【校園】想成為您的治癒: 110. 疲累

張思群望住殷書賢，唔洗睇佢表情都知佢心情超唔好，因為只要微微探頭就可以睇到殷書賢明顯地煩躁咁掀卷，寫字都好似好快好大力

最近殷書賢都係喺呢個微跌嘅狀態，成績好似突然跟唔上一樣，精神狀態都唔太好，做練習嗰陣好辛苦先可以集中精神

「叮噹叮噹⋯叮噹叮噹～」落堂嘅鐘聲響起，一敬完禮落堂

殷書賢好快咁就幾份卷塞咗入櫃桶，然後起身準備離開座位

「我地落小食部，你去唔去呀？」謝澤謙見殷書賢起身，即刻叫住佢





「去廁所，轉頭落嚟。」殷書賢伸手將校呔稍微扯鬆少少，直接喺佢地身旁行過

「咁你食咩呀？幫你買埋先。」謝澤謙講道

「是旦啦。」殷書賢講完就直接行出課室

「睇嚟係心情唔好。」張思群無奈咁聳肩，「可能因為最近嘅小測問題掛⋯」

殷書賢行入廁所，見廁所冇人就即刻行入廁格，拎出鎅刀，喺再有人推門入嚟前即刻推出刀片⋯





「你地見咗Miss Hui未？」行喺最前面嘅趙遠寧轉身望向另外兩人，「其實我覺得見嚟冇咩用⋯」

「Miss Hui話怕我地壓力大嘛～」張思群聳肩，「我琴日見咗啦，你見咗Miss Hui未？」

「琴日小息咪見咗。」謝澤謙講道，「殷書賢好似未見Miss Hui⋯」

「可能聽日掛～」張思群聳肩，然後細聲講道：「我懷疑Miss Hui將成績愈好嘅人排得愈後，佢月頭已經開始每日見幾個，一定唔係跟學號啦！」

「可能掛⋯」謝澤謙聳聳肩





自從上次偶然望到殷書賢嘅手加上Miss Hui話殷書賢嘅狀態唔太好之後，謝澤謙就有啲擔心

「殷書賢本來就唔係特別中意講自己嘢嘅人，要佢開口同我地講好難⋯」謝澤謙上次對Miss Hui講道，「但我會盡量同佢傾下。」

謝澤謙都唔識開口同殷書賢講，佢地本來都唔會特別講呢種事，佢係關心兄弟但唔識開口去關心佢、開解佢

「冇流血啦⋯」殷書賢用指腹輕掃過新鎅嘅傷口，眼見指腹上冇血跡，殷書賢將衫袖拉番落嚟

謝澤謙眼見殷書賢同平時一樣朝佢地行過嚟，謝澤謙嘅目光不禁落喺殷書賢嘅手上，但好快又將視線移開

「嘢食，嘢飲。」謝澤謙將佢幫殷書賢買嘢嘅遞比殷書賢

「唔該。」殷書賢接過嘢食同飲品，就好似平時一樣

「你最近好攰呀？狀態都咁差咁嘅？」謝澤謙開口關心咁問道





「Okay啦，溫書溫到攰，個人有啲冇精神啫。」殷書賢淡然地講道

「可能都只係近排壓力大，所以先鎅兩下啫⋯應該唔嚴重⋯」謝澤謙喺心裏遲疑咁講，佢當然知咁樣唔係好事，但佢亦好難開口問殷書賢，「近考試大壓力都正常嘅⋯特別係殷書賢今次一定要考番第一名⋯」

「殷書賢你見咗Miss Hui未呀？」趙遠寧喺謝澤謙開口嘅前一秒先一步開口問道

「未，聽日放學。」殷書賢平靜地講道，語氣都特別平淡，佢同平時完全一模一樣

「殷書賢你快啲回復狀態啦！」張思群伸手勾過殷書賢嘅膊頭，「幫你對卷見到有careless mistakes真係好唔慣，平時都係剔兩下就改完㗎嘛！」

「嗯。」殷書賢點頭，表面睇起嚟佢好似好平靜，但心入面已經煩躁咗好多次：「如果一直咁樣集中唔到嘅話，考試嘅話點算⋯？成績會唔會再跌⋯？」

每過一日，考試就近一日，一個考試好似已經要將殷書賢壓低一樣，喺其他人眼中，可能係殷書賢嘅抗壓力低，但外人眼中所見嘅，同佢真實承受緊嘅嘢，又係唔係真係同一回事？





就算再點樣解釋比所有人知佢嘅感受，但又有幾多個人可以真正咁明白佢嘅受壓點？

「去到DSE嘅會冇問題。」殷書賢講道，「只係最近有啲⋯攰⋯」

「哦～果然係我地嘅學霸～」趙遠寧一臉激動咁捉住殷書賢搖嚟搖去，雖然唔太明白點解係佢激動

「你都chur得太盡啦掛⋯真係唔洗瞓⋯」謝澤謙皺着眉頭，「Miss Hui實問你讀書嘅嘢⋯」

「咁佢咪問，又冇點嘅。」殷書賢將又空又油嘅膠袋掉入垃圾桶，將飲管從檸檬茶嘅盒上拆咗落嚟，「你地見晒啦？」

「我地見咗啦，差你。」張思群靠住殷書賢企，幾乎係用殷書賢嚟借力

「你好重。」殷書賢用手肘將張思群頂開

「壓力大嘅話記得搵我地打機。」謝澤謙有意無意咁提道，「不過唔好比你媽發現。」





「好呀⋯」殷書賢輕輕一笑，但佢自己知宜家成績微跌嘅狀態下，佢更加要努力

喺番上課室嘅時候，殷書賢同謝澤謙兩人行喺後面，跟喺張思群同趙遠寧嘅身後行

「你真係Okay？」謝澤謙突然追問殷書賢一句

「吓？Okay呀，同平時一樣。」殷書賢對於謝澤謙突然嘅追問感到疑惑，「做咩咁問？」

「咁最後一次大考啦嘛，你又好似好攰好大壓力咁，關心下你。」謝澤謙講道，「冇嘢就得啦，要打機搵我。」

「多謝晒。」殷書賢笑道，「不過我Okay。」

⋯





「茗然，你行未呀⋯？」張萱淇拎住西史書走近邱茗然，但卻喺離幾步嘅時候停咗落嚟

「哦，行得啦。」 邱茗然拎起西史書，起身行喺張萱淇嘅身旁

兩人一齊行出課室，但就有種明顯嘅隔閡感⋯冇人覺得自己有錯，大家都覺得自己冇做錯⋯

同最好嘅朋友有隔閡，係一種點嘅感覺⋯？就係「最熟悉嘅陌生人」

所有關係一旦有隔閡，就冇辦法輕易消除，就算係好朋友都一樣⋯

「最近我地好少講嘢⋯」邱茗然決定由自己先破冰開口，佢嘅笑容略帶點尷尬感，「有啲唔慣⋯」

「我以為⋯你想同許洛霏講嘢多啲⋯」張萱淇本來唔係想咁樣講，但一開口就講出晦氣違心嘅說話

邱茗然一愣，佢無言以對咁望住張萱淇，本來冇事嘅邱茗然因為張萱淇咁樣一講，即刻又嬲又無奈

「隨你點諗啦！」邱茗然沉着氣掉低一句後自顧自向前行

張萱淇窒咗一窒，佢冇諗過邱茗然會直接咁講，佢企喺原地呆咗一秒

「茗然聽唔出我係講緊晦氣說話⋯？」張萱淇心入面有一絲失望，「你就真係咁唔了解我咩⋯？」




IG Link: https://www.instagram.com/nd_cotttoncandy/?hl=zh-tw