【校園】想成為您的治癒: 126. 不忍

「哎⋯嗯？」邱茗然都以為自己要跌親，但殷書賢拉住咗佢嘅手肘，「唔該⋯」

「你真係番到去？」殷書賢遲疑地問道

「番到呀～」邱茗然先係肯定咁表示自己絕對冇問題，但下一秒就有啲故意咁表現出猶疑，「呃⋯應該⋯？」

邱茗然嘅眼神裏帶着一絲期待望向殷書賢，但殷書賢咩都冇講；喺巴士緩緩駛埋站之後，好彩有人都喺呢個站落車，邱茗然一小步一小步咁從走廊行去落車門前等

「哎呀⋯好重呀⋯」邱茗然喺心裏抱怨着，「哥哥又唔嚟幫我拎⋯好地地又要番去補堂！希望哥哥番嚟嗰陣會帶多個紅豆沙比我食啦⋯」





喺車門要打開嘅時候，邱茗然眼睛嘅餘光留意到有一個人行近佢停喺佢身旁，邱茗然抬眼望一眼，嘴角就忍唔住上揚

「企喺度做咩呀？」邱茗然抿着唇收起笑容問道，「你落車啦咩？」

「見你咁慘幫下你。」殷書賢伸出手，「最重嗰啲比我。」

「你做咩咁好人幫我拎書呀？」邱茗然好奇咁問，雖然佢知答案唔會係佢諗嘅嗰個，但佢的確有想聽到嘅答案

「你成日請我食糖，我都係偶然幫你一次。」殷書賢接過最重嘅書，邱茗然真係完全冇同佢客氣





「係咩？」邱茗然不以為然地道

殷書賢先行落車，喺行人路上向前行兩步後先回頭望一望邱茗然

「我唔識做嘅功課都係你教我。」邱茗然笑一笑講道，然後好似開啓咗擦鞋模式一樣又道：「你真係好勁呀～果然係學霸大人！」

「我冇你諗得咁全能。」殷書賢望住邱茗然一臉輕輕一笑

邱茗然攬住較輕嘅書、孭住沉甸甸嘅書包跑前兩步，轉咗180度面向殷書賢，小心咁向後行





「陣間跌親。」殷書賢無奈咁提醒一句，邱茗然嘅嘴角即刻上揚

殷書賢捧住厚重嘅file同書，微微耷低頭一步一步慢慢行，佢自然抬頭望向行喺佢前面嘅邱茗然時，心裏卻有個疑問：「做咩就咁好心幫佢拎書⋯？」

「算啦⋯」殷書賢放棄思考原因，「佢幫咗我咁多，當係多謝佢啦⋯」

沿路上大家都好安靜冇咩講嘢，邱茗然偶爾偷望殷書賢一眼，但殷書賢一直都係微微耷低頭、安靜咁行喺佢隔離

「再講啲咩好呢⋯」邱茗然望住屋企嘅距離一步一步咁變近，欲言又止咁望殷書賢一眼，「仲以為佢會直接番屋企溫書⋯估唔到佢會幫我拎嘢番嚟⋯」

邱茗然今次直接定睛望住殷書賢，殷書賢因為察覺到而抬頭挺直腰桿

「佢就行得輕鬆⋯」殷書賢望住帶住少少一蹦一跳步伐嘅邱茗然，因為最重嘅file都喺殷書賢手上，「真係⋯好地地做咩好人⋯」

殷書賢嘅視線向下，目光停留喺邱茗然身上，邱茗然睇起嚟心情好似好好





「心情好好，因為就嚟放聖誕假啦⋯」殷書賢悄然一笑後收回視線，「對我嚟講就同平時一樣⋯」

當邱茗然行到佢住嘅屋苑商場嘅時候，心裏冒出一個想法：「好唔好問佢要送到呢度定送到樓下⋯？」

「唔⋯」邱茗然認真咁思考一下之後，帶住少少私心直接打消念頭，「算啦，免得問完佢真係送到呢度⋯因為都就聖誕假啦⋯放成個幾禮拜⋯」

邱茗然行到番去屋企樓下，回頭望向殷書賢手上嘅書

「我到啦～」邱茗然朝殷書賢一笑，「多謝你幫我拎咗最重嘅file！」

「唔洗，只係回禮。」殷書賢將file疊好，小心翼翼咁放喺邱茗然捧住嘅書嘅最面

「我會寫聖誕卡比你㗎！」邱茗然手上嘅重量一下子變得沉甸甸，佢提起右腳借一借力，然後再托起疊書，「今日麻煩你啦～阻住你番去溫書⋯」





「唔緊要，溫少嗰一個鐘又唔會即刻考得唔好。」殷書賢露出淡淡嘅笑容，但喺邱茗然眼中，呢個笑容已經比平時嘅明顯又燦爛好多

「咩意思呀？串我呀？」邱茗然鼓着臉頰扁起嘴，「雖然都係事實⋯」

「係囉，事實啫。」殷書賢點一點頭，「我走啦，你自己加油。」

邱茗然企喺簷蓬下望住殷書賢瀟灑轉身嘅背影，捧住疊書就輕嘆一口氣：「算啦⋯番屋企⋯！」

⋯

「呢張你嘅⋯呢張你嘅⋯」

「你番得嚟啱啱好！呢張你嘅～」

聖誕節假前一日，女仔一番到嚟嘅第一個任務係派晒在場同學嘅聖誕卡先





「茗、然～」張萱淇將書包掛喺枱邊、要去開locker前順手喺書包拎埋邱茗然嘅聖誕卡，「你嘅卡！」

「多謝！」邱茗然高興咁接過張萱淇手上嘅聖誕卡，「我轉頭番埋位拎比你～」

邱茗然行番埋位放低手上嘅書，拎出放喺書包裏嘅一大疊聖誕卡，張萱淇嘅卡就放喺最上面

「嗱！你嘅！」邱茗然好快咁將聖誕卡遞比張萱淇，然後指一指張萱淇接過嘅卡，「我揀咗最靚嗰張比你！」

「我睇下先～」張萱淇小心咁摵起封口嘅貼紙，將卡抽出嚟睇，「嘩～果然係最靚嗰張喎～我成手都係閃粉⋯」

「我琴晚寫完成枱都bling bling。」邱茗然笑道，「你最後有冇寫比佢呀？李⋯雨揚？」

「未寫喎～後日先見到佢。」張萱淇將聖誕卡抱喺懷中，伴隨一個聳肩轉身行番埋位





「你會唔會喺卡入面表明心跡之類呀？」邱茗然小碎步跟喺張萱淇後面，行到張萱淇嘅座位旁邊

「唔會。」張萱淇用肯定嘅語氣回答，「我先唔要。」

張萱淇將卡先收入櫃桶，打算番到屋企先慢慢睇張卡嘅內容；張萱淇嘅視線跟住邱茗然郁，望住邱茗然坐低喺佢前面拎出手機睇

「你比咗卡佢未呀？」張萱淇湊近邱茗然細聲咁八卦一下，「學霸。」

「未呀，今朝冇比佢。」邱茗然望住手機搖頭，「今朝搭車都見唔到佢⋯」

「唔好失望啦～」張萱淇伸手拍一拍邱茗然嘅膊頭，「陣間上堂會見到佢㗎嘛～」

「我知會見到佢。」邱茗然微微點頭，「不過我諗緊⋯點樣比佢⋯」




IG Link: https://www.instagram.com/nd_cotttoncandy/?hl=zh-tw