【校園】想成為您的治癒: 144. 聽你的

「幾多呀？」張思群拍一拍殷書賢，細聲咁問佢

「97。」殷書賢輕拍一下自己嘅額頭，心臟仍然停留咗喺啱啱嘅緊張一樣未平靜番落嚟

「果然又係你⋯」張思群見到殷書賢嘅卷上分數，頓時有種自討沒趣嘅感覺

「嚇死我⋯」殷書賢喺心裏講道，心手都因為咁而出晒汗，「仲以為⋯」

佢好擔心第一科派嘅拿手科就失手，但好彩，原來只係虛驚一場⋯嚇到心都跳咗出嚟⋯但幸好嘅係，佢都係以全級最高分嘅姿態完成佢嘅拿手科





接住嘅下一堂，阿sir知大家最緊張大卷嘅成績，所以最先派中文卷一

「又係你同二姐爭第一。」張思群捉住殷書賢嘅膊頭將佢往後拉，細聲咁喺佢耳邊講道

「嗯。」殷書賢睇起嚟完全唔在乎，因為佢嘅重心從來都唔喺文科，不過當然文科都唔可以考得差

「跟學號出嚟拎卷啦，1號。」阿sir開始派卷，將卷按住學號一份一份派番比大家

殷書賢見差唔多到自己就行定出去拎卷，當試卷由阿sir嘅手上轉移到佢手上嘅時候，阿sir自動咁開口講咗一句：「我地班兼我地級最高分。」





「算啦⋯爭咩呀⋯點可能唔係佢第一⋯」張思群聽到阿sir講嘅嘢後搖搖頭，「睇嚟今個學期殷書賢chur到自己盡真係可以拎番個第一番嚟⋯」

⋯

喺Lunch之前嘅一堂係地理堂，邱茗然特別緊張，因為地理作為選修亦係佢有信心嘅科，對於有信心嘅科，期望自然會更加大

「拜托拜托⋯！」邱茗然望住陳sir拎住疊卷入嚟，心臟就即刻噗噗跳，強烈到可以感覺到手上嘅動脈一直突突跳動，「一定要考得好呀⋯！」

「差唔多到我啦⋯！」邱茗然行定出去，跟喺前面嘅人身後排隊





陳sir將卷遞比邱茗然，邱茗然禮貌咁微微點一點頭後拎住卷行番埋位

「38！？」邱茗然喺行到位前即刻緊張咁睇分數，第一眼見到呢個分數將佢嚇到瞳孔地震，邱茗然眨一下眼：「嚇死⋯原來係68⋯！」

啱啱見到得38分嘅一刻，嚇到佢個心都跳埋出嚟，佢仲以為自己考得好差

「差啲要喊出嚟⋯」邱茗然拍一拍自己嘅心口安慰自己，「嚇死我真係⋯！拎住38分點交代？好彩好彩⋯！？睇錯⋯！」

邱茗然打開卷，錯嘅題目都係佢唔肯定、半信半疑咁填答案嘅題目

「唉，睇嚟都係溫得唔夠熟⋯」邱茗然每條題目大概咁望一望

邱茗然一邊聽阿sir講解，一邊拎住筆寫正確答案同解釋，見到成績都喺自己嘅預想範圍，總算鬆一口氣

⋯





「殷書賢今日心情好好啦～」張思群將餐牌喺架中抽出嚟放到枱上，「唔笑都知你心情好。」

「點會唔好呀？朝早派嗰四份卷佢都係全級最高分，心情唔好就假啦⋯」謝澤謙喺枱邊嘅櫃桶中拎咗幾雙筷子放入裝住熱水嘅杯中，「心情如何呀殷書賢？」

「平常心。」殷書賢嘅表情睇起嚟好平靜，但講嘢嘅時候，從聲線中聽得出佢嘅愉悅

「嘩，平常心你都講得出口？明明就好開心！」趙遠寧忍唔住反白眼，「轉頭嗰堂派化學卷，肯定又係你啦～」

「唔知，派嗰陣先算。」殷書賢微微聳肩，不過佢心裏有個譜，知自己唔會低分得去邊

食完飯準備番學校之前，張思群拉住殷書賢佢地幾個又去一轉便利店買嘢飲

「你唔入去呀？」謝澤謙見殷書賢企喺門口唔入去





「入囉。」殷書賢敷衍咁行兩步行入去，企喺擺滿糖嘅貨架前

此時張萱淇拉住行去便利店，差唔多行到門口嘅時候，張萱淇對邱茗然講道：「你想喺門口等我都得㗎～」

邱茗然見到殷書賢就企喺離門口最近嘅位置，佢輕撞張萱淇一下：「噓⋯！」

張萱淇同邱茗然本來仲好close咁拖住手，點知一行入便利店門口，兩人就同時咁鬆咗手，都唔知係佢地有默契定點

「學霸大人你居然會喺度睇糖呀？」邱茗然行到殷書賢隔離側着頭講道

「嗯，就睇下。」殷書賢唔洗望過去，單憑對佢呢個稱呼，殷書賢就知道係邱茗然，「你考成點？」

「你居然會問我呢個呀～」邱茗然覺得有啲意外，佢拎起一包朱古力，「Okay啦～正常發揮，我覺得係我努力嘅回報～你呢？你一定考得好好啦～」

「都係正常發揮。」殷書賢笑一笑講道





「睇嚟考得好好啦～都話偶爾放鬆下會好好多㗎啦～」邱茗然笑道，「肯定拎咗好多個最高分啦～」

「冇好多，就係朝早嗰四份。」殷書賢望住邱茗然將朱古力拎起又放低

「食邊隻好呢⋯」邱茗然仍然為要食邊一隻朱古力苦惱緊，「你地派咗咩卷？」

「數學卷一、英文writing、中文卷一同埋Bio。」殷書賢以輕鬆嘅聲線講道

「難怪咁Chill啦～」邱茗然笑道

殷書賢安靜咁將目光放喺猶疑不決嘅邱茗然身上，有啲道謝嘅說話係佢冇辦法講出口

「如果唔係喺我最大壓力就癲嘅時候，你喺度聽我呻，可能我仍然會比我嘅壓力困住⋯」殷書賢喺心裏默默地講道，但亦打從心底覺得佢對邱茗然嘅感謝係冇辦法講出口，「可能真係因為你嗰句肯定句啦⋯」





邱茗然拎住兩款朱古力猶疑不決時，佢抬頭望向殷書賢，抬頭後見到殷書賢望住佢

「嘻嘻⋯我仲未諗到食邊隻好～」邱茗然笑道，然後拎住兩款朱古力問殷書賢：「食邊隻好呀？」

「呢個。」殷書賢指一指邱茗然左手拎住嘅一盒朱古力

「唔⋯呢個呀？」邱茗然望一望朱古力又望一望殷書賢，「咁呢個啦～」

「行啦殷書賢！」張思群同趙遠寧買完嘢飲就叫殷書賢

邱茗然對殷書賢揮揮手，然後就行入去入面搵張萱淇，一見到張萱淇，邱茗然即刻拎住朱古力上前：「淇淇～我話你知呀！我今日要食呢隻朱古力！」




IG Link: https://www.instagram.com/nd_cotttoncandy/?hl=zh-tw