【校園】想成為您的治癒: 70. 放心吧
「唔⋯都冇煩咩嘅⋯」張萱淇心虛否認，仲要反問一句：「做咩咁問？」
「你做咩今日對住我都欲言又止咁？」邱茗然嘅直覺再加上觀察，都覺得張萱淇怪怪咁，「唔好扮啦⋯有咩咪講囉，我地又唔係唔熟。」
「唔⋯琴晚你IG係咪收到個friend request？」張萱淇遲疑咁開口問
「哦係呀，你又知嘅？」邱茗然打開IG再check一次，的確係有個follow request，「呢個囉～」
「呢個係我個補習同學⋯」張萱淇講道，佢望向邱茗然，見邱茗然好似唔太明佢想講咩之後，佢又繼續講：「佢就係上次搭車問你借咗$2嗰個怪人⋯」
「吓⋯！？」邱茗然震驚咁瞪大眼，「嗰個怪人就係佢呀？得啦得啦，我識做啦⋯！」
邱茗然即刻delete咗對方嘅request，佢本來就對佢冇咩好感，再加上，佢知張萱淇中意佢，邱茗然就更加唔會confirm request
「得啦，我識做㗎啦～冇request啦宜家！」邱茗然將自己嘅手機擰向張萱淇，「你直接同我講咪得囉～」
「琴日佢睇到我story，即刻就認到係你，平時又唔見佢咁眼利⋯」張萱淇一臉委屈咁對邱茗然抱怨道
「佢一上嚟搭訕都知佢一定係周圍識女嘅人啦⋯」邱茗然無奈表示，佢望一望張萱淇嘅表情，然後有啲猶疑咁開口：「淇淇你⋯真係對佢有好感呀⋯？」
張萱淇沉默不語，佢自己知李雨揚咩人，亦知其實咁樣好危險，但感情唔係佢可以控制嘅事⋯
「努力放低、努力放低⋯」張萱淇苦笑道
邱茗然望住張萱淇無奈咁嘆一口氣，感情事嘅嘢佢都唔擅長，畢竟佢都係表白fail咗嘅人
「遇到個真係心動中意嘅人真係好難呀⋯」邱茗然耷低頭食嘢嘅同時喺心裏慨嘆道
以前喺邱茗然心入面嘅人已經唔喺度，邱茗然冇為佢留一個位置，因為人要向前行，而且佢心入面嘅位置要留比一個更值得嘅人：值得佢中意、值得佢包容、值得佢等待
⋯
邱茗然將一疊中文堂做嘅課堂練習收齊，趁住第二個小息嘅少少時間落去樓下嘅教員室交疊
「Miss Tong吩咐嘅工作完成～」邱茗然踩住輕快嘅步伐落樓梯，抱住疊課堂練習行到一樓
邱茗然行到Miss Tong嘅簿櫃前彎腰將練習放好喺簿櫃中，企番好準備轉身走之際，就見到一個人朝後梯呢邊行緊過嚟
「睇緊咩？」邱茗然望住殷書賢拎住一份嘢正睇得入神，邱茗然直接行上前，「嗨！」
「嗨。」殷書賢淡定咁抬眼望向邱茗然，好似完全冇比邱茗然嘅突然出現嚇親一樣
「睇緊咩呀？」邱茗然好奇咁問殷書賢，佢朝殷書賢手上拎住嘅嘢望一眼，有啲失望咁扁一扁嘴，「原來係小測呀⋯」
「嗯，啱啱有題改錯咗，搵Miss Wong加番分。」殷書賢嘅聲線透露出佢好滿意加到分呢件事
「哦係呀⋯」邱茗然一臉無言，可以令殷書賢滿意嘅事，就只有呢啲事，「咁就11月啦⋯」
「嗯。」殷書賢嘅反應冷淡，佢唔太在意呢啲月份上嘅事，「過多兩個星期就12月，然後就1月，大考啦。」
「唔好咁掃興啦⋯」邱茗然一個哀怨嘅眼神抬頭望住殷書賢，「12月呀！係聖誕節呀！」
「嗯，就嚟大考要溫書。」殷書賢望住邱茗然微微點頭，「好少見你著冷衫。」
「課室開咗冷氣，好凍⋯！」邱茗然嘅雙臂抱住自己表達一下課室嘅凍，伸出雙手攤開手心空捉兩下，「凍到個人都僵晒，手都寫唔到字⋯！」
「你去咗北極？」殷書賢聽住邱茗然誇張嘅形容都忍唔住笑
「課室個冷氣真係好凍㗎！」邱茗然一臉認真咁講道，「唔係咁凍我都唔會著冷衫⋯」
「嗯，還好。」殷書賢嘅回答聽起嚟有啲敷衍
邱茗然從裙袋中拎咗筒糖出嚟，係琴日冇食晒嘅嗰一筒，佢熟手嘅將上面多出嚟嘅包裝撕走方便拎
「又有糖⋯」殷書賢望住邱茗然撕包裝嘅動作，心裏不禁有啲無奈，「日日都有零食⋯」
「食唔食呀？」邱茗然先拎一粒，左手拎住一筒糖，右手手心放咗一粒糖遞向殷書賢，「我地咁熟，唔洗客氣喎～」
「多謝。」殷書賢猶疑咗一秒後伸手去拎
「唔洗～」邱茗然笑嘻嘻咁拎一粒比自己食，拆開銀灰色嘅包裝紙就擺入口，「呢隻糖好甜好好食㗎～你唔食呀？」
殷書賢拆開糖嘅包裝紙，食咗粒糖，糖果然好甜，甜味喺口中爆發，成個人都散發住淡淡嘅糖香味
兩個人行上樓梯，邱茗然嘅步伐輕快，比殷書賢行快少少，佢回頭望一望殷書賢
「好少見你上堂以外都戴住眼鏡。」邱茗然宜家先留意到殷書賢仲戴住眼鏡
「啱啱趕住落嚟改分。」殷書賢拎起份卷望一望，「而且都就上堂。」
殷書賢感覺手都有啲痕，將衫袖拉起之後將手腕擰向自己嘅方向先再𢱑兩下；邱茗然驟眼留意到殷書賢嘅手上好似有新嘅傷痕
「仲食唔食呀？」邱茗然再次將糖遞向殷書賢
「唔啦。」殷書賢搖頭示意唔要
「我以為你食咗朱古力就冇再咩添⋯」邱茗然望向殷書賢，眼睛瞄向殷書賢嘅手
「嗯⋯習慣咗。」殷書賢嘅手微微提起，佢望一望自己嘅手
殷書賢自己都已經習慣咗呢種方式，朱古力嘅出現可以改變到佢嘅表面心情，但改變唔到佢嘅內在
「世上有咁多零食，總有一款幫到你～」邱茗然將手上嘅糖遞到殷書賢嘅面前晃兩晃，拎咗一粒遞比殷書賢
「可能啦，唔知。」殷書賢自動就伸出手接，邱茗然將糖放喺殷書賢嘅手心上
望到邱茗然笑，殷書賢嘅嘴角都會微微上揚，邱茗然嘅笑容的確有一定嘅感染力
「拜拜～」喺行到E嘅嘅課室門前嘅時候邱茗然對殷書賢揮揮手，然後就向前行番自己課室
IG Link: https://www.instagram.com/nd_cotttoncandy/?hl=zh-tw