【校園】想成為您的治癒: 107. 生氣
「我地都係好朋友呀，呢點冇變，我地一直都係！」邱茗然以堅定嘅眼神，肯定嘅語氣講道，「許洛霏知嘅你都知，佢唔知嘅你都知，我最終都會同你講呀⋯！」
「重點係我覺得宜家你咩都講比佢聽先，即係你冇咁重視我啦⋯」張萱淇有啲傷心，「我最重視你，所以無論咩事我都一定第一時間第一個同你講，但你都唔係一樣咁對我⋯」
「我唔係唔重視你⋯」邱茗然唔知要點樣解釋先可以將成件事好好咁講清楚比張萱淇知，「只係有時許洛霏問我，我又咁啱同佢一齊，所以先講比佢知，我唔係冇同你講嘅打算⋯」
「算啦⋯」張萱淇輕嘆一口氣之後默默地講道
「做咩咁突然就發脾氣⋯？」邱茗然嘅心裏有一大堆問號，佢真係唔明白張萱淇突然間點解會係咁樣嘅反應
兩個人喺呢個嚴肅嘅氣氛下冇再講啲咩，張萱淇突然爆發嘅情緒令邱茗然都有啲卻步，唔敢再講啲咩
「再問嘅話，都唔知會唔會講錯咩令淇淇唔開心⋯」邱茗然偷偷地望張萱淇一眼觀察佢嘅表情，喺心裏苦惱地講道
⋯
喺晏晝班主任堂後
「咁你地自己出嚟拎番本OLE簿啦。」Miss Hui企喺老師枱前講道
「你係唔係出去拎？幫我拎埋。」張思群見殷書賢起身即刻就叫住佢，因為佢唔想特登行出去一轉
「咁順便拎埋我嗰本呀～」謝澤謙順口地拜托道
殷書賢回頭沒好氣咁望咗佢地一眼，但都係行出去順便拎埋佢地嘅簿
Miss Hui仍然坐喺老師枱前處理緊剩低嘅少少班務工作
殷書賢搵到自己嗰本之後就順手搵埋佢地嗰幾本，殷書賢伸出左手嘅時候，衫袖自然咁拉上咗少少
「張思群嘅喺度⋯」殷書賢掛住幫佢地搵OLE簿都冇留意到自己嘅衫袖拉起咗，露出咗手腕嘅位置
「未攞嘅出嚟攞番啦快啲！」Miss Hui抬頭提醒大家
正當Miss Hui要再一次耷低頭繼續做埋手上嘅班務工作時，眼尾留意到殷書賢嘅手有啲異常
「多過一個唔尋常嘅傷口⋯」Miss Hui察覺到同學手上有奇怪嘅傷口，佢抬頭望一眼呢個同學，「殷書賢⋯」
正當Miss Hui以為係錯覺想再望多眼嘅時候，殷書賢好快手咁拎埋謝澤謙同趙遠寧嘅OLE簿行番埋位
喺一轉身背對老師枱嘅時候，殷書賢即刻將衫袖拉番落嚟，心臟正緊張咁噗噗跳：「Miss Hui應該冇睇到掛⋯」
Miss Hui望住殷書賢行番埋位，同平常人無異，心裏有啲懷疑但又唔敢肯定，因為都只係望到一眼，唔可以即刻肯定
但的確，Miss Hui開始有少少擔心加懷疑⋯
⋯
「拜拜～」許洛霏追上前面嘅邱茗然，單純拍一拍佢同佢講再見
「拜拜⋯」邱茗然同佢講嘅時候，許洛霏已經行離佢好幾步，只係回頭對佢笑一笑
邱茗然下意識咁偷瞄張萱淇一眼，佢都唔敢真係望佢，由晏晝開始，佢地之間嘅氣氛就有啲唔太好
張萱淇忽然到來嘅情緒同呢一刻嘅沉默令邱茗然好大壓力，好怕講錯啲咩又令張萱淇唔高興
本來親近嘅兩人，忽然間變得小心翼翼，係唔係代表兩人漸漸疏遠嘅先兆⋯？
「咁⋯我去圖書館啦⋯」邱茗然帶着少許嘅擔憂開口講道
「嗯，好呀⋯」張萱淇微微點頭，眼神都帶點迴避，「拜拜⋯」
「嗯⋯拜拜⋯」邱茗然望住張萱淇往下層走，佢往上層行咗幾級樓梯，又忍唔住耷低頭往下望，「點解突然會係咁⋯？」
⋯
「唉⋯」
殷書賢坐喺長櫈上望住邱茗然企喺矮牆前嘆咗十分鐘嘅氣
「我係唔係要同淇淇講啲咩⋯解釋清楚⋯？」邱茗然問自己，佢都有啲迷惘唔肯定，「其實霏霏知道嘅唔知道嘅，淇淇全部都知，我又冇因為同其他人熟咗就疏遠佢⋯」
殷書賢將眼鏡除落嚟，用冷衫嘅袖口抹一抹鏡片又戴番眼鏡，佢起身行到矮牆前企喺邱茗然嘅旁邊
「唉⋯」邱茗然好愁，佢完全唔知要點樣同張萱淇解釋先可以令張萱淇開心番
「今日做咩一直嘆氣？」殷書賢聽咗十分鐘嘅嘆氣後開口問邱茗然
「呀⋯？唔知呀⋯」邱茗然嘅委屈同無奈都直接寫喺面上，佢望向殷書賢，然後又嘆一口氣，「好煩呀⋯」
「所以問你做咩。」殷書賢又重複一次
「唔⋯其實我都唔知我做錯咩⋯」邱茗然直接表明自己嘅想法，「如果你啲friend唔係第一個將秘密同你講，你會唔會覺得佢地唔當你係兄弟？」
「男仔又唔會真係咁介意呢啲事。」殷書賢搖搖頭，佢將冷衫除咗落嚟對摺一下，然後拋到長櫈上，「佢地係真係想同我講嘅話，佢地最後都係會同我講。」
「但你唔會覺得，明明大家係好兄弟，但最後先同自己講，會顯得你對佢地嚟講唔夠重要⋯之類⋯？」邱茗然撅起嘴，一諗到張萱淇因為呢件事而唔高興，邱茗然又有啲懷疑自己係咪有錯，「唔會覺得⋯「點解我唔係第一個知？」之類⋯」
「本來秘密嘅嘢，都係會自動揀個同自己啱傾啲嘅人講。」殷書賢摺起裇衫嘅衫袖，將勒到人好似就窒息嘅校呔往下拉咗少少，「唔會話我同邊個係好朋友就一定要將所有嘢講晒比佢知。」
邱茗然望向殷書賢，殷書賢唔係就係講出咗佢心入面想要嘅答案咩？
「同邊個，喺邊方面啱傾，咪同邊個講。」殷書賢仰起頭望住天上嘅雲一層一層咁隨風飄去，「就好似我同謝澤謙最熟，但我未必會將所有秘密都同佢講，佢亦唔一定會揀我做第一個聽秘密嘅人，但唔代表我地咁就唔係好兄弟。」
「你唔會介意咩？聽到佢同其他人講緊你唔知嘅秘密⋯」邱茗然心中嘅愁緒未完全散去，「係唔係我唔啱？第一個知真係咁重要咩⋯但我最後都有同佢講呀，冇特登唔話佢知⋯」
「冇話你唔係第一個同佢講就係佢唔重要，只係人會自動選擇最適合嘅人去分享咁解。」殷書賢微微聳肩，「如果佢係真係唔重要，咁佢連想知嘅機會都唔會有。」
「我唔識同佢解釋⋯佢覺得我變咗啫⋯但其實我冇變呀⋯」邱茗然失落咁嘆氣，「只係覺得好似突然間嚟個大爆發，有啲嚇親我唔知點算好⋯」
「人本來就會變，點可能一直一模一樣？」殷書賢理性分析講道，「就算以後上到大學，都會識到新嘅朋友，好難要求一個人一直同以前一樣。」
IG Link: https://www.instagram.com/nd_cotttoncandy/?hl=zh-tw