【校園】想成為您的治癒: 120. 他的朋友
殷書賢嘅右手托一托眼鏡之後搭到左手嘅前臂上不斷來回掃，最近總覺得左手好痕，搞到渾身唔自在
「喂殷書賢，出去行下啦！」謝澤謙起身拍一拍殷書賢
「做咩？」殷書賢回頭望一望謝澤謙，問完之後都唔等謝澤謙開口又擰番轉繼續溫書
「你唔洗休息咩⋯？」謝澤謙問道，「你已經係由朝早開始就溫書溫到瞓覺前一刻，你咁樣會唔會死？」
「最近成績有啲跌。」殷書賢講出佢要溫書嘅原因，「我Okay。」
殷書賢提手輕輕敲自己嘅額頭，感覺又開始記唔到嘢入腦
「唔⋯」殷書賢合埋眼記嘢嘅同時敲着自己嘅額頭，發出微弱嘅「咚咚」聲
「成績有啲跌⋯？」謝澤謙聽到殷書賢講嘅嘢後喺度回想最近操卷嘅情況，「冇呀⋯佢嘅成績都係班入面最top呀⋯佢講嘅跌咗係指⋯佢自己覺得嘅跌咗⋯？」
謝澤謙默默咁托住臉頰嘆氣，佢其實唔知殷書賢咁緊張做咩，但佢知道殷書賢嘅性格，佢唔會容許自己再一次跌落第二名
「屋企應該逼得好緊⋯」謝澤謙瞄咗殷書賢一眼，「如果唔係都唔會咁緊張⋯」
有時候，謝澤謙覺得殷書賢好慘，生於壓力咁大嘅家庭，明明可以選擇，但偏偏冇得揀，佢可以揀嘅，好似只有父母要求佢揀嘅路
「喂！去透下氣啦！」謝澤謙拍一拍殷書賢嘅膊頭，然後將佢拉起，拉住佢行出課室
「呯！」
天台嘅門呯一聲閂上，殷書賢有啲疑惑，望住謝澤謙行到矮牆前企，殷書賢走近佢，停喺佢隔離
「拉我上嚟做咩？我真係Okay。」殷書賢習慣性咁講出佢冇問題
「你真係Okay？」謝澤謙露出質疑、唔信任嘅表情，「最近Miss Hui做咩成日搵你嘅？」
「冇呀，講成績嘅嘢，佢怕我壓力大。」殷書賢微微低頭將冷衫嘅衫袖拉直，輕輕一笑又道：「明明我都話咗我冇嘢⋯」
「但事實唔係就係你係壓力大咩？」謝澤謙嘅雙手放鬆咁搭喺矮牆上
「做咩要講到咁翹口？」殷書賢笑一笑想轉移話題，「又唔係急口令。」
「你隻手咁樣⋯唔係因為壓力大咩？」謝澤謙本來想當冇事，但佢又忍唔住想問多句，「我只係怕你有日真係會死⋯」
「幾時睇到？」殷書賢問道，呢一刻會終於知道前嗰排謝澤謙做咩一直叫佢壓力大就搵佢地同佢地打機，原來係睇到佢手上嘅傷痕
「早一排咁啱望到，Miss Hui應該都係因為知道，所以先會搵你？」謝澤謙微微點着頭，佢擔心氣氛會變得尷尬，但佢的確係出於關心
「可以咁講。」殷書賢無奈咁承認，佢輕輕一笑，「不過最近都冇啦⋯都唔知Miss Hui幾時會check。」
「咁隔離班個女仔呢？」謝澤謙喺呢個時候忽然間提起邱茗然，「佢成日同你一齊，你有冇比佢知？」
「當初係佢執到我把鎅刀。」殷書賢冇直接回答，只係用一句簡單嘅說話就將答案講咗比謝澤謙知
「原來佢一早就知，連佢都知，我咁遲先知⋯」謝澤謙嘆一口氣，擺出失望嘅表情講道
「佢發現係一個偶然嚟。」殷書賢搖搖頭，「本來就冇諗住比人知。」
「喂，你有咩就同我地講知唔知？雖然男人同男人之間講到咁出面有啲嘔心，但真係怕你唔get。」謝澤謙講完都反咗個白眼，佢伸手拍一拍殷書賢嘅膊頭，「唔好死撐。」
「嗯。」殷書賢明謝澤謙嘅意思，不過有時面對佢地都會唔知點開口，「我Okay呀，慣㗎啦。」
⋯
邱茗然同張萱淇企喺走廊等緊Bio落堂，佢地未落堂，邱茗然佢地就番唔到課室
「你洗唔洗落去買嘢食？」邱茗然望一望時間後問張萱淇
「唔洗呀，今日唔係真係咁餓⋯」張萱淇側一側頭，探頭望向掛喺課室嘅時鐘，「今日又會咁遲都未落堂嘅⋯？」
「嗯⋯」邱茗然扁起嘴，背靠住身後嘅矮牆企，「又差唔多要清locker⋯唔想清呀，明明放完假之後好快又考試⋯！」
「冇計啦⋯」張萱淇聳肩，「Miss Li執嘢走啦喎～」
企喺門邊嘅男同學一見Miss Li執嘢走就即刻推門入去，急不及待咁衝入課室
「茗然我想去廁所。」張萱淇拉一拉邱茗然嘅手細聲咁道，「陣間陪我去⋯」
「好呀，等我擺咗嘢先～」邱茗然比咗個Okay手勢然後行番埋位，「好快好快～」
邱茗然行到埋位，殷書賢先執緊嘢，大概係啱啱抄筆記太專注
「今日做埋份西史essay⋯要帶西史書⋯」邱茗然蹲喺書包前面自言自語咁將西史書擺入書包，然後喺書包嘅暗格拎咗粒獨立包裝嘅朱古力放到枱上
殷書賢上身微微前傾準備企起身，但邱茗然拎咗粒朱古力擺喺枱，殷書賢就有啲猶疑咁又坐番好
「請你食。」邱茗然好似習以為常一樣將朱古力推到殷書賢嘅手邊
「又有朱古力⋯」殷書賢雖然有啲無奈，但佢都係伸手去接朱古力，「成日都有嘢食。」
「當然，我個書包係百寶袋～」邱茗然企起身細聲咁笑住講，「呢個係cookies’ and cream，好食㗎～」
「唔好食嘅話你會袋住？」殷書賢將朱古力袋到褲袋
「唔會～」邱茗然搖搖頭，殷書賢一拎起啲書，佢就將自己嘅書放低喺枱上，然後先一步轉身去搵張萱淇，「淇淇，行啦。」
IG Link: https://www.instagram.com/nd_cotttoncandy/?hl=zh-tw