【校園】想成為您的治癒: 71. 讀書是興趣
殷書賢行番埋位坐低，隨手就將握喺手心嘅糖放喺枱上；謝澤謙一見到殷書賢坐低，即刻攝手攝腳行到去殷書賢身旁
「你啱啱去咗邊呀？」謝澤謙撑起兩邊嘅嘴角，形成一個虛偽嘅笑容
「搵Miss Wong加分。」殷書賢一本正經咁回答
「咦～Miss Wong幾時咁好人會請人食糖㗎？」謝澤謙嘅目光好快就落喺放喺枱角嘅糖上，佢順手就將粒糖拎起，「我又食。」
「要食自己買。」殷書賢提手將粒糖從謝澤謙嘅手上拎走
「一粒糖啫～你冇咁小氣嘅～」謝澤謙特登伸手扮要拎粒糖
「自己買。」殷書賢抬頭望住謝澤謙，然後將粒糖放入褲袋
其實啱啱謝澤謙都望到事發經過，佢知道粒糖係邱茗然比殷書賢，只係對於殷書賢嘅反應有啲意外
⋯
「咁我走先啦～我地再約呀～」張萱淇喺學校門口嘅接待處前同邱茗然分別，喺臨走前佢忽然拉住邱茗然嘅手，湊近佢嘅耳邊細聲講：「有咩新進展同我講！」
「得啦得啦⋯」邱茗然無奈咁敷衍張萱淇，「拜拜⋯」
邱茗然一個人行去小食部，佢今日打算食啲嘢先再去圖書館，因為圖書館喺最頂層嘅關係，上咗去都唔想落番嚟
「我今日食咩好～」邱茗然行到小食部嘅售賣處，「食⋯餃子再加雞翼啦～」
邱茗然手拎住小食部阿姨遞比佢嘅兩袋嘢食轉身，打算去搵個位坐企食埋先走
「咦⋯？佢做咩喺度嘅？」邱茗然見到啱啱行到嚟小食部、喺其中一個位置放低書包嘅殷書賢
殷書賢身上著住PE衫，啱啱上完體育堂嘅佢打算食啲嘢再去圖書館
「佢又著住冷衫⋯」邱茗然望住好似縫喺佢身上一樣嘅長袖冷衫時不禁無奈，「上PE都要著住真係佩服佢嘅毅力⋯」
殷書賢從書包拎咗銀包離開位置，行咗兩步就望到朝佢迎面行嚟嘅邱茗然
「嗨～咁啱嘅？」邱茗然就好似講緊啲尷尬開場白一樣，但同嗰啲尷尬唔同嘅係，邱茗然好自然
「同一間學校，有幾啱？」殷書賢無言嘅感覺都寫到喺臉上
有時殷書賢真係唔太知邱茗然諗緊咩，佢嘅下一句永遠都唔係殷書賢可以接到嘅一樣
邱茗然只係笑一笑，然後喺殷書賢坐嗰張枱嘅隔離枱坐低，坐嘅方向係背對住售賣處；殷書賢買完嘢食番嚟之後坐低，位置同邱茗然嘅位置成一個小對角
邱茗然嘅手上拎住包餃子，一啖食一隻，佢望一望殷書賢，殷書賢邊睇手機邊食嘢
「你去唔去圖書館呀？」邱茗然將餃子咬咗一半，「今日。」
「去。」殷書賢望住手機微微點頭，然後先抬眼望一望邱茗然，「你唔去？」
「我？我去呀～不過今日都冇功課做啦⋯」邱茗然拎出schedule book，一臉感恩，「嚟緊都冇小測⋯太好啦～嚟緊幾日都冇test⋯！」
殷書賢將膠袋打個結，然後拎起面前嘅嘢飲，飲完就起身行出去掉垃圾，再行番嚟嘅時候先拎起書包孭到背上
殷書賢望咗邱茗然一眼，邱茗然啱啱食完
「等埋等埋！」邱茗然對殷書賢講道，然後執起兩個膠袋
殷書賢聽到邱茗然叫佢等埋，本來想行嘅佢好好人咁企喺原地等埋邱茗然，邱茗然起身孭起書包，朝住喺小食部邊邊嘅垃圾桶行去
殷書賢見佢去掉垃圾就直接向前行，邱茗然掉完垃圾就急步行追上殷書賢
雖然話喺圖書館同天台見多咗冇咁尷尬，但一齊行嘅時候，殷書賢都會喺中間留番半個人嘅距離，佢本身都唔係同女仔行得埋嘅人
半個人嘅距離，都算係熟咗好多嘅證明，只係再近嘅話就會唔慣
「哼哼哼～哼哼～哼哼～」邱茗然踏上樓梯嘅時候自然地細聲哼起歌，步伐都帶着微微跳起嘅感覺
「心情好好？」殷書賢有少少好奇
「Okay啦～」邱茗然比咗個Okay手勢，「嚟緊冇測驗係開心嘅，雖然我知對你嚟講冇測驗係好難過嘅事⋯不過對我呢啲唔中意讀書嘅人嚟講係好事。」
「我冇話我中意讀書。」殷書賢淡然講道，佢從來只係因為要考第一而讀書，但佢唔係中意讀書嘅本身
「信住先？」邱茗然瞇起雙眼望殷書賢，佢有啲懷疑殷書賢講呢句嘅真實性有幾大
「真係⋯」殷書賢無奈一笑，佢都知講出嚟都冇人信佢，「考第一同中意讀書係兩回事嚟。」
「不過一直考第一真係好勁⋯！」邱茗然笑道，佢打從心底佩服殷書賢，「我嘅話應該考完一次，下次就跌⋯」
「有時係溫書嘅方法錯咗，所以先會點溫都溫唔到。」殷書賢講道，「肯努力唔係唔好嘅事，但要用啱方法去努力先有用。」
「又係咁啦⋯一講讀書就好多嘢講⋯」邱茗然喺心裏講道，佢輕皺起眉頭望一望殷書賢，「你平時，除咗溫書，有咩做？」
「冇咩嘢做，間中打下機，都係嗰啲。」殷書賢講嘅嘢喺離開讀書嘅話題後忽然少咗好多
「哦⋯」邱茗然唔知講咩好，只好微微點頭
邱茗然默默地向前行，但又會偶爾偷瞄殷書賢一眼
「我同佢真係冇咩話題⋯」邱茗然望住地下，望住自己邁一步踏一級，「佢嘅世界好似除咗溫書就係練習題，連機都唔打得多⋯一定唔睇電視嗰啲啦⋯」
邱茗然感覺自己同殷書賢好唔一樣，自己會有想偷懶嘅心，就算考得好唔好都會想偷懶一下，攰就去休息、去煲劇、去食零食，做好多可以令自己輕鬆啲嘅事
但殷書賢呢？就算考得再好都唔會偷懶半分，永遠只為讀書而努力，攰嘅話都要繼續溫書，壓力大就鎅手⋯
「唉⋯」邱茗然忽然嘆氣，殷書賢望佢一眼但唔明白邱茗然嘆氣嘅原因
IG Link: https://www.instagram.com/nd_cotttoncandy/?hl=zh-tw