【校園】想成為您的治癒: 76. 薄荷糖

「我唔會咁衰嘅～」李雨揚伸手搭住張萱淇嘅膊頭，自然又親密嘅舉動令張萱淇唔識拿捏佢地之間嘅距離，「你同其他人唔一樣，唔洗擔心～」

冇頭冇尾一樣嘅說話卻令張萱淇心裏嘅烏雲散去，張萱淇喺無言一笑後講咗句：「真係搞唔明你⋯」

張萱淇悄悄地將目光落喺李雨揚身上，有時佢都會覺得中意呢個人係錯，但有時又覺得⋯同佢一齊確實係開心，可能因為佢太識講嘢

李雨揚望向張萱淇，伸手喺張萱淇嘅頭頂上輕敲一下，呢一下同時敲喺張萱淇嘅心上一樣，本來平靜嘅水面頓時出現一圈一圈嘅波紋

⋯





邱茗然手拎住地理書上車，前日突然間話嚟緊幾日有突擊小測，嚇到個個都溫書

邱茗然嘅嘴裏一直唸唸有詞，低聲背緊內容，腳一步一步小心向前行，肌肉記憶令佢唔洗望都可以行到去平日企開嘅位置

「早晨⋯」邱茗然細聲地講道，佢嘅目光仍然停喺地理書上

「早晨。」背靠玻璃企喺邱茗然面前嘅殷書賢有啲困惑：「佢係同緊我講嘢⋯？」

「嗨～早晨～」邱茗然抬起頭望殷書賢又講一次





「早晨⋯」殷書賢雖然困惑但都係揀咗回答佢嘅早晨

殷書賢提手將右邊嘅耳機除咗落嚟，邱茗然望住殷書賢指一指自己嘅耳仔：「筆記？」

「唔係。」殷書賢定睛望住邱茗然緩緩搖頭，然後將自己嘅手機螢幕亮起遞到邱茗然面前

「居然係聽緊歌⋯！？」邱茗然對呢件事好意外，「我地學霸居然唔係聽緊筆記而係聽緊歌？」

「筆記聽晒，未出新。」殷書賢回答





「哦～」邱茗然笑一笑點頭，然後從裙袋拎咗盒桃味薄荷糖，朝殷書賢一下子剔開盒蓋，「嗱！祝你今日開心～」

「多謝，都祝你今日開心。」殷書賢從褲袋拎咗盒藍色嘅原味薄荷糖，剔開盒蓋後先遞比邱茗然

「多謝！」邱茗然唔客氣咁拎咗一粒藍白色嘅薄荷糖放到口中

邱茗然拎住糖盒嘅手微微向上一提，殷書賢拎咗一粒放入口，兩個人各交換咗一粒薄荷糖

薄荷嘅味道令人好醒神，邱茗然成個人都精神起嚟；比薄荷味濃嘅桃味喺口中散發着甜甜嘅味道，令殷書賢嘅心情變得有啲愉悅

    “I sat down right at the corner of your table”

    “For some reason, I thought maybe we had been right here before”

殷書賢嘅耳機裏唔知幾時開始播緊邱茗然推薦嘅”Have we met before”，啱啱冇專心聽嘅佢發現播緊呢首歌嘅時候，歌已經播到一半





口中嘅桃味比薄荷味更濃，但有淡淡嘅薄荷味喺唔為意嘅時候滲出嚟；邱茗然微微低頭，目光停喺地理書上，邱茗然都係願意努力讀書嘅人

殷書賢望向窗外，口中嘅薄荷糖食起嚟好似愈嚟愈甜，就好似桃味將薄荷嘅味道完全覆蓋一樣

番到學校之後，謝澤謙忽然間上前拉住殷書賢嘅書包，殷書賢同邱茗然都呆咗一下之後，邱茗然就自動自覺咁加快腳步行上樓梯

「免得搞到好似我係嗰個電燈膽咁⋯」邱茗然抱住呢個想法行喺前面離殷書賢半條樓梯嘅距離

「茗然～」許洛霏小跑上樓梯追上邱茗然，行到邱茗然嘅身旁時小幅度咁回願示意，然後以意味深長嘅笑容代替佢想講嘅嘢，「早晨呀～」

「早晨霏霏⋯」邱茗然望到許洛霏嘅笑容佢都笑一笑，不過係無奈嘅笑容，「一朝早就想食花生啦？」

「冇呀～」許洛霏笑一笑，伸手就挽住邱茗然嘅手臂，「而且都唔可以話係花生，只係講下啲少女啲嘅話題。」





邱茗然同許洛霏最近熟咗好多，夜晚有時會一齊睇劇，邊睇邊討論劇情，有時睇到有意思嘅電影語錄、好睇嘅衫、好睇嘅飾物都會send比對方一齊分享下

未真係咁熟之前，邱茗然都同其他人一樣抱住物以類聚嘅想法睇許洛霏，但真係熟咗之後就發現許洛霏同佢地似乎又有啲唔一樣

「你琴晚講到一半又唔講埋落去，吊住我胃口⋯」許洛霏不滿地講道

「你琴晚都講到一半就唔講啦！」邱茗然反駁道，「你講唔！」

「喂呀唔準開名呀！」許洛霏喺邱茗然講出嗰個佢中意過嘅男仔嘅名前一秒迅速掩住邱茗然嘅嘴，「我都冇開你名！」

「咩冇呀！你琴晚一直喺度講！」邱茗然沒好氣咁笑一笑，許洛霏即刻就跑上去，邱茗然追喺許洛霏身後

兩個女仔一大清早嘅精神狀態加滿，同其他拖住腳步行、好似冇差電嘅同學相比，佢兩個根本就係電力差到滿一滿

殷書賢望住邱茗然跑上樓梯，謝澤謙默默咁留意住殷書賢嘅反應





「呢類女仔都容易吸引到人⋯連殷書賢呢啲淨係中意讀書嘅木頭都會比佢吸引到⋯」謝澤謙喺心裏估計，當然佢唔知殷書賢諗緊啲咩

就算喺佢地面前，殷書賢都好少會講自己嘅心事，幾乎係唔會講呢樣嘢，可能係性格影響令殷書賢將所有嘢都會收喺心

「琴日份M2功課你做咗未？」謝澤謙問道，佢知呢啲話題先係殷書賢會有興趣嘅話題

「做完啦。」殷書賢平靜咁講道，對佢嚟講都只係普通一份簡單嘅功課，「你未做咩？」

「未做晒。」謝澤謙搖頭，「你最近好似食好多朱古力同糖，嗰次又係拎住糖番嚟。」

謝澤謙下意識望一望殷書賢，忽然間諗起殷書賢有時會手中會拎住粒糖，或者成個人有陣糖嘅甜香

「上次？人地請。」殷書賢冇太大反應，但佢知謝澤謙講緊邱茗然，「一食開糖就成日想食⋯」





「陣間甜得滯蛀牙呀～」謝澤謙笑言

「我又唔係三歲小朋友。」殷書賢抬眼望謝澤謙後講道

「唔好太沉迷，唔似你。」謝澤謙拍一拍殷書賢嘅膊頭講道，佢講嘅嘢好似有另一層意思一樣，殷書賢亦聽得出

「唔知你講咩。」殷書賢喺一秒嘅沉默後只係淡然咁回答一句

謝澤謙對殷書賢呢個反應其實有啲意外，謝澤謙好似察覺到啲咩一樣，但佢又唔可以肯定，雖然殷書賢睇起嚟同平時一模一樣




IG Link: https://www.instagram.com/nd_cotttoncandy/?hl=zh-tw