【校園】想成為您的治癒: 84. 重點錯誤

喺落堂之後，邱茗然雖然都係好攰，但都比啱啱地理堂精神好多，畢竟西史堂要抄筆記，佢冇得瞓著

「好攰仲係⋯呀！仲要上數學堂⋯！」邱茗然諗到接住西史堂嘅係數學堂就覺得好崩潰

「頂住呀，琴晚做咩咁慘瞓啱著？」張萱淇一手攬住西史書，另一隻手拍一拍邱茗然嘅背幫佢打氣

「唔知呀⋯」邱茗然搖搖頭，佢瞄張萱淇一眼，然後輕輕地用手肘推佢一下，「你琴日咁開心都瞓得著咩～」

「講咩呀⋯！？」張萱淇即刻撞番邱茗然一下





「連我有中意嘅人都講得出，你對佢嘅阻止都做得好出面啫～」邱茗然忽然間又比啱啱精神多少少

「我只係講啲將來有機會發生嘅事咋嘛～而且我錯唔晒呀！」張萱淇理直氣壯咁講，然後湊近邱茗然細聲道：「佢真係我地級嘅學霸呀⋯！」

「但你成句嘢嘅重點唔係佢係學霸呢～」邱茗然無奈地笑道，雖然佢嘅心唔介意張萱淇咁講，因為佢唔係討厭呢個學霸

「唔⋯都差唔多啦～」張萱淇假裝思考一下然後認真咁點頭

邱茗然行到番埋位坐低，佢將西史書放入櫃桶，將筆袋從櫃桶拎出嚟





「啪嗒！」喺邱茗然將筆袋拎出嚟嘅一刻，忽然間發出好微嘅跌嘢嘅聲音

「嗯？」邱茗然頓時低頭望，見到地上有張對摺咗嘅黃色紙仔同一粒藍色包裝嘅糖

邱茗然下意識覺得係唔可以比其他人發現嘅嘢，即刻好快手咁彎腰執起兩樣嘢

「咩糖⋯？萬樂珠⋯？」邱茗然望住放喺手心上嘅獨立包裝嘅一粒薄荷味糖，然後佢悄悄地打開memo紙睇：「打起精神聽書」

呢張memo紙係之前用過嘅memo紙嚟，同最近嘅memo相比起已經有好實嘅摺痕，都有啲皺





「噗⋯佢又會有萬樂珠嘅⋯？」邱茗然不禁一笑，望住memo紙喺心裏柔聲道，「仲以為佢都冇keep起啲紙⋯」

邱茗然將memo摺好同粒糖一齊放入裙袋，臉上掛住淡淡嘅微笑打開數學書，佢都真係要打起精神上數學啦

喺數學堂過後係萬眾期待嘅lunch，邱茗然拎起銀包袋好手機就同張萱淇出去食飯

「今日食咩好呀你話？」張萱淇邊諗邊行向課室門口，「我又唔係真係好肚餓⋯」

「冇所謂啦～食咩都得，唔餓又係食老麥～」邱茗然剛要踏出課室門口，隔離班嘅人就喺佢面前行過，邱茗然即刻窒咗一窒，喺佢地行咗之後先行出去

邱茗然同張萱淇踏出課室，殷書賢同張思群拎住份Bio筆記經過隔離班房門口，因為放學之後嘅補課係Bio小測

邱茗然同張萱淇行喺佢地前面，邱茗然自然咁回頭望咗一眼，佢同殷書賢嘅視線對上

邱茗然摸一摸裙袋，拎咗粒糖出嚟，殷書賢好快就留意到邱茗然拎住嘅嘢，佢沉默不語，耷低頭望一眼Bio筆記又抬眼瞄邱茗然一眼





殷書賢嘅大腦一直記緊筆記嘅內容，同張思群一齊努力咁溫書，好彩仲記得要食飯

邱茗然撕開糖嘅包裝，回頭又望殷書賢嘅時候，將糖放到口中，算係多謝佢；殷書賢望到之後，又耷低頭望筆記，佢嘅目光唔會離開筆記多過兩秒

「你有糖食嘅？」張萱淇偶然望到邱茗然手上嘅包裝袋，「我又要食⋯！」

「嗯？」邱茗然見張萱淇同佢請嘢，佢即刻轉頭望張萱淇，「冇啦，得一粒。」

「太過份啦⋯」張萱淇撅起嘴道，邱茗然只係無奈一笑

⋯

當計時器開始倒數嘅時候，殷書賢好快咁潦咗幾筆寫名，將時間都留比小測題目，把握每一分每一秒去做題





因為安靜而傳嚟嘅風扇聲完全冇令殷書賢分手，佢集中精神小測，將佢溫過嘅嘢都轉化成答案寫喺紙上

「呢個係咩呢⋯？test前我先望完⋯」張思群望住題目，感覺答案已經好近，但刻意去諗嘅話，正確嘅答案就會飄得愈嚟愈遠，愈想記起記愈記唔起

喺張思群同其他同學寫答案時有所猶疑嘅時候，殷書賢早就肯定咁寫低答案，對佢嚟講小測嘅內容其實冇咩太大嘅難度，小測冇大測咁難，大測亦冇考試咁難，因為佢地嘅考試真係按照住DSE嘅程度嚟出，難起嚟嘅話真係好難

殷書賢一睇清楚題目，筆就會郁，答案都喺佢嘅腦入面

「嘟嘟嘟嘟！嘟嘟嘟嘟！」喺代表小測完結嘅鐘聲響起時，大部分人交完卷嘅第一反應係拎書出嚟睇

「哎呀⋯！我寫錯咗啦⋯！」

「呀～我寫漏咗呢個呀！」

「唉⋯又炒啦肯定⋯」





「好似串錯字呀啱啱⋯漏咗個r呀⋯」

所有人都睇緊自己有冇嘢錯嘅時候，殷書賢默默地將筆放番入筆袋然後拉好書包拉鍊，孭好書包

「你走定去圖書館？」張思群將Bio書合上收入書包

「走，都5點半。」殷書賢望向時鐘微微抬一抬下巴示意

「行啦，我搞掂㗎啦。」張思群孭起書包，殷書賢微微點一下頭就行，「點呀？你預計你今次係咪最高分呀？」

「唔知，好難講。」殷書賢行出課室，將頂喺鼻樑上嘅眼鏡除落嚟，用冷衫嘅衫袖抹一抹鏡片

「你最好唔好轉個頭就考最高分⋯」張思群無奈地講道，佢估殷書賢只係唔想咁肯定，怕最後唔係第一就樣衰





殷書賢微微聳肩，將眼鏡放入褲袋；張思群忽然打量殷書賢，拉一拉佢嘅冷衫

「嚟緊下星期就換季啦，唔洗成日怕凍著長䄂冷衫。」張思群笑道，佢唔知殷書賢著長袖冷衫嘅原因，而且著冷衫都冇咩大不了，「咁中意著長袖冷衫，換季就唔驚啦～」

「的確，鬆一口氣。」殷書賢露出淡淡嘅笑容，換咗冬季校服的確可以減少一啲麻煩




IG Link: https://www.instagram.com/nd_cotttoncandy/?hl=zh-tw