【校園】想成為您的治癒: 135. 我承認

「點同呀⋯」邱茗然拎咗一粒薄荷糖放入口，輕輕咬着薄荷糖但又唔係會將糖咬碎嘅地步，「我慣咗搭呢班車⋯」

聽起嚟只係平常嘅一句說話，邱茗然講完之後卻偷偷抬眼望向殷書賢觀察佢嘅反應，但殷書賢冇咩反應，仲耷低頭溫書

「果然係眼中只有讀書嘅大木頭⋯」邱茗然喺心裏又無奈又有少少失落咁講道

邱茗然耷低頭睇手機，耳仔聽住巴士嘅提示語音，偶爾抬頭望向外面，有時又望一望殷書賢，不過殷書賢都係一如既往咁專心溫書

「考試又差唔多到啦⋯」邱茗然喺心裏講道，「明明今個學期好似先啱啱開始⋯」





最後嘅上堂日子，每一日都係派番以前未派番嚟嘅功課，然後又開始做各種past paper嘅題目，老師用最後少少嘅時間，話比佢地知要留意嘅地方同技巧，希望盡最後嘅努力，將一切都教比學生

有啲學生盡力吸收，用最後嘅時間再努力再加把勁；有啲學生同平時一樣，唔會特別努力亦唔會完全唔努力；當然，有啲學生選擇視考試如無物，輕輕鬆鬆咁過中六所剩無幾嘅日子

「叮噹叮噹～叮噹叮噹～」喺小息嚟到嘅時候，班上嘅人都明顯咁露出疲倦嘅表情，張萱淇同邱茗然行出課室，打算去小食部買個嘢食休息一陣

「唉⋯做初中生真係好呀⋯」張萱淇喺經過初中課室嘅樓層時，聽到傳嚟令人羨慕嘅歡笑打鬧聲，「都唔洗日日操卷，又要準備考DSE⋯」

「過多幾年，佢地都會好似你咁諗。」邱茗然望一眼初中嘅師弟妹，同高中真係唔同嘅感覺，「考埋個試，就可以休息一下，然後又再努力考DSE啦～」





「隔離班啲人真係痴線⋯小息都唔洗休息⋯」張萱淇一踏入小食部，喺留意到啲咩之後細聲咁同邱茗然講道，「佢地係機械人嚟？唔攰㗎咩⋯？呢幾日，真係日日都係做緊卷。」

「應該真係唔攰⋯精英班同我地普通班又邊會一樣？」邱茗然朝張萱淇望嘅方向望去，見到殷書賢佢地幾個一齊坐喺度，一手拎住嘢食，一手掀緊書，耷低頭專心溫書

「你唔好再望人啦～」張萱淇撞一撞邱茗然講道，「冇見人地一個聖誕，想見多幾面啦？」

「我聖誕嗰陣有見到佢呀～」邱茗然一臉得戚咁對張萱淇講道，「做完功課就去玩咗一陣⋯」

「哦～咁名正言順去約會呀？」「咩呀！？我見佢好大壓力，先同佢去玩一陣！」





張萱淇一講，邱茗然即刻紅住臉反駁佢

「有私心咁去同人地玩一陣呀？」張萱淇一副睇穿邱茗然嘅表情點頭，「明啦明啦～」

「咁⋯我係有啲私心囉⋯」邱茗然細聲坦白講道，「冇私心都唔會特登去啦⋯」

「點呀？開唔開心呀？」張萱淇好奇咁問，開啟咗食花生模式，「有冇發生啲咩事呀？你地有冇close咗呀？點呀？你快啲講啦！」

「我覺得係有熟咗嘅～」邱茗然掀開膠板，拎出喺飲品機跌落嚟嘅嘢飲，將凍飲貼喺臉頰上，「佢真係好勁⋯！連玩遊戲都好勁⋯！我同佢玩晒樂園入面所有機，我一次都冇贏過佢！掟彩虹嘅時候佢又係一次就中獎！」

「得啦得啦得啦！救命⋯」張萱淇聽住邱茗然一直喺度瘋狂咁讚殷書賢，聽到佢都忍唔住反白眼，「你讚到佢都識飛咁濟啦邱茗然！」

「咁我係真係覺得佢好勁嘛⋯！」邱茗然即刻唔好意思咁笑道

「我知啦！你個學霸最勁最全能！」張萱淇沒好氣咁講道，「你嘅表情都講晒一切啦⋯又同人地去玩，開心死啦～」





「我係因為見佢壓力好大，所以先同佢去玩下⋯！想佢放鬆下咋！」邱茗然解釋道，明明佢對張萱淇已經冇解釋嘅必要，「不過聖誕見到佢都叫有啲小驚喜嘅～」

「差唔多上堂啦，番去拎嘢啦～」張萱淇無奈咁點頭，然後同邱茗然一齊番上課室準備上下一堂

喺上堂嘅鐘聲響起之後，又係下一堂操卷堂嘅開始，殷書賢同謝澤謙佢地番到嚟

「孖堂英文堂⋯今堂好似做reading⋯」殷書賢望住出面寫喺黑板右邊嘅課堂表，「reading呀⋯眼好攰⋯」

殷書賢戴好眼鏡準備上堂，最近佢成日都覺得好攰，愈近考試愈有呢種感覺，但更似係心靈上嘅攰

⋯

喺過咗一堂之後，Miss就同佢地一齊對番reading嘅答案





「睇錯咗⋯」殷書賢喺答案打咗個交叉，因為佢一個大意睇錯，所以就答錯咗答案

殷書賢將眼鏡向上推一推起，手捏一捏鼻樑，望住紙上嘅英文字，佢覺得大腦有啲混亂，望住一時啱一時錯嘅題目，殷書賢就感到煩躁

「呢個啱⋯呢個啱⋯呢個⋯都啱⋯」殷書賢抬頭望一眼出面投影機顯示嘅答案，又耷低頭對一對自己嘅答案，「呢個啱⋯啱⋯啱⋯錯⋯」

殷書賢即刻皺起眉頭，心入面有啲責怪自己嘅大意，愈近考試，佢對自己嘅要求就會愈嚴謹，心入面成日都覺得溫唔夠書、唔夠時間溫書

「仲夠唔夠時間溫書⋯？星期四考試，今日溫埋中文順便加埋LS、聽日就英文搭埋M2⋯」殷書賢不禁計起時間，plan緊嚟緊幾日嘅溫習行程

放學之後一到圖書館，殷書賢好迅速咁打開中文書，枱上放住筆記、練習再加中文書

「坐佢隔離好大壓力⋯」邱茗然望住放喺殷書賢面前嘅嘢，「搞到睇起嚟，我好似好Hea咁⋯」

當時間慢慢流逝，唔經唔覺都已經5點幾，邱茗然嘅手放喺後腰揼兩下





「條腰都硬晒舦⋯」邱茗然每一下揼落腰，酸軟嘅感覺即刻由後腰開始擴散開

邱茗然望一望時間又望向殷書賢，殷書賢仍然喺度努力緊

「唔⋯去唔去天台⋯？」邱茗然遲疑咁開口問殷書賢

「做埋呢題。」殷書賢特登分一分心出嚟講一句一樣

「好呀⋯」邱茗然先執好嘢打算番屋企先再溫書，佢疲倦咁伏喺枱上等殷書賢，「我番屋企先再繼續啦⋯」




IG Link: https://www.instagram.com/nd_cotttoncandy/?hl=zh-tw