「你講得啱,但我唔識同佢解釋⋯」邱茗然仍然有啲沮喪,「好煩呀⋯」

「照你嘅想法直接同佢講,佢理唔理解係佢嘅問題。」殷書賢講道,「唔通要因為佢一個人而一直要自己一模一樣唔改變?」

「咁又唔係⋯」邱茗然搖搖頭,佢都覺得殷書賢講得好有道理,但佢就係唔識同張萱淇解釋好,「順其自然啦⋯」

邱茗然望一望殷書賢,殷書賢企喺原地放空,邱茗然不自覺咁就瞄咗殷書賢嘅手一眼,總覺得佢手上嘅傷又多咗

「諗緊咩⋯?」邱茗然見殷書賢聽自己講咗咁耐就禮尚往來問道





「諗緊畢業前會唔會比人發現。」殷書賢耷低頭望一望自己隻手,「希望唔會⋯」



殷書賢坐喺書枱前溫書,佢早就溫到腦閉塞一樣,大腦轉都轉唔郁,加上啱啱媽媽又入嚟打擾佢,大腦更加唔聽洗

「真係食朱古力都冇用啦⋯」殷書賢將筆掉喺枱上,伸手就去拎起鎅刀

喺佢正要落刀之際,佢停咗落嚟冇鎅落去,默默地將鎅刀放嘅位置移上啲





「鎅得太低嘅話,會比人發現⋯」殷書賢諗起晏晝嘅班主任堂後,Miss Hui好似定睛望咗佢隻手一陣,「Miss Hui應該冇發現⋯」

殷書賢一諗關於自己鎅手自殘嘅事有冇比Miss Hui發現就覺得比啱啱更大壓力

殷書賢將鎅刀「啪嗒」一聲掉到枱上,伸手拍拍自己嘅額頭,愈近考試佢愈覺得辛苦,嗰種辛苦係好似有嘢勒住佢,令佢難以呼吸嘅辛苦

「唉⋯」殷書賢忍唔住嘆氣,佢都唔知點解會咁難受,「明明只係考個試,好似前世冇考過咁⋯」

殷書賢放空咗一陣之後,再次拎起鎅刀,喺中段嘅位置落刀





「至少大腦可以清醒啲⋯」殷書賢抬起頭望住天花板,喺感受住刺痛感走遍全身同時喃喃自語道,「清醒先可以溫書⋯今次一定要考番第一番嚟⋯」



「今日係唔係週會?」趙遠寧眼見差唔多夠鐘先懶洋洋咁坐起身

「嗯。」殷書賢微微點頭,手上拎住cal機做緊M2嘅功課

「謝澤謙人呢?」張思群起身嘅時候發現謝澤謙唔喺位

「唔知喎,佢啱啱話去一轉教員室。」趙遠寧講道,「仲未番嚟咩?係唔係比人捉咗去訓話?」

「無端端做咩訓話?」張思群問道,下一秒就起身行去趙遠寧嘅座位,順手喺經過殷書賢隔離嘅時候拍佢一下,「算啦,落咗去先啦,週會遲到會好煩。」

喺打鐘前五分鐘,謝澤謙一臉悠閒咁行過嚟同佢地匯合





「你去個教員室去咁耐嘅?」張思群問道,「仲以為你消失咗。」

「喺我打算番上嚟嘅時候見到Miss Hui,比佢捉住講咗兩句⋯」謝澤謙望一望殷書賢,殷書賢一臉疲倦咁垂低頭,都冇專心聽謝澤謙講咩,「殷書賢!」

「咩呀?」殷書賢醒一醒,抬頭望住謝澤謙

「醒啦!仲瞓!」謝澤謙笑一笑講道,眼睛下意識就朝殷書賢嘅手望咗一眼,諗起啱啱Miss Hui提起順便吩咐佢嘅事

「我想你幫手留意一下殷書賢嘅情況。」「吓?點解?」

「嚟緊就嚟考試,我留意到佢嘅狀況好似唔係幾好,你地咁friend,幫手留意佢多啲。」「問題就一定冇嘅,但係我覺得佢最近冇咩嘢,佢一直都係咁。」

「你地咁friend,我唔知佢有冇同你地呻過或者點樣,但我都希望係我多心睇錯,所以先希望你作為好朋友嘅留意下。」





聽到呢度嘅謝澤謙諗起嗰日瞄到殷書賢嘅手,本來佢仲以為係自己眼花睇錯,但宜家連Miss Hui都咁樣講

「哦⋯好呀冇問題呀!我會睇住佢!」謝澤謙笑住答應,當然冇將佢當日睇到嘅嘢講比Miss Hui聽

謝澤謙望住殷書賢,佢都希望嗰日係佢睇錯,但似乎已經從側面證明咗佢冇睇錯,殷書賢嘅手上真係有啲嘢

「打鐘啦,番位排隊啦。」趙遠寧講完就轉身行到自己學號要企嘅位置



E班嘅體育堂啱啱上完,殷書賢同謝澤謙佢地一齊喺更衣室

「喂! 趙遠寧!你係唔係小學雞呀!」趙遠寧見謝澤謙將衫從褲頭拉番出嚟,幼稚咁伸手捉住謝澤謙嘅衫角一手掀起

「又唔係冇睇過!你一個大男人怕咩啫?」趙遠寧笑道,下一秒又想調皮咁玩多次





「你讀書讀到痴咗線係唔係呀?」謝澤謙拎起自己放喺書包嘅校服,邊拎邊後退,行到去殷書賢所在嘅獨立格嘅門前

「你換衫呀?一齊呀!」謝澤謙見殷書賢冇鎖門,直接就推門入去

「痴咩線呀?邊個要同你一齊換衫呀!?」殷書賢即刻嫌棄又慌張,因為佢將運動衫嘅風褸除咗落嚟,但又未趕得切著番長袖冷衫

「喂趙遠寧!」謝澤謙啱啱除咗上身嘅運動衫,趙遠寧就直接推門入嚟,「你真係痴線㗎!你出去著衫啦!著住背心周圍行好變態呀!」

殷書賢一臉無奈咁輕皺起眉頭,佢即刻將兩隻手套咗入去冷衫嘅衫袖入面先,正要彎腰拎起止汗劑再用一次嘅時候,趙遠寧推開門入咗嚟

「點呀逼晒喺度⋯」殷書賢回頭一望,見到謝澤謙同趙遠寧都喺佢身後,「其實一格好細,你地喺度好逼⋯」

殷書賢見兩人冇反應,迅速咁著好冷衫,收起止汗劑,拎起書包一個側身避開兩人行出獨立間





「你去圖書館呀?」坐喺一旁嘅櫈上等緊兩人嘅張思群抬頭望殷書賢

「嗯,你等佢地啦,我行先啦。」殷書賢回頭望一眼仲邊玩邊換衫嘅兩人,無奈咁拍一拍張思群嘅膊頭

「嗯,拜~」張思群微微抬一下下巴,然後睇住手機等佢地搞掂

謝澤謙邊將裇衫套入褲頭邊探頭望出去,見殷書賢直接就行去更衣室門口開門出去

殷書賢行去小食部,先買咗盒嘢飲打算飲完先上去圖書館,差唔多飲到最底嘅時候,邱茗然落到嚟小食部

「嗯?」邱茗然見到殷書賢企喺離垃圾桶只有幾步距離,邱茗然喺近嘅距離輕輕一躍跳到殷書賢嘅面前,「喂!上完PE堂呀?」




IG Link: https://www.instagram.com/nd_cotttoncandy/?hl=zh-tw