【校園】想成為您的治癒: 101. 會蛀牙吧

「你隻手愈嚟愈花。」邱茗然望住殷書賢嘅手，佢嘅手好似又多咗好多傷痕，「最近成日都做危險行為？」

「好痕⋯」殷書賢將眼鏡除落喺放入褲袋，手又掃幾下前臂，摸到因為疤痕而有啲凹凹凸凸嘅感覺

「有冇人話過你戴咗眼鏡好斯文？」邱茗然好奇問道

「有，你囉。」殷書賢輕捏鼻樑，瞄咗邱茗然一眼後微微耷低頭，「邊會有人特登留意⋯」

「係咩？」邱茗然笑着伸個懶腰，拉一拉衫袖，整理一下校呔





邱茗然見殷書賢冇反應，下意識就望向殷書賢，原來殷書賢已經直接瞓著咗

「瞓著咗⋯？」邱茗然一臉愕然，側着頭再望清楚，「真係瞓咗⋯！」

邱茗然拎出手機睇一睇時間：「但就嚟打鐘⋯要唔要⋯」

邱茗然嘅左手㩒住喺櫈上借力支撐，上身微微湊前，右手緩緩提起打算輕輕拍醒殷書賢

「唔⋯」殷書賢忽然成個人震咗一下，腳都踢咗一下，嚇到邱茗然嘅手都懸喺半空唔敢郁，「你做咩？」





「呃⋯冇，只係見就打鐘打算叫醒你⋯」邱茗然即刻尷尬咁將右手收回

「5半啦⋯？」殷書賢嘅手掩住雙眼，啱啱起身嘅佢覺得光有啲刺眼，「番去溫書⋯」

「你唔休息下？你睇起嚟好似好攰⋯」邱茗然因為留意到殷書賢臉上嘅疲倦同手上嘅傷痕，所以有呢個結論

「就考試啦，唔溫書會唔自在。」殷書賢將摺起咗嘅衫袖拉番落嚟扣好，著上長袖冷衫

「比你。」邱茗然從書包裏拎咗包朱古力出嚟比殷書賢，「你睇起嚟真係好攰，唔好鎅手啦，食朱古力啦！」





「你做咩成日都請我食朱古力？想我同你一樣蛀牙？」殷書賢輕輕一笑，雖然佢係咁問，但佢都係伸手接過朱古力

「我只係分享下快樂咋～而且我冇蛀牙！」邱茗然輕皺起眉頭

兩人離開學校後行到巴士站，黃昏嘅陽光過於刺眼，邱茗然都忍唔住要提起手擋住喺額旁

「好曬⋯」邱茗然喺內心抱怨起嚟，「幾時有車呀⋯」

因為太陽直照嘅關係殷書賢都忍唔住皺起眉頭瞇起眼，心中祈求巴士快啲嚟，明明好涼但又好曬

邱茗然望一眼地上嘅影，眼見自己原來仲係企喺陽光一定曬到嘅位置，佢探頭一望，然後好快咁行到殷書賢嘅左邊企

殷書賢望到邱茗然莫名其妙嘅行為一臉疑惑，頭上都打咗個問號

「好曬⋯」邱茗然將手垂低，笑嘻嘻咁望住殷書賢





殷書賢耷低頭，聰明嘅佢腦袋稍微一轉就知邱茗然企喺佢左邊嘅意思係咩，喺輕輕一笑後側着頭望邱茗然：「你搵我嚟遮太陽？」

「你高嘛。」邱茗然理直氣壯咁直視殷書賢講道，「啱啱好遮到。」

「Okay⋯」殷書賢無言地笑了笑，然後又問：「唔曬啦？」

「唔曬啦。」邱茗然搖搖頭，佢探頭望一望殷書賢臉上嘅笑容

殷書賢比佢高成個頭，佢嘅影都啱啱好可以擋到太陽，所以邱茗然宜家企緊喺太陽照唔到嘅地方

殷書賢垂眸望咗邱茗然一眼，呢一刻嘅佢正躲喺佢嘅影子下睇手機

「仲未有車⋯」殷書賢望向遠處，挺直腰桿企，佢垂低頭望住自己嘅皮鞋，整個人以小幅度前後搖晃，「番到去溫咩好？」





⋯

「你最近做咩愈嚟愈攰？好似12月開始咗之後你都冇精神過⋯」謝澤謙同殷書賢喺廁所一齊行出嚟

「只係有啲夜瞓，溫書溫到好夜。」殷書賢嘅倦意直接寫喺臉上

「咁眼瞓上堂都唔恰眼瞓咁勁。」謝澤謙有少少佩服佢，比著係佢，真係會直接上堂釣魚

「Okay啦，放學番去先瞓。」殷書賢講道

「下個月考試，你媽冇講啲咩咁好？」謝澤謙笑道

「點可能⋯日日溫書都要入嚟講一次⋯」殷書賢疲倦咁揉一揉眼

「咁樣施壓真係唔緊要？」謝澤謙無奈咁問，好快又笑一笑，「不過你都慣㗎啦～都係keep住第一名㗎啦～」





「嗯⋯」殷書賢伸手摸一摸後頸，「其實考唔考到第一，呢個名次冇咩意義⋯」

雖然口係同意咗呢個講法，但自從12月到咗之後，殷書賢嘅左手嘅傷痕就愈嚟愈多，密密麻麻，一個完好嘅地方都唔太見到

「你搞笑呀？你轉個頭咪又係考咗第一⋯」謝澤謙聽起嚟就好似殷書賢串緊佢一樣

殷書賢係佢地四個入面讀書最叻嘅人，基本上次次殷書賢都係考第一，上一次考第二，大概只係一時失手

「上次考咗第二，我媽講咗一個暑假，講到宜家都仲講緊。」殷書賢行入課室，直接行到locker前

「真係唔係個個都做到你媽個仔，我嘅話日日比佢提住真係會發癲⋯」謝澤謙欣賞殷書賢嘅努力同頭腦，但有時都會覺得殷書賢活得真苦

「我都就癲。」殷書賢將下兩堂嘅書從locker中拎出嚟





殷書賢伸出左手拎放喺locker入面嘅數學書同LS書，衫袖微微縮咗上去，今日殷書賢冇著住冷衫，衫袖一縮上去就露出手腕

「嗯⋯？佢手腕上面係⋯？」謝澤謙嘅眼尾咁啱瞄到，謝澤謙微微轉頭去望，收回視線拎書嘅同時思考着，「污糟咗定⋯」

當謝澤謙再想望多一眼確認嘅時候，殷書賢已經垂低手並閂咗locker嘅門；殷書賢行到番埋位擺低書後嘅第一件事係著番冷衫

「啱啱差啲就比人睇到⋯」殷書賢嘅心慌張咗一下，「唔著冷衫真係唔得⋯」

「應該係我睇錯咗啫⋯」謝澤謙好快就打消咗念頭，佢相信應該係自己驟眼睇錯

⋯

「今日又遲落堂⋯！都知上佢堂一定冇得準時走㗎啦⋯！」張萱淇望住掛喺黑板隔離嘅時鐘抱怨道

「上咗佢嘅堂三年，你要習慣㗎啦～」邱茗然笑道，「不過我都覺得準時係美德嚟！」

「哎，遲放學都算，晏啲仲要去補習⋯」張萱淇一諗到自己嘅行程就忍唔住嘆氣，「茗然呀！我唔想去補習呀！」

「但你唔去補習就見唔到人啦～」邱茗然拍一拍張萱淇嘅膊頭笑道，「你要放棄見佢嘅機會呀？」

「咩呀～平時會約食飯都會見到～」張萱淇行出課室，邱茗然行到出嚟走廊，張萱淇一手勾過邱茗然嘅膊頭將佢拉過嚟，「唔夠同校嘅好～」

「你又想講咩呀⋯」邱茗然梗係知張萱淇想講咩先咁樣問佢，「我去圖書館啦，聽日見啦！」

張萱淇鬆開手，邱茗然行後梯上到圖書館；準時落堂嘅殷書賢一早就喺度，邱茗然坐低喺殷書賢隔離，拎出今日未做完嘅兩份功課

「唉⋯番到屋企真係要瞓一陣先得⋯」邱茗然望住眼前嘅功課無力地對自己講道

殷書賢坐喺佢隔離，拎住筆嘅手快速地由左至右移動，但偶爾會好似下意識一樣拉一拉衫袖

「嘩⋯好眼瞓呀⋯」邱茗然對眼都就嚟合埋，手上拎住cal機，但佢都唔知自己㩒緊咩字，「個腦轉唔郁啦就嚟⋯做完份數簿一定要停啦⋯份reading番屋企先做啦⋯」

邱茗然好努力咁想打起精神，但喺呢個又攰但又要做數嘅時候，佢真係醒唔嚟，大腦中嘅數字都比綿羊一個個咁食咗落肚




IG Link: https://www.instagram.com/nd_cotttoncandy/?hl=zh-tw