【校園】想成為您的治癒: 95. 天生vs後天
朝早番學
「呵～欠⋯」趙遠寧打住喊露咁行入學校門口
趙遠寧一臉頹廢咁行入學校，經過接待處轉彎行上樓梯
「嗯？」趙遠寧一轉彎踏上梯級就見到行喺前面嘅殷書賢，「殷書賢⋯？佢又同嗰個女仔一齊？」
邱茗然攬住中文書一直念念有詞咁背緊今日嘅默書範圍，偶爾偷望本書一眼後又重複背多幾次，殷書賢一直默不作聲，聽住邱茗然背書
「嗰個女仔咪有男朋友⋯？唔通殷書賢冷淡咗幾日都係唔忍心？」趙遠寧喺心裏默默猜想，「殷書賢你唔係呀嘛⋯」
雖然趙遠寧係咁樣諗，但佢冇即刻上前叫住殷書賢，而係等邱茗然番咗課室後佢先追上前
「喂！」趙遠寧行上前嘅時候捉住殷書賢嘅膊頭
「早晨。」殷書賢淡然地講一句，佢都冇覺得趙遠寧有啲咩異樣
趙遠寧回頭望一眼，然後喺行番位嘅路上搭住殷書賢嘅膊頭
「你咁快就同佢熟番啦？」趙遠寧細聲咁問殷書賢，好似講緊啲咩唔見得光嘅事一樣，「早幾日先講完佢有男朋友唔係咩？」
「嗯。」殷書賢嘅心入面其實唔太想解釋，因為一解釋就有好多嘢要講清楚
「你唔係對佢⋯佢有男朋友㗎⋯」趙遠寧見殷書賢呢個冷淡嘅反應即刻有少少緊張，「咁樣唔似你⋯！」
「佢地最近做咩咁煩⋯」殷書賢忽然間覺得佢嘅朋友最近好似同以前唔一樣
可能真係單純因為佢同一個女仔有交集，睇起嚟唔似佢嘅行為，所以佢地特別大反應特別緊張
「殷書賢！你有冇聽我講嘢？」趙遠寧見殷書賢唔出聲，直接用膊頭撞殷書賢一下
「有呀⋯」殷書賢無奈開口，將書包除落嚟勾喺枱邊，「佢冇男朋友，就係咁。」
殷書賢都唔理趙遠寧嘅反應，直接繞過去行去開locker；趙遠寧呆咗一呆，然後跟上殷書賢，企喺殷書賢隔離開locker
「係咪㗎？」趙遠寧同當日嘅殷書賢一樣有啲半信半疑，「佢講你就信呀？嗰日我地都見到。」
「佢阿哥，以前都喺度讀，比埋相我睇。」殷書賢講嘢就淨係講重點，佢拎晒所有要用嘅書出嚟，然後閂上locker門，「你地講我就信就真。」
「哦～咁真相大白就好啦～」趙遠寧點點頭，隨即露出一個意味深長嘅微笑望向殷書賢，「咁都好過冇機會嘅～」
「我都懶得同你解釋⋯」殷書賢知趙遠寧又想點，佢地最近成日積極咁講呢啲話題，搞到殷書賢都放棄掙扎
殷書賢宜家除咗讀書真係咩都唔想花時間去諗，淨係讀書嘅事已經令佢好頭痛，所以佢完全唔想花精力去諗同讀書冇關係嘅事
⋯
「下一題，殷書賢、陳懿澄，出嚟喺黑板寫。」Miss Wong企喺黑板前抬頭望一眼
Miss Wong叫咗呢兩個人出去，M2班嘅大家都忍唔住抬頭望一眼，呢兩個人係全級頭兩名
但陳懿澄只係擊敗過殷書賢一次拎到第一名，所以大家都笑稱佢係「萬年二姐」，永遠都拎第二，而佢都視殷書賢係最大嘅競爭對手
如果話殷書賢係天生嘅全能學霸，咁陳懿澄絕對係努力嘅後天學霸
陳懿澄起身拎起M2書，喺行出去之前回頭望一眼殷書賢，眼神裏表示緊「我絕對唔會輸比你！」嘅肯定
殷書賢垂手拎住筆記行出去，行到黑板前直接拎起白色粉筆，兩人書寫嘅速度差唔多，粉筆一直輕敲着黑板
「今個學期嘅第一都會係我。」殷書賢諗起上次考第二嘅痛，佢嘅內心好堅定，對於第一名呢回事，好堅定
殷書賢好快咁寫好所有步驟，寫低答案後先一步放低粉筆
「搞掂⋯！」陳懿澄喺殷書賢放低粉筆嘅半秒後亦放低粉筆，喺佢番埋位前，佢當然會望一望兩人嘅答案對比下，「答案唔一樣嘅⋯？」
陳懿澄望一望，有啲慌張咁行番埋位：「可能啱嘅係我呢⋯！」
Miss Wong行到黑板前拎起紅色粉筆，先行到陳懿澄寫嘅答案嗰邊：「懿澄，中間計錯數。」
Miss Wong淡淡咁講咗一句，令陳懿澄覺得有啲尷尬，但除咗係當眾錯一題數嘅尷尬之外，更加係好似比人睇到佢同殷書賢呢個天生學霸嘅差距一樣
「正解。」Miss Wong行到殷書賢嘅答案嗰邊，望一次步驟同答案後打咗個剔，「下一題。」
坐喺前排嘅陳懿澄回頭望向坐後排嘅殷書賢，殷書賢一副習以為常嘅模樣，陳懿澄就替自己唔抵
「明明我係靠實力考到第一，但總會有人話佢只係一時失手，話我係撞彩⋯」陳懿澄嘅心入面係滿滿嘅唔忿氣，「只係佢拎多幾次第一啫，出到社會咪又係個普通人⋯」
就算唔服，但人人都睇實力，邊個係實力派邊個係靠運，所有人都係睇以往數據做比較
殷書賢喺堂課簿上解緊下一題，筆尖順暢咁喺簿面寫低步驟，既然有學霸之名，就要有實力對得住呢個名
「叮噹叮噹⋯叮噹叮噹～」
「殷書賢你落唔落小食部呀？」謝澤謙企起身準備去買嘢食補充體力，都不忘問一問殷書賢
「唔洗。」殷書賢從櫃桶拎出今朝第一堂LS派嘅功課，拎寫住past paper題目嘅紙睇一睇，睇清楚題目就落筆寫
「佢又要做功課啦⋯我地落去啦。」張思群都習以為常，除咗食飯之外，殷書賢基本上都唔會離開佢嘅座位
「茗然，你呢題寫咗咩⋯？」許洛霏拎起自己嘅地理功課問邱茗然
「我唔肯定啱唔啱⋯」邱茗然將佢嘅功課拎起，指住自己寫嘅答案，又望一望許洛霏嘅答案，「你呢個應該寫錯咗。」
張萱淇番到課室，見到邱茗然同許洛霏坐埋一齊坐功課，心裏突然有啲唔高興，放低書就行去邱茗然嘅座位
「做緊功課呀？」張萱淇先企喺枱前問，「你去唔去小食部呀？」
「呀？唔啦⋯想做埋份地理先⋯」邱茗然搖搖頭，許洛霏好奇望一眼邱茗然寫到嘅題目，然後自己又繼續寫
「呢題係咁樣咩？你同我個答案差咁遠嘅？」許洛霏拉一拉邱茗然嘅手，原子筆嘅筆頭指住答案差好遠嘅題目
「咦⋯係我睇錯題目，sorry～」邱茗然笑着拎起塗改液
張萱淇望一望做功課嘅兩人，佢好似都冇開口講啲咩嘅餘地，唯有默默咁轉身行番埋位坐低
邱茗然喺張萱淇轉身走嘅一刻抬頭望向佢，望住佢行番埋位坐低
「心情唔好？」邱茗然察覺到張萱淇嘅小情緒，「又因為嗰個男仔⋯？最近好似都係咁樣⋯」
張萱淇安靜咁坐喺自己位睇手機，偶爾悄悄抬眼望向邱茗然同許萱淇，兩人就好似好快就混熟咗，喺佢唔知嘅時候講咗好多好多秘密一樣
本來只係一件微不足道嘅事，邱茗然嘅性格本來就好容易相處，所以多朋友都係正常嘅事嚟，呢一點張萱淇係知道嘅，只係以前就算有其他朋友都好，都唔會令張萱淇覺得唔開心
或者係因為張萱淇嘅秘密同親近感只會對邱茗然，所以自然希望邱茗然都會同樣地對待自己，但最近邱茗然同許洛霏有啲熟到佢冇得介入，連秘密都係連洛霏先一步知道，令張萱淇好介懷
如果係其他人，張萱淇都可以唔在意，但邱茗然講過張萱淇係佢嘅好朋友，一直都會係，所以先令張萱淇產生對朋友嘅佔有欲⋯
IG Link: https://www.instagram.com/nd_cotttoncandy/?hl=zh-tw