【校園】想成為您的治癒: 109. 兩種態度

「嗯，咳咳⋯！」殷書賢因為比邱茗然嚇一嚇所以有少少嗆到

「你係唔係去圖書館呀？係嘅話等埋我！」邱茗然講完就直衝去買嘢飲

殷書賢將飲晒嘅紙盒掉到垃圾桶中，邱茗然啱啱好買完嘢飲，手上拎住盒蘋果汁行近殷書賢

「係唔係行後梯上去呀？」邱茗然問道，「行得啦！」

「嗯。」殷書賢轉身就行，邱茗然小跑上前行喺佢隔離





「話說今日我嗰班派咗數學嘅統測卷。」邱茗然提起今日嘅統測卷，睇起嚟心情好好，「48滿分嗰份，我今次考到36～你地班派咗未？」

「派咗。」殷書賢前腳行出小食部，啱啱轉個細彎要向後梯方向行去嘅時候，謝澤謙佢地啱啱好行到嚟小食部門口準備走，「仲以為你要話你唔合格。」

「咦～咁啱呀？」張思群嘅反應最快，佢好快就留意到隔離嘅女仔

殷書長沉默不語，佢就知比佢地見到，一定又比佢地笑一輪

「唔好阻住人，走啦走啦！」趙遠寧捉住張思群嘅後領，同謝澤謙一齊友好咁推住佢走





「比人捉住後領推走係咩事⋯？」邱茗然望住呢個情景覺得有啲滑稽，不過殷書賢似乎都見慣咗，佢完全唔在意就向前行

行近殷書賢嘅時候，邱茗然忍唔住微微耷低頭

「係止汗劑嘅味⋯」 邱茗然唔係嫌棄呢種味，只係一聞到就諗起上次件冷衫，覺得有啲難為情

抬眼一望之際，忽然間發現殷書賢好高大，比自己好似高好多好多

「難怪遮到太陽⋯」邱茗然行喺殷書賢身後偷笑，「會唔會係因為佢行高咗幾級⋯？」





邱茗然加快腳步追上殷書賢嘅步伐，同殷書賢並排而行，殷書賢見邱茗然突然跑快兩步行上嚟，下意識就望向佢

「嗯？」邱茗然見殷書賢望住佢，於是微微側着頭笑一笑，「冇咩。」

⋯

夜晚屋企食飯嘅時候，邱茗然捧住飯碗邊睇電視邊食飯，食兩啖飯又望一望電視，夾條菜又望一眼

「係喎茗然呀，你係唔係下個月考試？」媽媽忽然間問道

「哦係呀。」邱茗然回頭望媽媽一眼，然後又繼續邊睇電視邊食飯

「你把握時間溫書啦，眨下眼就考DSE㗎啦⋯」媽媽語重心長咁講

雖然喺邱茗然嘅耳中聽起嚟都只不過係口頭禪一樣嘅存在，但佢都只好只係將耳仔封起當聽唔到





「唉⋯又講啦又講啦⋯」邱茗然喺心中疲倦咁嘆氣，「佢又開始講啦⋯」

「茗然你聽唔聽到我講咩呀？」媽媽見邱茗然冇反應便追問道

「嗯。」邱茗然反應極冷淡，完全係將「唔想聽」嘅想法直接放到面上

「你唔好淨係嗯咗我就算呀，你唔好轉個頭又⋯」「食飯啦，啲嘢都凍晒啦。」

爸爸及時開口打斷媽媽講嘢，其實呢間屋入面除咗媽媽講唔厭之外，其他人都已經聽到耳仔痛

「做咩打斷我啫？」媽媽輕皺起眉頭望向爸爸

「食飯就食飯啦，講嚟講去都係呢啲，你唔攰我地都攰。」爸爸怕咗佢，都唔驚媽媽嬲就直接咁樣講，「食菜啦！」





邱茗然望咗坐佢隔離嘅邱旻顥一眼，兄妹對視後偷偷地喺度笑

「溫書先⋯」邱茗然食完飯休息一陣行番入房，喺書包拎出為咗溫書而帶番嚟嘅嘢

食完飯又到咗安靜溫書嘅時候，邱茗然望一望時間，預計好今日嘅溫書時間後就拎起筆

⋯

「叩叩—」「叩叩—」

「嘖⋯」殷書賢聽到一直傳嚟嘅敲門聲就覺得煩躁，佢放低筆，扭動門柄同時傳嚟「噠」一聲

「你做咩鎖門呀？」媽媽推開殷書賢嘅房門，「咁多人喺屋企洗唔洗鎖門？」

「溫緊書。」殷書賢行番去書枱坐低，佢感覺好快又要溫唔到書





「你溫書咪溫書，洗唔洗鎖門？」媽媽企喺一旁望住殷書賢嘅考試時間表

「我想專心溫書。」殷書賢面無表情咁回頭望一望佢嘅媽媽，眼見媽媽一直望佢嘅考試時間表，殷書賢直接將貼喺書枱嘅時間表摵落嚟遞比媽媽，「你拎去睇啦。」

媽媽無言以對，默默咁接過時間表，佢正想再講啲咩嘅時候，殷書賢好似預知佢會講嘢一樣即刻搶先一步開口：「你次次喺我溫書都要入一入嚟我房，我集中唔到精神。」

殷書賢已經因為顧及媽媽嘅感受而忍耐咗好多次，一次又一次嘅忍受令佢終於都係受不了，佢今次選擇無視呢啲事直接了當講清楚

媽媽望一望殷書賢，總覺得佢個仔嘅態度愈嚟愈冷淡，佢唔覺得自己打擾到殷書賢，但殷書賢嘅想法同佢正好相反

「我可以有幾打擾到你？」媽媽皺起眉頭追問一句

「你要我考第一，我就要集中精神溫書先考到。」殷書賢反駁道，佢知道佢媽媽最在意嘅事係佢考唔考到第一名，只要用呢個理由就足夠應付有餘





媽媽即刻啞口無言，佢當然想佢個仔考第一名，上一次佢已經失望咗一次，佢絕唔容許佢個仔再考一次第二名番嚟

媽媽只好默默咁行出殷書賢嘅睡房，將房門閂上，媽媽自己都忍唔住嘆氣，佢個仔對佢嘅態度點解就咁冷淡？

⋯

距離1月中嘅考試大概仲有四個星期多啲

「同前後或者隔離交換對卷啦。」因為唔係計分嘅test，所以老師都唔特登收嚟對，叫佢地互相對卷就算

殷書賢同張思群交換嚟對，Miss直接比佢地對晒答案先講解，張思群拎起紅筆，剔幾題後皺一皺眉，剔幾剔又皺起眉頭

「喂⋯！」張思群細聲咁叫咗殷書賢一聲，「你咩事呀殷書賢？你都會錯呢啲careless mistakes㗎咩？」

「係咩⋯」殷書賢面無表情咁回答，手拎住紅筆一直幫張思群改卷，雖然語氣上嚟講係唔太在意，不過佢卻係眉頭深鎖

張思群改晒成份卷之後一臉不解咁望一望殷書賢，因為佢圈起咗錯嘅地方全部都係唔會喺殷書賢身上出現嘅錯誤

「搞咩呀你⋯」張思群寫好分之後幾卷還番比殷書賢，「錯咁多大意位嘅？你唔夠瞓呀？」

殷書賢默默咁同張思群交換番份卷，佢掀開卷睇一睇，全部都係佢平時唔會錯嘅嘢嚟，全部都係大意嘅錯

「你最近做咩成日錯呢啲嘢？」張思群不解咁問

最近嘅小測都係啲唔計分嘅小測，都係張思群幫殷書賢改，但最近殷書賢好似變咗個人咁，錯嘅地方變多，可以計錯數，可以寫錯嘢，可以串錯字⋯

「嘖⋯」殷書賢自己都對咁樣嘅自己唔耐煩




IG Link: https://www.instagram.com/nd_cotttoncandy/?hl=zh-tw