【校園】想成為您的治癒: 100. 秘密

「好眼瞓。」殷書賢無力地講道，「今日晏晝好似仲有個小測係唔係？」

「係呀，晏晝英文做listening。」趙遠寧講道

邱茗然同張萱淇一齊從C班嘅課室，邱茗然眼睛嘅餘光中見到殷書賢嘅身影，佢微微轉頭望向佢，然後微微一笑

「咦～」張思群同趙遠寧即刻識趣咁比反應

企喺殷書賢左邊嘅張思群突然雙手捉咗殷書賢嘅左手前臂一下，本來只係想玩一下，但殷書賢即刻將手抽起迴避





「你都太大反應啦掛⋯？」張思群有啲愕然，擺出有啲傷心嘅表情講道，「呢個嫌棄嘅反應都太令人傷心啦掛⋯」

「呃⋯只係嚇親⋯」殷書賢嘅手慢慢咁垂番低，有啲尷尬咁笑咗一笑

啱啱比張思群用力咁捉咗左手一下，搞到左手有啲刺痛嘅感覺，殷書賢整理一下衫袖，唔自然咁將冷衫嘅衫袖拉直

佢地幾個喺度等緊上餐嘅時候，殷書賢將身上嘅冷衫除咗落嚟，佢地幾個安靜咁睇手機，大家都冇講嘢

「歡迎光臨，幾多位？」「2個。」





張萱淇提手示意，侍應望咗一眼之後將佢地帶到一個卡位坐；邱茗然同殷書賢對上眼，又默契咁移開視線

「你個學霸坐你後面！」張萱淇一坐低就拎起餐廳，上身湊前用氣音對邱茗然講道

「關我咩事⋯」邱茗然帶住笑容反一下白眼，「佢坐邊都唔關我事⋯」

坐喺靠走廊嘅張思群嘅手一直向右邊緩緩摸索，想拎起水杯飲水，掛住睇手機嘅佢喺指背掂到杯嘅時候， 唔小心將水杯撞跌

「嘩！Sorry sorry sorry！」張思群即刻將水杯放番好，但都倒咗半杯出嚟





「你想點㗎⋯」殷書賢提起手往牆邊嘅位置靠，但佢嘅衫袖都濕晒，貼住皮膚

「我冇心㗎！紙巾紙巾紙巾⋯！」張思群有啲慌張，佢都唔敢望殷書賢，因為覺得殷書賢攰到就嚟要發火，「你地有冇紙巾？」

謝澤謙同趙遠寧搖搖頭，呢個時候張思群一下子擰轉身：「唔該，你有冇紙巾呀？」

「嗯？」邱茗然聽到有人好似同佢講嘢，抬頭見張萱淇都望住佢身後

「你有冇紙巾？學霸整濕咗件衫。」張思群又重複一次

「係你倒瀉水整濕我件衫。」殷書賢即刻反駁道

「我有呀，等陣⋯」邱茗然從裙袋中拎咗包紙巾遞比殷書賢，「嗱。」

「你要唔要拉起個衫袖？咁樣好似唔會濕漉漉咁痴住。」張思群問道，聽到呢個提議嘅邱茗然不禁帶點震驚咁挑起眉望向殷書賢





「唔洗。」殷書賢將手垂低抹一抹衫袖，但一時三刻好難乾透

「佢真係唔比佢地知⋯」邱茗然坐好同時喺心裏諗，「咁就真係得我知⋯？」

邱茗然忍唔住偷偷地開心咗一下，當秘密真係只有當事人同自己兩人知嘅時候，感覺就好似自己比其他人有啲特別

「不過完全唔係啲咩值得高興嘅事⋯」邱茗然好快就頭腦清醒咁對自己講，「自殘始終唔好⋯」

「唔該。」殷書賢將包紙巾遞番比邱茗然

邱茗然拎起手機，喺枱底偷偷地send咗個message比殷書賢：「真係連佢地都唔知得？」

「唔想咁麻煩」殷書賢嘅回答已經問咗所有嘢





佢地平時幾乎唔會私下聯絡，多數都係喺學校見到面同memo紙溝通

「比我知道咗真係唔好彩啦～」邱茗然帶着少少自嘲嘅意味回覆道

「還好」殷書賢好快就回答，佢嘅回答永遠都係咁簡略，「唔好同人講」

望住呢個啱啱send出嚟嘅message，邱茗然就諗起之前殷書賢對佢嘅滿滿不信任，到宜家可以喺佢面前直接推起衫袖

「人同人之間嘅信任關係咁薄弱嘅⋯」「我冇唔信你」

邱茗然微微回頭望向殷書賢，殷書賢好似察覺到一樣同樣微微轉頭，邱茗然見殷書賢望佢，佢就微微側側頭一笑

⋯

「You now have five minutes to familiarize yourself with the question-answer book and data file⋯」





Listening嘅小測開始，講完題目簡介之後，綠袖子緩緩響起，播住令人困意冒起嘅聲軌同時叫大家預備好

「真係就嚟瞓著⋯」連殷書賢都覺得有啲攰，但佢都係努力咁打起十二分精神預備題目，「睇題目！」

左手一直少少痕少少刺痛嘅感覺令殷書賢有啲心癢，佢一直忍耐、強制集中精神到完成整個小測

「食唔食啲嘢先再番屋企？」張思群將書包從枱邊拎起放到枱上，「都5點3啦。」

「食囉，食咩呀？米線？」只係執番兩支筆嘅謝澤謙坐喺枱邊等其他人，佢伸手拍殷書賢，「你食唔食呀？都5點3，仲有15分鐘都打鐘啦。」

殷書賢下意識望向朝走廊嘅窗，謝澤謙以為殷書賢喺度發呆，輕輕推咗殷書賢一下

「喂，你去唔去？」謝澤謙問第二次





「唔啦，你地去啦。」殷書賢回神一樣望向謝澤謙

喺殷書賢耷低頭將書包拉鍊拉上嘅同時，謝澤謙朝去廊瞄咗一眼，嘴角悄悄上揚起嚟，又輕輕推咗殷書賢一下

「咁你加油啦。」謝澤謙見張思群同趙遠寧都搞掂就拎起書包

「加咩油？」殷書賢嘅反應冷淡，對謝澤謙嘅意思似懂非懂，「我走啦。」

殷書賢冇同佢地幾個一齊走， 孭起書包就行出課室，但今日佢嘅目的地並唔係圖書館

「咔⋯呯！」天台嘅門緩緩閂上，殷書賢行到長櫈前將書包放低喺長櫈上

「嚇死我⋯！」專心睇手機嘅邱茗然因為感覺到長櫈有好輕微嘅郁動所以抬頭去望，「你上咗嚟？」

「嗯。」殷書賢坐低喺長櫈上嘅第一件事，係推起衫袖先掃自己嘅前臂幾下

殷書賢嘅前臂比起上個星期又多咗好幾道淺紅色嘅傷痕，傷痕因為正在癒合所以好痕，前臂就嚟變成體無完膚嘅狀態，摸起嚟好似摸緊砂紙一樣粗糙




IG Link: https://www.instagram.com/nd_cotttoncandy/?hl=zh-tw