【校園】想成為您的治癒: 73. 學霸之名

「噗⋯」邱茗然喺IG見到好笑嘅嘢，佢細聲咁笑起嚟，下意識就朝殷書賢望去，「瞓咗⋯？」

邱茗然望住殷書賢，本來見咁好笑想同殷書賢分享下，等佢壓力大嘅日子都有啲快樂，但眼見殷書賢瞓咗，佢又唔想叫醒佢

邱茗然企起身行到矮牆前眺望遠處，但再遠都只係望到一幢又一幢樓，樓再高都無阻微風吹嚟

「好香⋯」邱茗然聞到淡淡嘅香味，可能係因為佢口中嘅糖傳嚟嘅香味，「唔知以後會係點呢⋯」

邱茗然望住天空不禁諗到未來嘅事，DSE會考成點？讀唔讀到大學？讀唔讀到中意嘅科？識唔識到新朋友？ 以後畢業，社會又會變成點？





「我最後會唔會都變成一個社畜上班族⋯？」邱茗然不禁諗起朝早喺街上見到嘅一個個上班族，「未來好似好遠，但又好似好快會到⋯」

邱茗然企喺矮牆咗自轉咗一個圈，邊哼着歌邊沿住矮牆邊行，佢都唔知將來嘅佢係點樣，對於將來，佢又擔心又期待

「將來嘅事將來先算啦～我都係個學生啫～」邱茗然喺心入面對自己講道

邱茗然行咗一圈之後又行留去長櫈前坐低，佢安靜地將目光投向瞓著咗嘅殷書賢

「佢好似真係好攰⋯」邱茗然喺將視線收回嘅時候默默地喺心裏嘆一口氣道





佢等待5點半嘅鐘聲響起，然後又離開學校番屋企

⋯

殷書賢除去冷衫，解開衫裇嘅衫鈕，眼睛嘅餘光望到手上密密麻麻嘅鎅痕

「唉⋯」殷書賢自己都忍唔住嘆氣，「再咁樣落去會唔會死⋯」

間中都會有呢種想法冒出，但佢唔會因為呢種想法出現而唔再用傷害自己嘅方法減壓⋯





其實好痛，第一次拎起鎅刀要鎅手嘅時候，刀片抵咗喺佢嘅手上好耐，殷書賢猶豫咗好耐

嗰種又痕又痛嘅感覺最折磨人，但殷書賢又有啲依賴呢種感覺為佢帶嚟嘅減壓效果

「死咗嘅話，我媽會燒啲書比我讀⋯」殷書賢一諗到呢度，自己都覺得可笑，「救命真係⋯」

殷書賢沖完涼番入房，坐喺書枱前掀開英文reading嘅練習題，佢已經做好準備溫書，佢每日嘅行程都一樣，年中無休

佢嘅書櫃上放滿練習題，佢為DSE準備咗好多，為咗到時達到所有人心目中對佢嘅期望、達到佢自己嘅目標，避免自己喺場上有失手嘅狀況

戴上眼鏡嘅佢進入溫書嘅狀態，因為冇100%嘅信心所以要努力走向100%

放喺架上寫住「第二名」嘅成績表係佢最唔願意回想嘅事，但亦係佢必須要記住嘅教訓

「唔夠努力嘅人先會考第二。」媽媽當初對佢講嘅說話記憶猶新，呢句說話烙喺佢嘅心入面





諗起呢句說話嘅殷書賢更努力埋頭做題，佢唔願意令家人、什至對佢有期望嘅人失望

「令人失望嘅話，太失敗。」殷書賢喺心裏堅定咁對自己講，「作為人地口中嘅學霸，就要對得住呢個名。」

有啲人揀中三開始努力、有啲人揀中四先努力、有啲人揀喺study leave開始努力，但殷書賢三樣都唔係，因為佢未曾鬆懈

「考第一，所有嘢都最優，先叫對得住「學霸」呢兩個字。」

媽媽嘅呢句說話一直影響住殷書賢，因為呢句，令殷書賢成為人地眼裏文理雙全嘅學霸

但亦因為呢句，令殷書賢變成宜家呢個有苦不能訴、滿手傷痕嘅佢⋯

夜晚12:30





「呵～欠⋯」殷書賢打咗個喊露，佢已經做咗三篇reading，答案都已經對好

一直睇字令佢覺得雙眼疲倦不堪，望住啲字都覺得眼花，大腦都開始有啲亂

「叩叩—」媽媽將房門推開少少，探頭入嚟，「唔好溫到咁夜，早啲瞓啦，聽日冇精神上堂。」

「嗯。」殷書賢低聲回答

殷書賢閂上房燈灘到床上，佢合起雙眼打算休息，但腦入面有一堆英文字喺度浮嚟浮去

殷書賢轉個身變側身瞓，但啲英文字都一直喺度，仲愈彈愈多

「做英文做咗太耐，成個腦都係英文字⋯」殷書賢又轉身向另一邊瞓，但總覺得佢嘅大腦唔想休息住

殷書賢灘平個人嘗試放鬆自己同時將大腦嘅嘢清走，等自己容易啲瞓





喺佢合起雙眼之後，大腦傳嚟柔和嘅音樂聲，係今日喺天台嘅時候邱茗然播嘅歌，柔和嘅旋律令佢感到放鬆

「真係有啲眼瞓⋯」殷書賢嘅內心默默地講道

⋯

西史堂

「比20分鐘你地，做咗a題先。」Miss望一望時鐘講道，「開始啦。」

「得20分鐘，即係唔prefer我地掀書啦⋯」邱茗然快速咁睇一次題目就拎起筆

邱茗然拎住筆嘅手快速嘅郁起嚟，原子筆嘅滾珠一直喺單行紙上快速磨擦，藍色嘅墨水一直源源不絕咁沿滾動嘅鐵珠滲出嚟





一個字又一個字好快咁又寫滿一行，字靚唔靚，寫錯字要用塗改液呢啲小事已經重要，中西史嘅考試本來就係訓練手速同對書嘅熟讀程度

「錯字⋯唔改啦⋯！」邱茗然寫錯字嘅時候，直接將字用原子筆劃去就算，喺隔離寫番啱嘅字

喺真正嘅考試中，你根本連改錯字嘅時間都唔會有，文科嘅特點就喺呢度，一切都係背書加上論點論據，同理科唔一樣

邱茗然嘅手幾乎都冇時間停落嚟，一直寫一直寫，寫到手都有啲酸軟嘅感覺

「夠鐘啦，交出嚟啦。」Miss望住時間，啱啱好夠20分鐘

「寫到手軟⋯」邱茗然捉住自己嘅手腕按摩幾下，佢望向附近嘅張萱淇，「晏晝都寫唔到字啦⋯」

「晏晝同Miss阿sir講。」張萱淇開玩笑講道，「好彩今日晏晝冇LS。」

「不幸中嘅大幸。」邱茗然豎起手指公比like

次次上完西史堂或者做完西史嘅功課之後，隻手都會攰到好似唔係自己嘅手一樣，唔計時嘅題目還好，計時嘅話手都好似摩打咁郁

喺西史堂之後係地理堂，邱茗然一早就拎埋地理書同自己一齊上西史堂；喺離開課室之後，佢同張萱淇就分開去唔同地方上堂




IG Link: https://www.instagram.com/nd_cotttoncandy/?hl=zh-tw