【校園】想成為您的治癒: 114. 不可控

張萱淇番到課室，見到邱茗然坐喺位睇緊手機，佢將書包放低後行去開locker

「冇嘅～朋友都未必係一世，你咪當失去一個朋友囉～」

張萱淇諗起李雨揚喺佢訴苦嘅時候講嘅說話

「我唔係想冇咗個朋友⋯」張萱淇喺心裏對自己講道，「我要去道個歉⋯！」

張萱淇開完locker放好嘢之後，鼓起勇氣直接行到去邱茗然嘅座位





「唔⋯一唔一齊去小食部⋯？」張萱淇細聲咁問邱茗然，「我想買嘢食⋯」

兩個人行出課室，就算係一齊行都仲有啲尷尬嘅感覺，大家都冇講嘢，只係一直朝樓梯嘅方向行去

「嗰日對唔住⋯我只係講晦氣說話⋯」張萱淇掙扎咗一陣決定先開口，「我當你好朋友，所以先咁著緊⋯」

「嗯⋯」邱茗然嘅視線浮動着，以喉嚨發音回答一個字

「你應該了解我㗎⋯」張萱淇心裏後悔嗰日講嘅說話，有啲難過咁耷低頭





「嗯，了解⋯」邱茗然緩緩點頭，然後鬆一口氣一樣搖搖頭，「我冇嬲⋯」

「咁⋯我地仲可唔可以好似以前咁⋯？」張萱淇一臉擔心，佢怕因為咁樣而令佢地真係疏遠

「可以呀，當然可以⋯！」邱茗然即刻點頭，以最快嘅速度比回應

「茗然呀～你唔喺度我好寂寞呀～」張萱淇眼見邱茗然點頭，即刻伸手攬住邱茗然，「有嘢分享都唔知同邊個講好⋯！」

「我都係⋯」邱茗然扁起嘴，拉住張萱淇嘅衫袖，「晏晝食飯嘅時候一定要講番晒！」





「好呀好呀！」張萱淇高興咁笑，最近佢都冇點笑過就真

張萱淇側着頭望住邱茗然，心入面鬆咗一口氣，佢成個星期都好擔心佢地嘅友誼小船真係會說反就反

⋯

「呢個星期發生咗好多事⋯」邱茗然嘅雙眼放空，但大腦仲運轉緊，「唔⋯多到唔知由邊度講起先好⋯」

「我地班嘅話冇咩大事呀⋯即係有花生啦⋯？」張萱淇稍微思考同回想一下，然後先開口問一句：「唔⋯例如呢⋯？」

「哎⋯」邱茗然又嘆一口氣，「就係⋯有個朋友心情麻麻地，我唔識安慰佢⋯見佢唔開心但又冇咩辦法咁⋯」

「邊個呀？許洛霏？」張萱淇第一個諗到嘅人就係許洛霏，但邱茗然卻一臉無奈咁搖頭

「你估下⋯」邱茗然微微耷低頭，手整一整校呔又拉一拉衫袖，唔係幾好意思直接講出嚟





「你講你個學霸呀？」張萱淇即刻get到邱茗然嘅意思，即刻湊前細聲問道

邱茗然冇講嘢，臉上仍然係掛住無奈嘅表情，但張萱淇直覺覺得佢估中咗，拎起嘢飲嘅同時偷笑

「人地唔開心同你有咩關係呀～」張萱淇笑問道

「冇咩關係呀⋯」邱茗然嘅拎住飲管，將沉喺最底同檸檬茶分開嘅糖水攪勻，「只係⋯唔想佢唔開心嘅意思⋯」

「你都幾⋯直接㗎喎！」張萱淇係女仔，自然明白邱茗然深一層嘅意思，「咁你叫佢有唔開心同你呻呀～」

「有呀，我有同佢講有唔開心嘅話可以同我講⋯都唔瞞你啦⋯」邱茗然托住臉頰嘅左手輕輕捏咗自己嘅臉頰一下，「唔⋯嗯，就係，同佢講咗話佢放負我都會喺度聽⋯」

「你都講得好隱晦下。」張萱淇笑一笑，「真係要人估你想講咩，佢會唔會聽得出？」





「你明我意思咪得囉～唔想講到咁白嘛～」邱茗然托住下巴，吐一吐舌頭，「佢應該冇發現就係啦。」

「幾時嘅事呀？幾時開始對佢變成咁？」張萱淇好奇咁追問，「快啲講幾時！」

「唔⋯」邱茗然垂眸望住面前嘅凍檸茶沉思，然後對張萱淇笑着講道：「唔知係邊一刻邊一秒，但總之就係宜家咁樣啦～」

「咁總會有個觸發點㗎嘛！」張萱淇唔滿意邱茗然呢個回答，即刻就反咗個白眼，「咩叫總之啫？過程呀我要過程⋯！」

邱茗然冇講嘢，張萱淇諗咗一諗之後好似諗到啲咩一樣，笑住伸手拉一拉邱茗然嘅手

「咩呀？」邱茗然望住張萱淇嘅笑容滿面有啲疑惑咁挑起眉

「係唔係上次喺圖書館？」張萱淇回想邱茗然同佢講過嘅嘢中最有機會啱嘅事，「喂喂～你以前唔係話你中意好似你哥哥咁，溫柔刻喺骨入面嘅男仔咩？」

「嗯⋯」邱茗然將視線移開，迴避張萱淇嘅目光後低聲回答，「的確係中意溫柔嘅男仔⋯」





邱茗然唔直接承認，但從佢略帶點羞澀嘅表情，迴避目光嘅反應就可以知道問題嘅正解

「你會唔會同佢講？好似嗰陣咁。」張萱淇好奇另一個問題

「唔肯定，但應該⋯就唔會，佢同諭哥哥唔一樣⋯」邱茗然搖搖頭，講完之後好快又再補充，「我嘅意思係感覺嚟講唔一樣⋯」

「我知～」張萱淇笑着點頭

「佢份人淨係諗讀書，點會諗其他嘢呀～」邱茗然笑言，「同佢講咩都好，只有讀書嘅話題最啱佢～不過，佢比人嘅印象同我見到嘅佢好唔同，雖然佢話佢唔啱笑容，但我覺得笑容都啱佢。」

「知啦知啦～」張萱淇留意到邱茗然笑容裏收起嘅一點甜，張萱淇就忍唔住露出笑容，見到邱茗然開心，佢都會跟住一齊開心，「見到佢嘅另一面好開心啦？」

「一開始都冇咩特別，不過當發現自己真係知道連佢啲friend都唔知嘅一面嗰陣，真係會偷偷開心⋯」邱茗然笑道，「你都係咁諗㗎～對你個補習同學。」





「哎，唔好提佢啦⋯」張萱淇頓時一臉沒好氣，「佢真係又渣又直接，佢講到咁出面，你真係嬲又唔係唔嬲又唔係！」

張萱淇對邱茗然講出最近佢同李雨揚發生嘅事，講兩句就忍唔住要反個白眼，因為李雨揚呢個人真係令張萱淇嬲唔落

「我覺得佢係睇穿咗我對佢有feel，所以先咁講。」張萱淇無奈咁搖搖頭，「渣到死⋯」

「佢再渣男，你咪又係中意佢～」邱茗然笑道，「有時就係咁無奈，佢明明唔係你心入面嘅理想型，但偏偏令你情不自禁咁著迷。」

「唔代表佢可以咁理直氣壯囉！」張萱淇略帶點嬲嘅感覺講道，「不過隨佢嘅便啦～反正我都唔想特登去改變啲咩～」




IG Link: https://www.instagram.com/nd_cotttoncandy/?hl=zh-tw