【校園】想成為您的治癒: 96. 多餘的擔心

「叮噹叮噹⋯叮噹叮噹～」

「要上堂啦，我番埋位先～」許洛霏執好自己嘅嘢起身番埋位

邱茗然微微點頭，佢望向張萱淇，張萱淇嘅臉上掛住明顯嘅失落感，邱茗然send咗個message比張萱淇：「有心事要同等講我講呀～」

「最近淇淇好似成日都心情麻麻咁⋯」邱茗然探頭望一望張萱淇，「陣間lunch睇下佢食咩先～」

上堂嘅時候張萱淇一直集中唔到，大腦成日都自動放空一樣，佢想集中起嚟但又集中唔到





「唉⋯點解會愈嚟愈多嘢煩㗎⋯」張萱淇喺心中不解地問道，佢托住下巴望住黑板，但老師講嘅嘢佢好似都冇聽到入去，「明明我地先係好朋友嘛⋯許洛霏宜家成日都早過我知嘅⋯」

張萱淇一諗到呢度又莫名其妙咁諗起李雨揚，李雨揚最近都多咗搵佢

「雖然開心係開心，但點睇都好似當我水泡咁⋯」張萱淇輕嘆一口氣，「好多嘢煩呀⋯1月又話考試，點解做高中生有咁多嘢煩⋯？」

「11月⋯時間過得真係快～」邱茗然望住黑板右上角寫住嘅日期，「咁樣又到11月，轉個頭又12月，好快又考試⋯」

有時諗到一到咗study leave就代表佢地呢一年結束嗰陣，就會覺得開心同時又難過，呢一班一齊咗三年，轉眼間大家都要分道揚鑣





「12月，咁就聖誕啦⋯」邱茗然抬頭望一眼黑板留意進度，「殷書賢實會話咁就要準備考試～」

諗到呢度，邱茗然都忍唔住低頭一笑，佢都唔知點解會忽然諗起佢，可能因為講起讀書都係離唔開殷書賢呢個人啦

「佢應該實考到醫學院啦～唔知淇淇會唔會考到佢想考嘅大學呢⋯」邱茗然嘅手寫着筆記，大腦卻諗緊其他事，「我都要再努力啲，先可以穩陣考到大學⋯畢竟哥哥都考到啦⋯嗯？」

邱茗然嘅腦海出現呢個想法，佢稍微回一回神，佢自己知道自己係一定要考到大學，佢唔想再比人拎嚟比較，所以考到大學係必須嘅事

「一定要考到⋯」邱茗然喺心裏肯定咁講道，呢句說話似乎都係鼓勵緊自己





⋯

房間裏只有微微嘅呼吸聲，除此之外咩聲都冇

邱茗然一人坐喺書枱前拎住文言練習做，因為唔夠熟練，所以每次做閱讀卷嘅時候都要花好多時間去推測

雖然討厭文言文，但佢都唔可以逃避視而不見，因為DSE同考試都會考

「唔⋯好難⋯」邱茗然用筆頭抵着額角，「呢句嘅話⋯」

邱茗然逐句推測意思，估到大概意思之後就塞字落去令句子意思都完整起嚟

「唔可以放棄住⋯！」邱茗然喺做文言練習嘅時候一直對自己講道，「DSE冇得google search⋯！試多句試多句⋯！」

邱旻顥眼見邱茗然要溫書，佢都唔敢留喺房打擾佢，只好出廳坐喺梳化睇手機，但坐唔夠一陣又起身入廚房





「你切緊生果啦？仲諗住拎嚟食添～」邱旻顥見到媽媽切緊蘋果

「你又會出咗嚟嘅？」媽媽望邱旻顥一眼

「茗然溫書嘛，我費事喺入面阻住佢。」邱旻顥順手拎咗一件蘋果

「你唔幫下佢？」媽媽問道

「就算我唔幫佢，佢都可以做到，唔好太睇少佢。」邱旻顥靠住雪櫃企，咬一啖蘋果

「我冇睇少佢，只係擔心佢啫～」媽媽輕嘆一口氣，「佢日日都咁樣睇手機，對DSE都唔上心⋯你話擔唔擔心？」

「媽，我覺得你呢個擔心太多餘，佢唔係唔識分輕重嘅人。」邱旻顥講道，「佢只係喺你睇唔到嘅時候努力，佢嘅成績唔好咩？佢嘅成績一樣好好。」





邱旻顥自己都經歷過嘅日子，佢當然清楚，媽媽對妹妹嘅擔心，佢亦知道，但佢要同媽媽講清楚

「你話要睇結果，佢有邊次考試係考得唔好？」邱旻顥問道，「佢每次考試溫書溫到3、4點係你唔知啫～你睇唔到唔代表佢唔努力㗎嘛～」

媽媽面對邱旻顥講嘅嘢，佢都無言以對，因為邱旻顥講嘅係事實，邱茗然平時睇起嚟就係掛住睇手機又煲劇，但考試測驗從來都冇差過，佢憑自己嘅能力考到中游什至中上游

「我覺得，佢最後會考得好過我。」邱旻顥又悄悄地伸手拎多件蘋果，「佢真係比我努力好多，有時我瞓嘅時候佢仲溫緊書⋯」

「唉⋯睇下最後結果係點啦⋯」媽媽搵唔到啲咩理由去反駁，只好用一句萬用嘅說話代替，拎起放住蘋果嘅盤遞比邱旻顥

邱旻顥輕手輕腳推開房門，探頭望入去見到邱茗然努力中嘅背影，邱旻顥行入去安靜咁擺低蘋果就行番出廳

⋯

日子一日一日咁過，天氣都慢慢變得愈嚟愈涼，邱茗然身上都著多件背心冷衫保暖





「好涼呀今日⋯」邱茗然望住窗外，圖書館仲開住冷氣，搞到邱茗然凍到手都僵硬晒，「咁凍仲有心情溫書呀？」

「唔通要冬眠？冇咩直接影響。」殷書賢唔受天氣影響專心溫書

12月已經嚟到，距離中六嘅年終大考仲有一個月多啲，殷書賢已經進入考試狀態，一分一秒都要把握好

「無趣⋯」邱茗然托住下巴，從裙袋中拎咗粒糖偷偷地塞入口，「你溫緊咩？」

「Bio。」殷書賢簡單又直接咁回答

「休息夠啦，做埋啲功課先～」邱茗然挺直腰桿坐直伸懶腰拉一拉筋，然後將做完嘅功課疊好，將未做嘅功課抽出嚟

殷書賢微微抬起頭朝邱茗然望去，邱茗然將垂喺臉頰邊嘅髮絲繞到耳背，微微側着頭專心起嚟





「溫書。」殷書賢喺心裏提自己一句，安靜地將視線收回，默默咁托一托眼鏡又集中起嚟

有時耳邊會傳嚟低聲呢喃，悄然一望係邱茗然喺寫答案前將句子講通順後先落筆

有時會聽到細聲嘅打氣聲，喺邱茗然想放棄嘅時候，邱茗然都會輕輕地拍一拍自己嘅臉頰，然後細聲打氣

兩個人坐喺圖書館嘅窗台位，各自安靜咁溫書、做自己嘅事

安靜專心溫書嘅當下就好似只有自己一人喺呢個空間入面，但偶爾抬頭望一眼嘅時候，又會發現其實唔係只有自己一個人

有人同自己一齊努力中嘅感覺令人嘅內心會變得溫暖起嚟，有時會有啲安心

「叮噹叮噹⋯叮噹叮噹～」學校嘅鐘聲喺5點半準時響起

「夠鐘啦？」邱茗然有啲愕然咁望向出面嘅時鐘，然後伸懶腰，「今日都冇去天台添～」

殷書賢輕皺起眉頭，佢嘅Bio溫到一半就打鐘，強制要佢番到屋企先再溫，但5點半一定要離開學校，所以殷書賢都係執嘢

「你執嘢啦？」邱茗然伸完懶腰就頹廢咁駝背坐鬆一鬆




IG Link: https://www.instagram.com/nd_cotttoncandy/?hl=zh-tw