【校園】想成為您的治癒: 81. 為你打氣
「行啦淇淇～」邱茗然回頭望張萱淇，拉住張萱淇陪自己去比錢
「我要食一粒！」張萱淇拉住邱茗然嘅手以撒嬌嘅聲線講道
「等我搣咗個包裝先～」邱茗然笑道
邱茗然同張萱淇踏出7仔，喺佢兩個行離門口少許之後，殷書賢帶住少許嘅小心回頭朝住漸細嘅交談聲望咗一眼
「行得啦。」趙遠寧經過殷書賢嘅身旁行到收銀處，謝澤謙拍一拍殷書賢嘅膊頭講道
「哦。」殷書賢轉身跟喺謝澤謙嘅身後
⋯
啱啱上完英文堂，喺緊接住嘅第二個小息裏，殷書賢起身離開座位行出課室
「睇嚟心情麻麻呀～」張思群望住殷書賢行出課室，佢輕嘆一口氣講道
「佢又覺得自己發揮得唔好啦肯定⋯」謝澤謙喺locker嗰邊行過嚟，佢望住殷書賢喺窗外走過
「其實佢成績都已經好穩定，只係今次比二姐拎咗最高分啫～」趙遠寧唔明白，佢望住比殷書賢收咗入櫃桶嘅英文reading測驗，「冇model answer嘅嘢又好難講嘅⋯」
「對自己要求太高就變成佢咁。」張思群冇原因咁伸手拍謝澤謙嘅膊頭，手就順勢咁搭喺上面，「雖然有要求係好事，但要求次次都第一就太癲囉。」
佢地幾個都了解殷書賢，呢啲基本嘢佢地都知道嘅，就算唔熟都好，都已經同班咗好幾年，唔會真係零認知
「等佢自己解決啦～」謝澤謙撥開張思群嘅手，坐低喺殷書賢嘅座位上，「佢都唔聽人講，佢應該okay。」
雖然有時見到殷書賢因為成績問題而心情唔好嗰陣，佢地都有啲擔心，但佢地都知佢地講咩都冇用
「咔、呯！」殷書賢推開天台嘅門，踏出一步行入天台嘅範圍
邱茗然手上拎住盒蘋果汁，安靜咁企喺矮牆前唔知望緊啲咩，口裏輕咬着飲管，喉嚨發出微弱嘅哼歌聲
「你喺度嘅？」殷書賢行到矮牆前，自然咁開口問邱茗然，兩人之間一如既往留有三步嘅距離
「放～風～」邱茗然以愉悅嘅聲線講道，「好少見你第二個小息上嚟。」
「嗯。」殷書賢唔知可以答咩，只好微微點頭就算
殷書賢冇講嘢，只係安靜咁企喺矮牆前面感受風，大腦一片空白；邱茗然咬住飲管，見殷書賢今日比平日更靜，佢就將目光從遠處移到殷書賢嘅身上，盯着殷書賢嘅臉
「做咩？」殷書賢感覺到邱茗然嘅視線，於是微微耷低頭不自覺咁深深吸一口氣，緩緩地將氣呼出
就算唔講，對自己失望嘅感覺冇辦法隱藏⋯殷書賢可以做到隱藏對所有大小事嘅感覺，除咗對學業嘅事
「唔⋯」邱茗然撅起嘴，發出遲疑嘅聲音
但遲疑咗好一陣都講唔到啲咩出嚟，只係安靜咁繼續飲蘋果汁；殷書賢好安靜，除咗沉默，佢都唔知可以比咩反應
邱茗然覺得氣氛好似有啲沉重，佢想做啲咩打破呢份令人有壓迫感嘅感覺
「唔⋯請你食糖呀～」邱茗然從裙袋中拎出佢喺lunch買嘅一筒糖，將裝住糖嘅內盒推出咗少少露咗條縫之後遞向殷書賢，「你拉呀～」
盒係長型嘅推拉盒設計，好似抽屜一樣嘅原理，所以只要其中一邊推出少少，喺另一邊拉就開到
邱茗然定睛望住殷書賢，殷書賢望住邱茗然臉上開朗燦爛嘅笑容，稍微猶疑一下嘅佢伸手將內盒拉出嚟
「恭喜你～今日係超香濃嘅牛奶糖～」邱茗然拎咗一盒圓形嘅牛奶糖出嚟遞比殷書賢
「今日係牛奶糖⋯你真係日日都有糖食⋯」殷書賢無奈咁撕開糖嘅包裝紙
「唔好唔開心啦～食甜嘢開心番～」邱茗然笑道，佢笑起嚟嘅時候，身上都會散發住一種活躍嘅氣息
「冇唔開心⋯」殷書賢下意識否認，牛奶糖嘅甜比其他糖仲甜，大概係佢食過最甜嘅糖
「但你都寫晒喺面度。」邱茗然拎咗一粒糖放到自己口中，拎住糖盒喺手中把玩
被睇穿嘅殷書賢頓時沉默不語，邱茗然深呼吸一口聳肩，殷書賢嘅表情都已經寫喺面上，居然仲想否認
「只係reading test冇拎到第一，覺得自己冇盡力⋯」殷書賢想假裝從容，但失望咗表情令佢嘅真實想法表露無遺，「其實都冇咩大不了⋯」
「咁reading唔係可以一直溫書嘅嘢，佢有啲都冇model answer，下次可以再考番第一㗎嘛～」邱茗然試圖安慰殷書賢，以柔和嘅聲線道：「你已經好叻啦～」
殷書賢不禁瞪大眼望向邱茗然，邱茗然對住佢笑，殷書賢臉上嘅失望舒緩咗少許，嘴角微微上揚
「嗯，多謝⋯」殷書賢發自內心細聲講道
邱茗然望住殷書賢一怔，佢有啲意外，因為一句普通嘅安慰換嚟一句多謝
「唔洗～」邱茗然笑一笑道，然後拎咗粒牛奶糖，拉起殷書賢嘅手，「請你食，食完唔好唔開心啦，我番去先啦～」
邱茗然拎埋飲完嘅蘋果汁盒離開天台，天台得番殷書賢一個人喺度
「好耐都冇聽過⋯」殷書賢將糖放到褲袋，打算一人再喺天台留一陣直至打鐘
⋯
某日補完課
「今日你同我一齊走呀？」張萱淇有啲激動咁望住邱茗然，佢嘅雙眼都就嚟發光一樣
「係呀～今日我好眼瞓⋯想番屋企恰下，而且都夠鐘啦～」邱茗然閂上locker門，行到座位孭起書包同張萱淇一齊走
張萱淇同邱茗然往後梯嘅方向行去，差唔多行到E班嘅時候，殷書賢同謝澤謙佢地喺課室行出嚟迎面行嚟
IG Link: https://www.instagram.com/nd_cotttoncandy/?hl=zh-tw