【校園】想成為您的治癒: 125. 未雨綢繆

喺邱茗然思考緊嘅時候，殷書賢察到來自邱茗然嘅目光，佢轉頭望向邱茗然，眼神就好似問緊「做咩？」一樣

「唔⋯」邱茗然抿着唇，緩緩開口問：「你地班寫唔寫聖誕卡？」

「主要都係女仔會寫。」殷書賢諗一諗上兩年嘅聖誕節後回答，「做咩⋯咁問？」

「冇呀～就係隨口問下，唔係就放假啦咩？」邱茗然聳肩

邱茗然一番到屋企，邱茗然即刻打開櫃桶，拎出最近買番嚟嘅聖誕卡，然後抽咗兩張最靚嘅出嚟





「係喎，影比淇淇睇先～」邱茗然拎起手機，拎起一大疊卡影咗張相比張萱淇睇

邱茗然再send多一個message比張萱淇：「最靚嗰張留起比你～」

「咁呢張⋯」邱茗然拎起放喺枱上嘅另一張佢抽咗出嚟嘅聖誕卡，「比殷書賢⋯？寫咩好⋯？」

⋯

喺聖誕假前兩日





「今日清locker呀！記得執走晒你地locker入面啲嘢呀！」Miss Li喺C班上完最後一堂後，從教員室上到嚟課室檢查，「唔好漏嘢喺櫃桶，全部清走呀！」

「算啦，聽日先係最後一日，聽日先執櫃桶都唔遲啦～」班上嘅男同學唔想一次過清走啲嘢，將一部分嘅書偷偷地塞入櫃桶

「一個二個同我拎晒啲嘢番屋企溫書呀！」Miss Li無奈咁講道，「唔執走啲嘢又想比訓導鬧係唔係？」

「好重呀Miss～」男同學比較厚面皮，完全唔打算真係今日清晒啲嘢

「唉～」邱茗然打開locker門，將留喺入面最重嘅嘢拎晒出嚟，包括中文、LS嘅厚file，仲有西史嘅file，「重呀重呀⋯！」





「茗然你留番最重嘅嘢喺度呀？」張萱淇攬住幾本未拎走嘅書，「最重嘅LS file我琴日就已經拎咗番去，今日淨係帶番份notes番嚟就算。」

「琴日唔記得咗清⋯難得琴日個書包仲咁輕，帶咗其他嘅番去⋯」邱茗然無奈地將啲嘢放喺枱上擺好，然後原路行番轉頭去閂上locker嘅門，「今日就要重死⋯」

「邊個叫你琴日放學唔執走喎⋯」張萱淇靠住隔離枱嘅枱邊坐，望住邱茗然面如死灰一樣嘅表情

「唔記得咗嘛⋯！呀⋯！」邱茗然將枱上嘅書一下子拎起抱喺懷中，「好重⋯！好彩哥哥話佢喺屋企附近嘅巴士站等我⋯」

「你就好啦～」張萱淇嘅語氣中係無盡嘅羨慕，「你哥哥咁好嘅？」

「我哥哥不嬲都咁好。」邱茗然從不否認呢一點，由細到大都對呢點好自豪

「好啦～咁拜⋯嗯？你今日直接走呀？」張萱淇正打算開口同邱茗然講拜拜，但就見到邱茗然同自己一齊落樓梯，「你今日唔去圖書館呀？」

「仲去！？啲書重到死，我仲要行上行落？」邱茗然將手上嘅書微微托一托示意，落樓梯嘅時候都好小心怕踩錯級，「我今日都係懶一日番屋企啦⋯」





「咁咪見唔到佢囉⋯ 最後兩日可以見佢啦⋯」張萱淇望住邱茗然擺出可惜嘅表情，下一秒就笑盈盈咁問邱茗然：「點呀？我係咪講咗你嘅心聲呀？」

「冇，完全冇。」邱茗然平靜咁搖頭，「佢唔係我去圖書館嘅重點。」

「咦～茗然睇下睇下～」張萱淇伸手輕輕一推邱茗然嘅手，「佢今日都番屋企，你地⋯約埋㗎？」

邱茗然跟住張萱淇望向同一個方向，見到殷書賢兩手空空咗企喺巴士站，同邱茗然嘅寸步難行唔一樣，佢睇起嚟好輕鬆

「咁啱啫⋯」邱茗然反咗個白眼，然後停落嚟同張萱淇講聲拜拜

邱茗然整理一下懷中嘅書，將就嚟跌一樣嘅書托番起少少，攬住一大疊重嘅書，書包又唔算輕，行起上嚟真係有啲艱辛

「嗨⋯」邱茗然行到巴士站，企喺殷書賢嘅旁邊打咗聲招呼，然後又將懷中嘅書向上微微拋一拋托番起





「嗨⋯」殷書賢皺起眉頭，望住邱茗然手上捧住嘅書有啲擔憂，「你好似拎得好辛苦。」

「我Okay⋯！」邱茗然承受住書包同手上嘅書嘅重，用力咁張開口回答，「我仲以為你會去圖書館⋯！」

「唔啦，清locker。」殷書賢搖搖頭，「啲書都喺屋企，去圖書館都冇用。」

巴士嚟到之後，殷書賢行喺前面上車，佢行到樓梯前，正要同平時一樣踏上梯級上去上層之際，已經微微提起嘅腳再次踩喺原地，轉身往下層後方嘅位置坐低

「今日坐樓下呀？」邱茗然捧住沉甸甸嘅書跟喺殷書賢身後

「嗯。」殷書賢坐低喺近窗邊嘅位置，邱茗然困難重重咁坐低喺佢隔離

「你唔洗清locker咩？」邱茗然望住兩手空空嘅殷書賢，書包都唔係脹卜卜咁樣，「你好似冇拎住好多嘢⋯」

「話今日一定要清晒locker嘅嘢，唔係叫你真係今日先拎走。」殷書賢望住邱茗然放喺腿上嘅一疊書無奈咁講道，「我一早就逐啲清走晒⋯」





「果然處女座都係咁未雨綢繆⋯」邱茗然望住大腿上成座山咁嘅書，「唉⋯搬到番屋企之後就冇力溫書啦⋯」

「同星座冇關⋯」殷書賢講道，佢又瞄一眼邱茗然嘅書，「你⋯自己拎唔拎到番屋企⋯？」

「我哥哥今日唔洗番學，佢話佢會喺巴士站⋯等陣⋯」邱茗然嘅說話講到一半，手上嘅手機就震起嚟，來電顯示寫係「哥哥」

殷書賢默默地撇開臉，畢竟望住人聽電話講嘢唔太禮貌

「吓！？但哥哥⋯我今日清locker⋯啲嘢好重⋯」邱茗然一個自然就用起撒嬌嘅語氣講道，「但你講咗喺巴士站等我嘛⋯好重呀⋯點拎到番屋企呀⋯！番屋企要行嗰條斜路咁長！」

「你又唔係第一日清locker！」邱旻顥講道，「我要番去補堂呀！唔補堂我死硬啦！」

「好啦⋯」邱茗然不滿又無奈咁扁起嘴，「我會努力㗎啦⋯我想食紅豆沙⋯拜拜⋯」





殷書賢望向邱茗然，邱茗然生無可戀咁耷低頭

「唉⋯」邱茗然嘆一口氣，「好重⋯」

巴士就嚟駛到邱茗然要落車嘅站時，邱茗然艱辛咁捧起疊書攬實行出座位企喺走廊，不過佢好似連起身企穩都有問題

「早知就早兩日逐啲執走啦⋯！」邱茗然嘅內心係後悔，因為宜家拎得太辛苦，「唉⋯番個屋企都好難呀⋯明明聖誕之後都要番多幾日學先考試嘛⋯」

「佢行唔行到番去⋯？」殷書賢望住隨住巴士行駛而搖擺不定嘅邱茗然有啲擔心，「會唔會到一半就跌親⋯？」

呢頭殷書賢咁樣諗一諗，轉個頭邱茗然就因為騰出一隻手拉一拉校裙裙擺，郁咗重心而又企唔穩




IG Link: https://www.instagram.com/nd_cotttoncandy/?hl=zh-tw