殷書賢喺落堂之後去到教員室搵Miss Hui,Miss Hui從教員室行出嚟

「今日到你啦書賢?」Miss Hui微微一笑,平時都係學生自動嚟搵佢,佢班嘅學生都係好獨立嘅人,好多事佢都唔洗煩

「嗯。」殷書賢微微點頭

「你都知嚟緊大考,而且好快又到DSE,我都知我地班嘅壓力比其他班都大,主要都係擔心你地壓力大,了解下你地嘅情況。」Miss Hui微微一笑,佢拍一拍殷書賢嘅膊頭,「唔好喺教員室門口講啦,去嗰邊再講啦~」

Miss Hui行喺前面行離教員室嘅門口,殷書賢跟喺Miss Hui身後行到去輔導房嘅門前





由Miss Hui話怕佢地壓力大,想單獨同佢地逐個傾下嘅嗰刻開始,殷書賢嘅內心唔知點解有種不安感冒出,總係覺得渾身唔自在,心跳比啱啱跳得更快

「你坐啦,唔洗拘謹。」Miss Hui伸手示意殷書賢先坐低,殷書賢拉開櫈坐低喺Miss Hui嘅對面,「嚟緊考試,開始溫書未呀?」

「開始咗。」殷書賢嘅回答一如既往咁簡短又直中重點

「其實你喺我嗰班已經係第三年,你學業上嘅優秀亦都係大家有目共睹,一直都係全級第一嘅名次。」Miss Hui微微一笑,言詞間好似直接表明意思,但又冇講得好清楚,「不過作為班主任,我都會擔心你地心理健康狀況。」

「我狀況好好,冇咩問題。」殷書賢吞一啖口水後有啲緊張咁開口講道,「最近都係溫書準備考試。」





「你一直都好勤力,我擔心嘅係你會唔會壓力過大⋯」Miss Hui又講道,「平時你都係用小息時間溫書,我都知你屋企人比你嘅壓力唔細。」

Miss Hui早就喺家長日見識過殷書賢嘅媽媽比殷書賢嘅壓力,明明個仔好優秀,但仲要一直要佢更優秀

中五嘅下學期,Miss Hui一將成績表拎出嚟,殷媽媽即刻就睇名次,見到係第二名之後表情瞬間嚴肅起嚟;殷書賢嘅臉上掛上做錯事一樣嘅表情

無論Miss Hui點講都好,殷媽媽都唔接受殷書賢考第二名呢件事

「你好叻仔,每一科都一直可以維持喺第一名嘅水平,當然將來大學嘅出路好多選擇比你揀。」Miss Hui微微一笑講道,「但就算要一直考第一,都要適當處理壓力,唔好收喺心入面。」





Miss Hui似乎想令殷書賢放心同佢講,但殷書賢就更擔心,偏偏喺最近疑似被發現,Miss Hui講嘅每一句都特別容易令殷書賢保持距離

「唔會。」殷書賢諗都冇諗就直接回答,「冇壓力大,我慣咗㗎啦。」

「愈近考試同DSE,你有冇覺得好大壓迫感?你大可以直接講,只係大家傾下計。」Miss Hui想引導殷書賢講,但殷書賢偏偏唔講

「Miss Hui,我真係冇大壓力,考DSE有少少壓力都好正常。」殷書賢聽到Miss Hui嘅追問後更為不安,放喺枱底嘅手不自覺咁拉一拉衫袖,但亦盡量保持冷靜,「我諗我地班個個都係咁,個個都想成績好,而且⋯Miss Hui你都知,我地班係精英班就更加唔可以鬆懈。」

「唉⋯」Miss Hui擔心咁嘆一口氣,佢本來想殷書賢自己講,但宜家佢唔可以唔開門見山咁講,「書賢,你喺我嗰班三年,你嘅成績好優秀,但最近你嘅狀態令我呢個班主任好擔心。」

殷書賢沉默不語,佢下意識就耷低頭,手微微顫抖着,因為佢知道自己手上嘅傷痕比人發現咗

「我開門見山講啦⋯你由中五下學期開始,就成日著住長袖冷衫,而當中嘅理由係咩你自己應該好清楚。」Miss Hui一臉擔心咁講道,作為班主任,佢有看顧學生嘅必要,亦要照顧好學生,「我已經見到你手上嘅情況,舒緩壓力嘅方法有好多,但係呢個絕對唔係好嘅方法。」

殷書賢拉住自己嘅衫袖不禁瞳孔地震,目光根本冇辦法冷靜咁落喺一點上,佢感覺到自己由手變到成個人都微微顫抖





佢係殷書賢嘅班主任,但宜家先發現殷書賢嘅狀況令佢覺得自己對學生冇足夠嘅關心

作為精英班嘅班主任,好清楚精英班比其他普通班承受嘅壓力更大更多,但佢就偏偏冇留意到殷書賢呢個學霸嘅心理狀況

「Miss Hui,我宜家已經冇鎅手⋯」殷書賢嘅目光四處浮動,佢對班主任講咗一個大話,「我手上面嘅係舊傷痕⋯!唔係新㗎⋯係之前留落嚟嘅疤痕⋯」

Miss Hui正想開口講啲咩,殷書賢即刻帶住堅定嘅眼神開口:「宜家我真係冇,Miss Hui你信我⋯!」

「我會打電話比你嘅家長,同佢地講明呢個狀況。」Miss Hui一臉嚴肅咁講道

聽到呢度,殷書賢就冇辦法平靜落嚟,佢一下子激動咁企起身懇求Miss Hui:「唔得!唔可以比我媽知㗎!Miss Hui,我求下你唔好同我媽講!」

一向冷靜嘅殷書賢喺呢一刻變得好激動,Miss Hui心入面都有啲嚇親,望住眼前嘅學生,Miss Hui可以理解佢,但唔可以幫佢隱瞞





「你可唔可以解一解開袖口鈕比我睇一睇?睇完我再決定。」Miss Hui露出擔憂嘅神情講道

殷書賢有啲猶疑,但既然事情已經穿煲,佢都冇得再隱瞞落去;殷書賢將袖口鈕解開,將衫袖推起,露出滿佈傷痕嘅左前臂

佢自殘嘅情況,連Miss Hui都因為覺得慘不忍睹而眉頭深鎖

「Miss Hui,真係唔可以比我媽知道⋯!你唔好打電話比佢!」眼見Miss Hui沉默不語,殷書賢即刻慌張起嚟,「我真係冇再鎅手!真係冇!真係只係舊傷痕!唔好同我媽講⋯!佢會對我好失望!」

「我明白你唔想屋企人擔心嘅想法,但係你嘅情況太嚴重,雖然你話已經冇再鎅手,但我覺得有必要比你屋企人知道你嘅情況。」Miss Hui皺起眉頭,臉上係滿滿嘅擔憂

「但係⋯!」殷書賢再想講啲咩嘅時候,Miss Hui提手示意殷書賢唔洗再講

「如果你真係冇再鎅手當然係最好,但我都會突擊檢查。」Miss Hui輕皺着眉頭,「書賢,你咁大個仔,嚟到中六啦,我諗你都唔係小朋友要我幫你做好決定,你如果需要見社工,我可以幫你安排。」

「唔洗啦,我冇事⋯」殷書賢又冷靜落嚟,冷淡咁回答道,「真係。」





「如果再有呢種情況,下次就係一定要見社工,不過既然你話冇,我都會信你。」Miss Hui講道

嚟到中六,佢唔會一直以對老師、長輩嘅姿態喺學生面前,佢都可以係學生嘅朋友

「知道。」殷書賢點一點頭

Miss Hui要突擊檢查即係完全唔比機會殷書賢再有呢個行為,就算殷書賢嘅內心千萬個唔願意,但Miss Hui堅持要咁樣做以作監管,殷書賢再唔願意都要做

「今日就到呢度啦,有咩問題嘅話可以同我講,又或者同朋友講都係一件好事。」Miss Hui行出輔導室,伸手拍一拍殷書賢嘅膊頭




IG Link: https://www.instagram.com/nd_cotttoncandy/?hl=zh-tw