【校園】想成為您的治癒: 121. 適當距離

「哎～」張思群喺邱茗然行開之後，即刻上前搭住殷書賢嘅膊頭，「有朱古力食真係好～」

「陣間去買咪有。」殷書賢面無表情咁回答

「對住咁可愛嘅女仔你都可以咁樣不為所動嘅⋯？」張思群回頭望一眼仍然企喺張萱淇座位嘅邱茗然，好奇咁多口問咗一句，「比著係我嘅話，實會有興趣嘛⋯」

殷書賢沉默不語，只係默默咁朝張思群望咗一眼，張思群見到殷書賢嗰個嚴肅嘅眼神，臉上嘅笑容即刻僵硬咗

「呃⋯」張思群吞咗啖口水，然後拍一拍殷書賢嘅背，「溫書，番課室溫書⋯我隨口講下啫⋯」





張思群偷瞄殷書賢一眼，默默咁嘆一口氣，稍微思考一下啱啱殷書賢嘅眼神嘅意思

「好想窒佢⋯」張思群心思思都講啲咩笑下殷書賢，「不過都唔知係唔係真，殷書賢嘅想法有時真係好～難觸摸⋯」

「茗然呀～我都想食朱古力呀～」張萱淇挽住邱茗然嘅手臂故意提道，「唔知我有冇得食呢～」

「咩呀～」邱茗然笑一笑，然後從裙袋拎出一粒同款嘅朱古力，「嗱，你都有份～唔好話我偏心啦～」

「耶～我都知你唔會偏心㗎啦～」張萱淇笑道，即刻拆咗粒朱古力嚟食，「不過只係提一提你啦，你唔好好把握機會嘅話，我地就畢業㗎啦～」





「吓⋯？咩意思？」邱茗然不解咁側着頭望住張萱淇，張萱淇見邱茗然微微側頭，佢都做出同樣嘅動作，定睛望住邱茗然

「咁我梗係講緊你個學霸啦～」張萱淇湊近邱茗然細聲咁講嘅時候，咁啱經過E班，佢指一指E班嘅課室示意

「吓？唔⋯」邱茗然思考完之後笑一笑聳肩，「唔知呀～再算啦～」

「咦～唔似你喎～」張萱淇輕撞邱茗然兩下笑言，「你以前唔係又主動又大膽㗎咩～」

「咁一定有個人令你變得小心翼翼嘅～」邱茗然行喺前面推開廁所門，回頭對張萱淇微微一笑，「我都話未有拍拖嘅打算，而且又唔係一定要講出口嘅～你都係咁啦～」





⋯

「你宜家同佢點？你個補習同學。」邱茗然食飯嘅時候忽然提起李雨揚

「唔⋯冇點呀，都係咁樣有時出街食飯囉～」張萱淇怔一怔後苦笑道，然後好似睇開咗一樣輕嘆一口氣，「不過，我覺得宜家同李雨揚呢個狀態幾好呀⋯」

「你真係滿足啦？佢話寧願曖昧，你都真係寧願曖昧呀？」邱茗然不解問道

「但其實由一開始都知同佢唔會有結果，最後都係咁樣完，做朋友好過做情侶呀～」張萱淇豁達咁笑道，「做朋友至少冇盡頭⋯我覺得我滿足㗎啦～睇下幾時遇到更好嘅人令我心動啦～」

「估唔到你睇得咁開就係啦⋯你好中意佢嘛～」邱茗然見張萱淇睇開咗，冇再因為李雨揚而悶悶不樂，佢都打從心底覺得開心

「平時都係專心喺屋企溫書啦～補習都專心補，我唔想因為佢影響我考唔到大學⋯」張萱淇無奈咁聳肩，「我有我嘅目標，所以一定要努力行去嗰個目的地。」

「我地淇淇大個女啦～」邱茗然一臉感覺，擺出就嚟要喊嘅表情、雙手合十講道，「我地一齊努力考DSE啦～」





「當然啦！如果讀到同一間U就好啦～」張萱淇開朗咁笑道，「所以我地一定要一齊努力呀！」

「絕對！」邱茗然以肯定嘅語氣講道，然後同張萱淇握住手，「我一定要讀到大學！」

邱茗然有讀大學嘅決心，雖然最近媽媽冇再成日提住佢考試考試、DSE同DSE

但邱茗然自己付出嘅努力都喺成績上睇到，至少喺成績上，佢知佢自己仍然一直有進步

「好辛苦咁先可以維持到宜家嘅成績，又可以有進步，不枉我每日又做練習又溫書溫到1、2點⋯」邱茗然一諗到佢最近兩個月嘅生活佢就忍唔住露出疲倦嘅表情，「今次考試就可以知我嘅努力到目前為止可以有幾多回報⋯」

「你真係每晚都係咁呀？我每晚都係溫到11點幾咋⋯」張萱淇不禁瞪大眼

「咁又未必每晚嘅，但一星期至少有三、四晚囉⋯」邱茗然食一啖飯、飲一啖汽水，「有時都好攰好想放棄，但我知自己一放棄一晚，就會放棄第二晚，唔可以比自己咁懶散⋯」





日復日嘅生活本來就好容易變悶，但邱茗然有自知之明，既然已經有目標就一定要朝住目標努力而行，就算好辛苦都要行過去

「而且一諗到考唔到大學嘅話，以後都要比我媽拎我同哥哥比較就覺得好煩⋯」邱茗然微微聳肩

「茗然係個睇起嚟唔太中意讀書，但意外地會好努力嘅人～」張萱淇笑言，「雖然日日都會抱怨溫書好煩、好多嘢唔識、唔想考試，但係番到屋企晚晚都溫書溫到好夜。」

「唔通我溫個書又要打鑼打鼓咁同人講咩⋯」邱茗然無奈道，「睇最後成績就知努力咗幾多啦⋯」

「你一定會考得好嘅～我對你有信心㗎～」張萱淇豎起手指公比個like，「我都會努力㗎！」

「咁希望我地考到同一間大學啦～」邱茗然拎起手邊嘅凍奶茶同張萱淇碰個杯，互相打氣

⋯

「叮噹叮噹⋯叮噹叮噹～」





「今日派番嚟嘅卷成績都唔錯嘛～」張萱淇望住邱茗然手上嘅卷，又望向自己手上嘅三份卷做比較，「咦，我同你差唔多分喎～西史同LS。」

「你偷偷地抄我㗎？坐咁樣都可以差唔多分嘅～」邱茗然開玩笑咁問張萱淇，然後將卷都收入功課file入面

「邊個要抄你？呢啲係實力～」張萱淇一臉自豪咁表示，臉上嘅笑容都比平時自信，「你真係當我去補習係為咗見嗰個渣男㗎？而且我番到屋企有溫書㗎！」

「關咩事呀？你補習唔係補中英文咩？」邱茗然輕皺起眉頭，憑佢嘅記憶，張萱淇係補呢兩科先啱

「係呀～」張萱淇聳聳肩，拎住三份卷番埋位擺入書包執嘢，「但都關事㗎嘛～一科成績好就會成為動力，令我想科科都成績好～」

「叻喎～」邱茗然孭起書包行到張萱淇嘅座位問道，「咁行未呀？送到你去樓梯口啦～」


 IG Link: https://www.instagram.com/nd_cotttoncandy/?hl=zh-tw