【校園】想成為您的治癒: 75. 「自私的」

諗起因為執到鎅刀而識到殷書賢呢件事，邱茗然不禁一笑，成件事又好笑又無奈

「如果當初執到佢把鎅刀嘅人係第二個，唔知會變成點呢⋯」邱茗然不禁諗道，嘴角微微上揚起嚟，「都唔知係佢好彩定我好彩～」

邱茗然相信人與人之間嘅相遇係有意義，所以識到嘅每一個人都會帶比佢唔同嘅體驗同想法，就好似打機儲經驗值一樣

「如果佢鎅手嘅事比人發現咗嘅話，咁會變成點⋯？」邱茗然諗到呢度忍唔住替殷書賢擔心，「學校發現嘅話，一定有社工介入，咁最後會變成我地級個個都知嘅事⋯」

雖然邱茗然答應咗殷書賢幫佢保守秘密，但殷書賢一直咁樣鎅手都唔係一個好辦法，比人發現都會好麻煩





邱茗然行到番屋企門口先停止繼續諗呢件事，畢竟佢做唔到啲咩，除咗喺感覺到殷書賢好大壓力嘅時候請佢食粒糖之外

「哎～整埋份西史份筆記先～」邱茗然將書包除落嚟

邱茗然嘅西史筆記好整齊，字體端正、重點亦用螢光筆間好，方便佢溫習用

佢習慣上堂嗰陣用另一本簿抄筆記，因為要抄得快嘅關係唔可能寫得井井有條，字都識起飛一樣，所以番到屋企佢會再寫過

「全靠你我先可以考好西史咋～」邱茗然對佢嘅西史筆記道謝，然後拎起筆準備寫番今日嘅內容入去





坐喺書枱前開住枱燈嘅邱茗然好努力咁寫好筆記，佢嘅成績可以一直喺中游，佢每科嘅整齊筆記幫咗佢好大忙

邱茗然將混亂嘅筆記內容抄番落呢一本整潔乾淨嘅筆記入面，箭嘴嘅線都用間尺畫好，如果筆記混亂反而令佢好難溫好書

⋯

「唔係咁呀⋯！」張萱淇忍唔住反白眼，佢拎起擦膠將寫喺紙上嘅字跡擦走，「李雨揚你有冇聽㗎⋯！」

「有呀，你咁教我咪咁做，跟足step㗎！」李雨揚反駁道，然後李雨揚又喺紙上寫一次錯一半嘅答案





「唔係咁呀真係⋯」張萱淇一副欲哭無淚嘅表情，佢都講咗十五分鐘，但李雨揚都係寫唔啱，「我求你聽多一次啦⋯！你真係聽清楚呀⋯！」

「好好好⋯」李雨揚望住張萱淇呢個著急但又無可奈何嘅表情笑咗一笑，「聽你講聽你講。」

張萱淇又再次耐心咁解釋一次，逐個step做逐個step講解，然後再睇住李雨揚寫，今次李雨揚終於做啱

「嘩⋯你終於寫啱啦大哥⋯！」張萱淇眼見李雨揚寫啱之後疲倦咁伏喺枱上，「好攰呀⋯休息陣先⋯」

李雨揚拎起手機睇，打開IG咁啱見到有follow request，李雨揚一睇就覺得呢幾日好似唔記得咗啲咩一樣

「喂張萱淇⋯」李雨揚伸手拍一拍張萱淇嘅手，「你個friend delete咗我request。」

張萱淇抬起頭就見到李雨揚將手機放喺佢面前，開住嘅頁面正正就係邱茗然嘅IG account

「哦⋯係咩？」張萱淇有啲心虛，佢嘅目光只敢停留喺李雨揚嘅手機螢幕上一秒，「我都話佢一定唔比㗎啦⋯！」





「你冇同佢講咩？」李雨揚卻問道

「真係為咗溝女咩理由都問得出口⋯」張萱淇喺心裏抱怨，雖然心係咁講，佢反個白眼開口：「我點知佢confirm咩人delete咩人？」

「仲話朋友，都唔幫我一把。」李雨揚裝作失望咁嘆氣，「對你好失望囉張萱淇⋯」

「我同佢friend d，唔會比你禍害佢。」張萱淇再一次因無奈而反白眼，「溝少個會死呀？」

「我又冇話要溝，識個朋友啫都係～」李雨揚微微聳肩，又一次㩒request，「咁我又冇女朋友，冇問題㗎。」

張萱淇望住眼前呢個人，完全無言以對，佢又唔係講錯嘅，的確佢係單身有選擇嘅權利

「雖然睇起嚟係真係唔錯～」李雨揚忽然一笑開口講道，「以我嘅經驗，靚女嘅朋友嘅樣都唔會差得去邊。」





「多謝～雖然你咁講但我都唔會幫你。」張萱淇聽到李雨揚咁講，佢都忍唔住笑意，嘴角毫不掩飾咁上揚起嚟

「呿⋯枉我對你咁好⋯」李雨揚搖搖頭，「你個friend都冇中意嘅人㗎啦～咁識多個朋友多個選擇唔係都係好事咩？」

「邊個話佢冇？」張萱淇腦袋一轉，隨即講出一個大話，雖然因為係假事所以有啲心虛，但佢都要當自己講緊事實，「佢⋯有中意嘅人啦⋯！你諗都唔好諗呀⋯！」

張萱淇嘅心入面覺得有一樣嘢好好彩，就係李雨揚唔識邱茗然，如果唔係，佢呢個大話就講唔成

「佢中意嗰個男仔同你完全唔一樣，你唔係佢杯茶㗎啦～」張萱淇又追加補充，「我個friend係乖乖女嚟，唔似你⋯」

李雨揚冇對呢件事表現得特別感興趣，佢只係對邱茗然有興趣，但呢件事正正係張萱淇擔心嘅事

「我絕對係為咗你好所以先要講大話，對唔住呀茗然⋯！」張萱淇喺心裏為自己講嘅善意謊言感到抱歉

「咁⋯有時你覺得你嘅理想型係咁，但事實可能又唔係嘅⋯」李雨揚充滿亮光自信嘅雙眸就喺張萱淇講完嗰句說話後黯淡起嚟





清菁嘅模樣喺佢嘅腦海中忽然閃過；清菁係佢嘅理想型，但一齊咗之後就發現所謂嘅「理想型」真係只係「理想」

「所以，唔試過又點知？」李雨揚見張萱淇望住佢嘅表情有啲愕然，即刻就笑咗一笑，變番平時嘅佢，「識個朋友冇壞，啱咪繼續做朋友，唔啱咪分，唔係咁樣㗎咩？」

「嗯⋯係咁樣冇錯⋯」張萱淇發現好似自己講咩都冇辦法令李雨揚打消念頭，於是佢又緩緩開口講道：「我幫唔到你幾多，佢自己決定。」

張萱淇望住李雨揚心情唔錯咁飲嘢，但張萱淇就只可以若無其事一樣，佢介意但咩都冇得講，亦唔到佢講

「做咩咁靜？你驚我識咗你個friend就唔理你呀？」李雨揚嘅說話輕飄飄的，張萱淇內心嘅沉重感同李雨揚嘅語氣呈相反

張萱淇以沉默作回應，佢又可以回答啲咩先顯得佢介意但又好似唔在意一樣⋯？








IG Link: https://www.instagram.com/nd_cotttoncandy/?hl=zh-tw