【校園】想成為您的治癒: 80. 同樣的說話
「唔係啲咩重要事⋯但你好似真係好攰⋯」邱茗然擔心咁望住張萱淇
「冇嘢呀～真係冇！」張萱淇露出同平常無異嘅笑容
「我拎啲嘢番埋位先啦⋯」邱茗然捧住一疊書轉身行離窗台嘅位置
「哦好呀⋯」張萱淇嘅反應好似慢咗半拍一樣遲緩咁點一下頭
張萱淇回頭望向邱茗然，見到佢將書放喺枱之後朝門口行去
「應該係去toilet啦⋯」張萱淇喺心裏道
許洛霏去完洗手間番嚟，行到課室門口嘅時候同要出去嘅邱茗然碰面，本來係番嚟嘅許洛霏跟住邱茗然一齊轉身又出去
張萱淇喺呼出一口氣嘅同時微微耷低頭，望到邱茗然好似同其他人好friend嘅時候，佢心入面就會變得空蕩蕩
「哈⋯」張萱淇望向窗外哈一口氣，感覺比琴日更鬱悶，「佢地私下係唔係講咗好多嘢，所以先愈嚟愈熟⋯？連廁所都可以一齊去⋯」
邱茗然對張萱淇嚟講係佢最好嘅朋友，無話不談，但最近張萱淇覺得邱茗然好似好少搵佢⋯
「會唔會⋯本來同我講嘅嘢，佢都同許洛霏講咗⋯？」張萱淇又輕嘆一口氣，感覺兩件事加埋令佢成個人都灰濛濛一片
可能呢啲都只係啲微不足道嘅事，但眼見自己嘅好朋友好似要同其他人成為好朋友，多多少少都會覺得唔開心
「我同茗然，會一直係好朋友⋯」張萱淇喺心裏用安慰嘅語氣對自己講道
⋯
「淇淇今日真係怪怪地⋯佢係唔係有啲咩心事？」邱茗然喺上西史堂嘅時候偷望張萱淇，望一眼就覺得張萱淇同平時唔一樣
上完西史堂之後嘅lunchtime，邱茗然同張萱淇出咗去食飯，但張萱淇全程都冇咩講嘢
「淇淇，你係唔係真係冇嘢？你今日做咩呀？」邱茗然都係擔心咁開口問張萱淇，「你今日又唔多講嘢，好令人擔心⋯」
「唔⋯其實唔係啲咩事，就係有啲⋯在意囉⋯」張萱淇雖然係開口，但都係欲言又止
「你可以照直同我講㗎！我地係好朋友唔係咩？」邱茗然輕皺起眉頭，佢感覺到張萱淇嘅唔開心，亦察覺到張萱淇嘅心事重重，「我會聽你講㗎。」
張萱淇諗緊嘅嘢轉化成文字，但講到嘴邊嘅時候，佢又猶疑起嚟，支支吾吾咗好一陣之後，張萱淇先開口：「冇呀，唔識講⋯最近有太多令我在意嘅嘢，搞到我好亂⋯」
「你有心事要同我講呀⋯唔好自己一個收埋收埋⋯」邱茗然嘅上身微微前傾，對張萱淇微笑道
「你有心事都要同我講。」張萱淇笑一笑回答，喺嘴角向下塌咗一下之後又上揚起嚟道：「同其他人講嘅秘密都要話我知㗎！」
「我有咩秘密係唔講你知？」邱茗然無奈反問張萱淇，「咩大大小小嘅秘密都同晒你講啦⋯！」
「你冇同我講你最近有冇對邊個有好感！」張萱淇嘅呢句睇起嚟好似冇特別指向，但喺邱茗然聽起嚟，就覺得佢意有所指
「咩呀～冇囉～」邱茗然露出笑容搖頭，「我冇對邊個有好感囉～你同許洛霏問啲嘢都差唔多⋯」
「佢有問你呀？佢點知嘅？」張萱淇有啲愕然，明明許洛霏應該唔知先係
「有次同殷書賢一齊放番搭車比佢見到，佢就成日都問我係唔係拍拖之類⋯」邱茗然輕捏着飲管
「哦～」張萱淇點頭示意明白，下一秒嘅佢又露出好奇嘅表情，「咁所以，喺嗰個師兄之後，你就冇中意其他人啦？」
「冇呀。」邱茗然爽快咁回答，顯然係已經放低以前嘅事，「冇令我心動嘅人出現。」
「唉⋯睇嚟係你嘅初戀太強，所以宜家其他人你都睇唔入眼⋯」張萱淇托住下巴望住手中拎住嘅叉
「又唔係睇唔入眼，只係未遇到啫～」邱茗然嘅心入面其實都係同普通少女一樣會憧憬愛情，都會想拍拖，但未遇到啱嘅人，「再算啦～」
食完飯番學校之前，邱茗然拉住張萱淇去咗轉7仔
「你話今日食咩糖好？」邱茗然眼望住令人陷入兩難狀態嘅糖問張萱淇，「前日筒糖比我哥清晒⋯」
「你又食糖呀？」張萱淇先係一笑，隨即腦袋一轉笑容一變，用甜絲絲嘅語氣對邱茗然補上一句：「陣間蛀牙呀～」
邱茗然聽到後頓時一怔，臉上嘅表情都僵咗一下，佢臉上掛上淡淡嘅笑意緩緩抬頭望張萱淇：「你真係好煩呀張萱淇⋯！」
「我係善意嘅提醒咋～」張萱淇聳肩，臉上掛住「我係特登」嘅笑容
邱茗然因為無言以對，只可以無奈咁用手肘輕輕撞一撞張萱淇嘅手；雖然聽到張萱淇同許洛霏咁樣講嘅時候會好無奈，但佢唔覺得反感
「買嘢飲買嘢飲⋯！」趙遠寧行喺最前，最先行入7仔
趙遠寧最先見到企喺最近門口嘅零食架前嘅邱茗然同張萱淇，佢好快咁擰轉頭望其他人
「陣間M2堂係唔係話帶新書？」謝澤謙問殷書賢
「係呀，你冇帶咩？」 殷書賢問謝澤謙，佢因為前面一級樓梯而低頭望一眼，下一秒就朝7仔嘅方向望一望
「咦～又會咁啱嘅～」張萱淇望咗門口一眼之後低聲又細聲咁對邱茗然講道，喺邱茗然望張萱淇嘅時候，張萱淇已經係抿着唇偷笑嘅狀態
「你預習咗未？佢話今課好難。」殷書賢問謝澤謙，若無其事咁喺兩個女仔嘅身後行過跟上趙遠寧嘅步伐
「你覺得難唔難？我覺得還好囉，未難到大腦唔識轉嗰種地步。」謝澤謙打開雪櫃拎咗支茶，「你飲唔飲？」
「唔啦。」殷書賢順手幫謝澤謙將雪櫃門閂上
邱茗然拎咗筒牛奶糖，喺去比錢之前，佢朝企喺雪櫃前嘅殷書賢望咗一眼
IG Link: https://www.instagram.com/nd_cotttoncandy/?hl=zh-tw