【校園】想成為您的治癒: 122. 依賴

「行得啦～你又去圖書館啦一定～」張萱淇孭起書包，行喺邱茗然嘅前面離開課室，「有人教係幾好呀～又有人同你一齊溫書，不過你可以專心到㗎啦？」

「我點解會專心唔到？我次次喺圖書館都超認真做功課溫書㗎好唔好？」邱茗然估到張萱淇想講咩，即刻反個白眼先，「番到屋企就難啲，如果唔係洗咩等10點幾先溫？」

「哦～我怕你好難focus嘛～」張萱淇露出意味深長嘅笑容，佢嘅話中有話，明顯係故意暗示比邱茗然知

「溫書還溫書啦，我知讀書緊要啲嘅！」邱茗然無奈咁輕撞張萱淇嘅手肘一下，「我分得好清楚㗎！」

「知啦！咁你加油啦！」張萱淇行到樓梯口，佢準備落去，邱茗然準備上去，「聽日見啦～」





張萱淇同邱茗然講完拜拜之後就同平時一樣自己一個踏出學校門口番屋企

「好唔好食啲嘢先番屋企呢？」張萱淇行喺路上嘅時候因為肚餓而喃喃自語咁思考着，「食咩好⋯？買個餃子番屋企？定食個M記好？唔⋯定係買個包好呢⋯？」

張萱淇邊行邊諗，行行下嘅時候忽然有個人擋喺佢前面

「企喺路中心想點⋯？」張萱淇喺心裏抱怨咗一句，然後繞過嗰個人又向前行

張萱淇行咗兩步之後，嗰個人又行到張萱淇嘅面前擋住佢嘅去路





「嘖⋯！」一直自顧自低頭沉思嘅張萱淇有啲唔耐煩咁抬起，一抬頭就見到企喺佢面前嘅，係佢識嘅人，「嗯？李雨揚？你喺度做咩呀？」

「食唔食嘢呀？」李雨揚笑笑口問張萱淇，張萱淇卻遲疑咁皺起眉頭

⋯

「你就係特登嚟搵我食嘢⋯？」張萱淇放低手上嘅餐牌，仍然有啲懷疑李雨揚忽然嚟到嘅原因

「可以咁講啦～」李雨揚望住侍應收走餐牌





「無事獻殷勤⋯想點呀？」張萱淇瞇起眼盯住李雨揚，「咁好死約我食飯做咩？」

「耐冇見你，約你食飯見下唔得咩？」李雨揚笑道，「最近約你又唔出嚟⋯」

「就考試啦，我要溫書㗎⋯！」張萱淇反咗個白眼，「你唔洗考試咩？而且上星期補習咪見過囉！」

「要考試呀～」李雨揚問道，「聖誕節出唔出去？」

「你想約我呀？好少可喎～今年冇女朋友就想搵人攝時間啦？」張萱淇笑問道

「我似啲搵人攝時間嘅人咩？」今次到李雨揚反個白眼，「你點可以咁諗我？」

「作為空調嘅你有咩做唔出？」張萱淇灘開手心示意，「我聖誕節要溫書！邊有咁多時間出去玩？」

「我唔信你放成個星期都日日喺屋企溫書囉！」李雨揚反駁道，不過下一秒佢又信咗張萱淇打算日日溫書，「咁一唔一齊溫書？再搵日一齊出去過聖誕呀～」





「考慮下啦⋯」張萱淇雙手捧住熱朱古力，偷瞄李雨揚一眼後喺心裏講咗句：「真係難觸摸⋯」

張萱淇抬眼望一望李雨揚，佢就好似平時咁睇手機冇咩異樣，張萱淇有啲鬱悶咁托住頭

「唉⋯真係唔知佢想點⋯」張萱淇喺心裏獨自吐苦水，「都唔知佢係真係想約我定當我係水泡⋯」

李雨揚抬頭後發現張萱淇望住佢，佢對張萱淇笑一笑，但張萱淇下意識就撇開臉唔望佢

「咩呀？」李雨揚直接問張萱淇

「冇咩。」張萱淇搖搖頭，心裏又道：「怕咗你就真⋯都唔知你係真心定假意⋯」

⋯





筆尖落喺紙上利落流順咁寫着，邱茗然寫咗幾句又停一停、諗一諗，然後又再埋頭落筆寫落去

「LS嘅essay搞掂⋯」過咗好一陣之後，邱茗然將枱上嘅essay收入功課file，喺佢嘅功課list上打個剔，「西史呢份就未寫⋯」

邱茗然拎出西史未做嘅essay，上面一早寫好晒佢要用嘅論點同比較點：「番到屋企再組織一下寫番做句子就搞掂啦⋯」

邱茗然打開schedule book望一望，睇下嚟緊仲有咩功課要交

「唔⋯都做齊啦～」邱茗然滿意地點頭，合上schedule book，伸個大懶腰，「做唔做埋西史份essay好⋯？」

邱茗然望一望時間，稍微思考一下番到屋企之後嘅時間分配：「唔⋯做埋啦⋯今晚用嚟溫西史⋯」

⋯

「轉個頭又番屋企溫書～」邱茗然挺直腰，喺等緊巴士嚟嘅同時鬆一鬆筋骨，「今日好大個太陽～」





殷書賢拎出喺褲袋嘅鎅刀，平時佢都會喺番到屋企前將鎅刀由褲袋轉移去書包嘅暗格

「你要鎅手呀？喺呢度。」邱茗然望到殷書賢手上嘅鎅刀

「點可能？」殷書賢將鎅刀收入書包，「最近都冇咩點用過⋯Miss Hui會好突然咁check⋯」

殷書賢嘅內心有啲蠢蠢欲動嘅感覺，佢想鎅手但係佢唔可以⋯佢知道佢唔可以⋯

「唉⋯」殷書賢忍唔住嘆一口氣，明明之前可以隨心所欲嘅事，宜家連做都唔做得，「都唔知佢幾時會check，冇機會⋯」

「都⋯係好事呀唔係咩？」邱茗然思考一下後再緩緩開口講道，「可能咁樣就戒咗呢～」

「唉⋯」殷書賢又嘆一口氣





「學霸呀學霸，你做咩一直嘆氣呀？」邱茗然笑一笑問道

「好痛苦⋯好想鎅手⋯」殷書賢抬起頭望住遠方嘅雲，佢知自己早就依賴咗呢種痛感，「但係唔得⋯但都係好想鎅手⋯好攰⋯」

「嗱。」邱茗然解開自己嘅袖口鈕，將衫袖推上去後將手提起遞到殷書賢嘅面前

「咩呀？」殷書賢望一望邱茗然雪白嘅手，然後不解嘅眼神望向邱茗然

「你唔係好想鎅手咩？」邱茗然露出開朗嘅笑容笑問道，「呢啲咁緊急嘅時候借比你用呀～不過要還。」




IG Link: https://www.instagram.com/nd_cotttoncandy/?hl=zh-tw