淇都冇佢咁好氣
「我唔要喎～」李雨揚搖搖頭，張萱淇都冇佢乎
夜晚放補習嘅時候，李雨揚同張萱淇一齊搭車番屋企，兩人坐喺上層，李雨揚同張萱淇一直各自睇手機
「今日po咗story喎張萱淇～」李雨揚見到張萱淇嘅icon有個紫紅色嘅圈圈住
「嗯⋯做咩？」張萱淇只係口答，眼都唔望李雨揚一眼，佢嘅手打緊字send緊嘢比邱茗然
「喂喂⋯呢個係你個friend呀？」李雨揚忽然間用手肘撞咗張萱淇兩下，順手將story停住問張萱淇
「係呀，做咩？」張萱淇望咗一眼之後冇猶疑啲咩就爽快咁回答，「你又唔識，問嚟做咩？」
「咩唔識？佢就係上次我話搭車見到嗰個女仔！」李雨揚嘅語速輕快，連聽語氣都聽得出佢有啲激動，「搭車借咗$2比我嗰個女仔！」
IG Link: https://www.instagram.com/nd_cotttoncandy/?hl=zh-tw