「Okay~」李雨揚有啲困惑,因為張萱淇一直阻攔佢一樣,「好開心啦,送走咗個friend。」

「嗯?咩呀⋯?」張萱淇呆咗一呆,李雨揚望住嘅眼神總好似睇穿佢嘅小心思一樣

「冇咩,行啦。」李雨揚搖搖頭,「買唔買嘢飲?」

「好呀~你想飲咩?」張萱淇當然樂意,「飲唔飲奶茶?」

「好呀。」李雨揚頷首,伸手繞住張萱淇嘅膊頭





兩個人睇起嚟好close,一齊行到奶茶店;李雨揚拉住張萱淇行到一旁睇餐牌,張萱淇嘅餘光望到李雨揚回頭一望,本來搭喺佢膊頭上嘅手默默地收回

「你飲咩呀?」張萱淇伸手拉住李雨揚嘅衫袖問佢

張萱淇抬頭望李雨揚,只見李雨揚定睛地望住自己身後嘅位置

「你望緊咩呆咗?」張萱淇困惑咁回頭同李雨揚望向同一個方向

長髮、溫柔氣質、斯文、柔弱⋯一個咁樣嘅女仔著住校服企喺同佢地相隔三、四步距離嘅位置





「嗨⋯」李雨揚嘅表情都好似凝固咗一樣,笑容都特別僵硬

「好耐冇見⋯分咗手之後,都冇見過啦⋯」嗰個女仔微微一笑,雙手拎住一枝嘢飲

「分手之後⋯佢係清菁⋯?」張萱淇憑對方嘅一句說話,就估到佢係邊個

「上次佢同清菁分手之後,勁快又識咗第二個,明明咁中意人。」

「我係比人飛嗰個Okay?」





張萱淇望住李雨揚臉上嘅訝異,但喺訝異嘅表情中隱藏住一份難過,眉眼間都係複雜嘅情緒,係開心、係訝異、係失落、係難過⋯

「咁快就搵咗新女朋友啦?你同以前一樣冇變。」清菁望張萱淇一眼後,帶着微笑緩緩開口講道

「佢唔係我女朋友。」清菁嘅最後一個字一講出,李雨揚即刻逼不及待一樣否認,「我地只係朋友⋯」

「係呀⋯仲以為你搵咗女朋友添⋯」清菁微微一笑,「我走啦,拜拜~」

「拜拜⋯」李雨揚成個人都同啱啱唔一樣,呢一刻嘅佢成個人都黯淡落嚟

「佢嘅眼神完全唔一樣⋯」張萱淇望向李雨揚,望住佢無光嘅雙眸,張萱淇嘅心都「咯噔」一聲,「佢都有對一個人念念不忘嘅時候呀⋯」

張萱淇手上拎住嘅收據都比佢捏皺,李雨揚有啲放空,佢時不時望向清菁走嘅方向

「你唔去追呀⋯?」張萱淇鼓起勇氣講出違心嘅說話,「佢走啦真係。」





「唔啦⋯」李雨揚垂眸,緩緩咁搖頭,「追嚟都冇咩意思⋯」

張萱淇有啲開心但又有啲唔開心,但整體嚟講都係笑唔出,佢將頭耷低,佢睇到李雨揚嘅另一面,真係在意一個人嗰一面



「望一望呢度啦,咁呢度⋯」阿sir企喺黑板前,拎起白色粉筆喺黑板上寫字

邱茗然嘅雙手放喺枱上,右手拎住嘅筆就搖搖欲墜,佢都就嚟瞓著,如果唔係琴晚瞓唔著,佢都唔會上堂恰眼瞓

「茗然⋯!」坐喺邱茗然後面嘅許洛霏見邱茗然就嚟頭撞枱,即刻踢一踢佢張櫈

「嗯?」邱茗然即刻醒一醒坐好,「好眼瞓⋯」





邱茗然托住下巴勉強撐起眼皮,打起精神繼續上堂,但感覺同大腦作對唔係一件好事,因為佢嘅大腦已經一眨一眨準備進入休眠模式一樣

「呵、呵欠~」邱茗然冇忍住打咗個大喊露,雙眼嘅眼眶都係眼水,睇起嚟好似要喊一樣,「再唔落堂真係要瞓著啦⋯」

邱茗然成堂地理堂都冇精神過,小息一番到課室,直接就伏喺枱上瞓

「十五分鐘夠啦⋯」邱茗然細聲咁自言自語講道,「十五分鐘⋯」

「叮噹叮噹⋯叮噹叮噹~」上堂嘅鐘聲響起,接住落嚟係X1嘅堂

張萱淇拎住西史書行到邱茗然嘅座位,伸手捉住邱茗然嘅膊頭搖:「茗然醒啦,上堂啦⋯!」

邱茗然太眼瞓,根本就係熟睡,張萱淇搖咗佢兩下都搖唔醒佢:「茗然!上堂啦!邱茗然!」

「都唔知係唔係咁做,不過我估係⋯」謝澤謙望住琴日Chem堂派嘅小練習,佢做係做咗,但都唔肯定啱唔啱,「殷書賢,睇下你嗰張⋯」





「陣間都對答案,睇嚟做咩?」殷書賢將自己嗰張從書中抽出嚟遞比謝澤謙

「望下你寫咩嘛⋯」謝澤謙行入C班嘅課室,「呢個係咁咩?」

「行啦行啦⋯!」邱茗然拉起張萱淇嘅手就行

「你拎地理書做咩呀?西史堂呀小姐⋯!」張萱淇瞄到邱茗然手上嘅地理書,沒好氣咁拉住邱茗然,「醒啦邱茗然!」

「係喎⋯我拎地理做咩⋯傻咗⋯」邱茗然望一望手上嘅地理書,自己都覺得無語,拉住張萱淇掉頭

殷書賢行到邱茗然嘅座位,但見邱茗然行番轉頭,佢又覺得自己唔應該坐低住,只好將書先放喺枱上

「西史書⋯」邱茗然睡眼惺忪咁將西史書從書包拎出嚟,然後又轉身行





「你擺低本地理啦!仲拎住做咩?」張萱淇無奈咁將邱茗然手上嘅地理書抽起塞入櫃桶,「瞓矇咗啦!」

「行啦行啦⋯夠鐘啦⋯」邱茗然好似都未係好清醒

殷書賢坐低喺邱茗然嘅座位,坐低一秒都唔夠,眼尾就瞄到櫃桶中嘅筆袋,佢自己嘅筆袋喺枱上面,咁櫃桶呢個⋯

「佢瞓到連筆袋都唔拎⋯」殷書賢嘅嘴角不自覺咁上揚少許,無奈咁搖搖頭,「真係個天然呆嚟⋯」

「比番你⋯」謝澤謙睇完之後將殷書賢做嘅練習遞番比佢,點知一望過去就見到令佢有啲難以置信嘅事:「你突然笑咩⋯?」

「我邊有笑?」殷書賢伸手拎番張練習,然後就耷低頭打開chem書

「你有囉。」謝澤謙以肯定嘅語氣講道

「你睇錯。」殷書賢否認道,手拎起筆準備上堂,佢嘅上堂mode已經開咗




IG Link: https://www.instagram.com/nd_cotttoncandy/?hl=zh-tw