【校園】想成為您的治癒: 128. 就是，這樣
「本來係想擺你櫃桶，不過都係覺得親手比你好啲～」邱茗然走向殷書賢，將聖誕卡從書包拎出嚟親手遞比佢，「嗱！」
「多謝。」殷書賢掛上微笑，但冇太多嘅表情，睇起嚟就係好平淡，「仲以為你冇寫。」
「呀？唔會呀～」邱茗然一愣後即刻笑道，「我話咗會寫比你㗎嘛～只係覺得親手比你有誠意啲～」
「都一樣啫。」殷書賢將書包孭到前面，書包拉鍊一拉開，邱茗然就望到佢收到嘅一大疊聖誕卡，大概都係班上嘅女仔送
「張卡你番到去先好睇呀～」邱茗然收回目光嘅同時，殷書賢將邱茗然送嘅聖誕卡夾喺Chem書入面
「好呀。」殷書賢爽快答應
喺到站要落車嘅時候，邱茗然捉住扶手，正準備要起身之際，邱茗然回頭望向殷書賢
「預祝你聖誕快樂。」邱茗然微笑道，佢一直定睛望住殷書賢，好似等緊殷書賢答佢一樣
「祝你都聖誕快樂。」殷書賢回應道
「拜拜～」邱茗然隨即露出開朗活潑嘅笑容，對殷書賢揮揮手後就起身往前方嘅樓梯行去
邱茗然行咗幾步回頭望一眼，見到殷書賢拎出耳機將右邊嘅耳機都戴番，邱茗然不禁微微一怔
「好似從來都冇見過佢戴右邊嘅耳機⋯」邱茗然稍微回想一下，嘴角微微上揚，「有異心真係會諗太多～」
⋯
殷書賢行到書櫃前先拎咗佢今日要溫嘅嘢出嚟，順手將書包嘅嘢都拎晒出嚟先
「哎⋯」成疊卡一拎出嚟，本來棟好一疊嘅卡即刻散晒
殷書賢將疊卡拎起，逐張嘅封面望一眼之後就直接將佢地先放埋一邊，然後從眼前嘅書同筆記中抽出Chem書
一打開Chem書，因為夾咗嘢喺中間，所以一打開就係夾住聖誕卡嘅嗰一頁
「聖誕卡⋯原來係打算親手比，所以先問我去唔去圖書館⋯」殷書賢拎起聖誕卡，信封嘅磨砂質感同其他收到嘅聖誕卡好唔同，「睇咗呢張先。」
殷書賢將卡抽出嚟，手上即刻沾滿閃粉，打開卡望嘅第一眼就見到邱茗然以秀麗字體寫嘅上款係「To：學霸大人」
「咩事⋯」殷書賢無奈笑道，「呢個上款係想點？」
淨係見到呢個上款，殷書賢就覺得有啲不安，但又莫名地有啲開心，咁耐以嚟會當面咁樣叫佢嘅，就只有邱茗然
再睇落去，係滿滿嘅字：「聖誕快樂！希望你都會過一個開心嘅聖誕，雖然我估你應該一定肯定絕對係日日匿喺屋企溫書⋯不過記得太攰太大壓力嗰陣要好好休息下，唔好再鎅手啦！考試加油，第一名嘅寶座同5**都一定會係屬於你！」
殷書賢睇晒寫喺聖誕卡上嘅文字，就算唔係邱茗然親口講出嚟，淨係睇字都可以想像得到邱茗然講嗰陣一定係一個開朗嘅表情同聲線，佢嘅性格都可以從佢寫嘅文字中睇得出
「Okay，希望真係。」殷書賢合上卡，小心咁將聖誕卡放番入信封，將聖誕卡放喺書枱上方嘅玻璃櫃中，同佢喺陸運會拎番嚟嘅獎牌放埋一齊
殷書賢將枱面清空，將書分番好，唔用嘅擺番上書櫃，佢又將枱上嘅聖誕卡一疊疊好，隨手咁放喺書櫃嘅層架上
「換衫先。」殷書賢閂上房門，又重複每一日嘅程序：溫書
⋯
「咩呀？比咗佢啦～」邱茗然戴住耳機坐喺床，因為聽日開始就放假，所以就算宜家已經係半夜1點，佢都唔在意，「我見佢已經有一大疊卡囉⋯」
「咁咪即係你係最後先比卡嗰個囉？有好處呀都～」張萱淇坐喺書枱前，手上拎住杯雪糕，一羹一啖雪糕，「即係你張卡一定喺最面，佢一定第一張就睇你嗰張！」
「係咩⋯」邱茗然見邱旻顥推門入嚟，淡然咁望一眼後繼續睇手機，「我發現，你講得好啱，有異心嘅話，諗嘢都會好奇怪⋯」
「做咩呀做咩呀！？點解呀！？你見到啲咩呀！？」張萱淇比邱茗然一下子引起興趣
「唔⋯我之後再話你知⋯因為有待確認。」邱茗然一個轉身，由向天瞓變成趴喺度瞓，「不過我有另一樣關於佢嘅可以講比你知～」
「講啦講啦！」張萱淇以滿滿期待嘅聲線同心情等待邱茗然講新花生比佢知
邱茗然懶洋洋咁起身爬落床，企喺書枱前嘅邱旻顥回頭望佢
「我又聽！」邱旻顥忽然開口講道，「關於邊個？係唔係上次你話誤會咗你有男朋友嗰個？」
「唔、話、你、知、呀！」邱茗然逐個字講清楚，對邱旻顥做咗個鬼臉就行出房
「你哥哥對你嘅戀愛事都好感興趣！」張萱淇喺電話裏放聲笑道
「哎，怕咗佢⋯我去廚房先同你講。」邱茗然無奈咁講道，「琴日咪清locker嘅，佢超好人咁幫我手拎嘢番嚟。」
「送到你番屋企呀！？」張萱淇好大反應，差啲連含喺口中嘅羹都跌埋落地，「話佢冇嘢我都唔信！」
「而且平時我地搭車嘅話都係坐樓上，嗰日佢行我前面，我以為佢會照上去。」邱茗然一想要回想，腦海中好快咁冒出嗰日嘅情景，「但佢喺行上去之前，轉身行去下層後面坐⋯」
「係你中意嘅嗰類喎～」張萱淇滿意咁點頭，「然後呢？」
「佢問我咁樣企唔穩番唔番到屋企，我本來就答咗佢⋯可以嘅⋯」邱茗然講到後面愈講愈細聲，「但又好衰咁⋯加多個應該⋯」
「你根本就係特登啦！」張萱淇睇穿邱茗然嘅小動作
「咁⋯放聖誕假啦嘛⋯」邱茗然雙手捧住水杯企喺廚房嘅洗衣機前，「而且佢可以唔幫我㗎⋯！咁係佢自己決定要幫我嘅⋯！」
「你最開心啦宜家～」張萱淇笑道
「咁又冇話開唔開心嘅～」邱茗然口講冇咩特別，但提起嘅時候聲線都會一同提起，「就⋯平常心啦～」
「你就繼續唔認啦！我都已經睇穿你啦！」張萱淇輕哼一聲，「你就口硬唔認啦！」
「我只係覺得唔洗一定要講得咁白啫～」邱茗然垂低拎住水杯嘅雙手仰起頭望住天花板，「既然大家都冇打算拍拖，咁就冇必要講明啦～」
「你覺得佢對你有冇其他意思？」張萱淇嘅語氣同態度忽然間認真起嚟
IG Link: https://www.instagram.com/nd_cotttoncandy/?hl=zh-tw