【校園】想成為您的治癒: 145. 會介意

張萱淇坐喺位，耳仔聽住邱茗然講嘢，眼望住手機，手覆緊message

「今朝派地理真係嚇鬼死！仲以為我啱啱合格⋯！」邱茗然諗起今朝早派卷嗰陣，佢第一眼睇錯分，嚇咗自己一跳，「原來只係睇錯，一朝早未瞓醒都即醒⋯」

「嗯。」張萱淇嘅回答一啲靈魂都冇，邱茗然抬眼望向張萱淇，只見佢專心咁望住手機

「同佢講緊咩呀？」邱茗然托住下巴，用無奈嘅表情望住覆緊message嘅張萱淇

「講緊考完試出去玩～」張萱淇仲傻下傻下咁回答邱茗然





「好期待啦？」邱茗然問道

「幾啦～」張萱淇笑住回答，佢嘅視線仍然停喺手機上，「好耐都冇見。」

「唉～難怪都冇心機聽我講嘢啦～」邱茗然嘆一口氣，望住張萱淇好快咁打字覆李雨揚

張萱淇呢下先回神，發現自己完全冇聽到邱茗然啱啱講咩，佢即刻收起手機雙合十賠罪

「對唔住！我冇心㗎！」張萱淇一臉抱歉咁講道





「我慣㗎啦，你呢個有異性冇人性嘅朋友。」邱茗然微笑道

「講開又講，我覺得以我呢個分數嚟講，我只要keep得住，要考到我想讀嘅大學唔難。」張萱淇從櫃桶中拎出今日派番嚟嘅卷，「我覺得我嘅成績都算穩定。」

「你不嬲都好穩定㗎啦～又唔係第一日嘅事⋯」邱茗然拎走張萱淇手上嘅卷掀嚟睇，「一直都係中游呀～」

「如果再高分多少少就最好⋯」張萱淇講道，「我計過我至少全部都有4。」

「咁咪好囉⋯」邱茗然托住臉，講到成績，佢忽然間有啲苦惱，「唔知去到DSE我仲可唔可以keep到呢個水平⋯」





邱茗然嘆氣又講道：「如果要計埋臨場嘅壓力，咁即刻要拎到呢個分數嘅話就一定要再勤力啲⋯」

「本來考呢啲就好緊張嘛，不過我覺得平常心啦～」張萱淇比咗個Okay手勢，「你有信心自己有個動力去做㗎啦～」

「係啫⋯」邱茗然扁起嘴微微點頭，「但都會有啲擔心嘛⋯」

「諗下派晒卷，study leave點樣喺放鬆同時努力溫書好過啦～」張萱淇輕鬆咁講道，對於近在眼前嘅DSE，佢緊張亦擔心，但冇太多畏懼，「既然已經係努力咗，回報會番嚟嘅～太過擔心只會影響自己發揮。」

其實張萱淇講嘅嘢都有道理，如果太擔心反而會影響到表現，愈緊張愈容易miss咗細節嘅嘢

「所以我每一場考試都當final咁考㗎～」張萱淇笑笑口咁講道，「習慣咗就唔緊張啦～」

邱茗然微微點一下頭，張萱淇開口又講：「而且你今次唔係都考得Okay唔差咩？」

「嗯，都係同之前差唔多啦，冇咩好低分，亦唔係最top嗰堆。」邱茗然無奈咁聳肩，然後又嘆氣，「唉～總之好煩啦⋯差唔多又到last day啦咁就⋯」





⋯

「番埋呢幾日就放study leave啦～」邱茗然喺最後一個星期嘅上學日忍唔住慨嘆道

「幾好。」殷書賢難得咁冇戴耳機冇拎住筆記

「點呀？派晒卷，有幾多把握呀？」邱茗然笑問道，「有幾大勝算？」

「冇勝算。」殷書賢講笑咁講

「你咁樣講唔怕比人打呀？」邱茗然無奈一笑，反咗個白眼講道，「拎住咁多科最高分喺手仲敢咁樣講⋯」

「謙虛啲嘛。」殷書賢講道





「番埋呢幾日就冇得再番學啦⋯」邱茗然望向窗外，忽然間失落咁嘆氣

「你可以番嚟溫書。」殷書賢講道，佢反而冇咩太大感覺，覺得冇得番學好可惜，「都唔係唔可以番嚟。」

「得我一個番嚟有咩用？」邱茗然望向殷書賢，「而且study leave太考驗人嘅自制能力啦⋯」

「都係嘅，我都覺得番學上堂係比較好。」殷書賢認真咁諗咗一諗後都同意呢個講法

「你唔會覺得冇得番學見唔到朋友會令人好寂寞㗎咩⋯？」邱茗然側着頭定睛望住殷書賢，佢將頭靠喺巴士嘅玻璃上，手捉住扶手

殷書賢望住邱茗然沉思咗一陣後微微聳肩，然後自然咁撇開臉望向窗外：「可能啦，但有手機可以搵到，又唔係完全消失嘅⋯」

⋯

中六最後一個番學日，大部分嘅人都帶咗自己嘅校服裇衫或者夏季嘅校裙番嚟





「我要做第一個寫你件衫嘅人！」張萱淇拎起Marker筆指住邱茗然帶番嚟嘅夏季校服

「好呀～」邱茗然將校裙遞比張萱淇，張萱淇都將自己嘅夏季校裙遞比邱茗然，同邱茗然嘅校裙交換

張萱淇喺邱茗然乾淨嘅校裙上寫下一句：「DSE加油，以後都要約出嚟見面！」

「耶！我係第一個～」張萱淇高興咁將裙對褶一下還番比邱茗然

喺呢一日，大家一有時間就會交換校服，喺對方嘅校服上寫低考DSE前嘅一句，最多嘅係為對方嘅DSE打氣，有啲係留下友誼嘅字句，因為下次再見面嘅時候，就係番嚟參加畢業禮，中間有半年都唔會再見

但比起其他人喺校服上寫低嘅字句，邱茗然更加想搵殷書賢寫嘢

「你係唔係想去搵殷書賢呀？」張萱淇細聲咁問我，「係就去搵啦～」





「小息先去搵佢⋯」邱茗然望一望時間，感覺好似都唔夠時間去搵佢想搵嘅人

到咗小息嘅時候，邱茗然喺班上同其他人交換寫緊校服，個個拎起筆就搵位寫

「寫呢度呀～留番個衫袖位唔好寫！」邱茗然喺其他人要喺佢嘅裙上寫嘢嗰陣都會提一句

「淇淇！陪我去廁所！」邱茗然將寫滿字嘅校裙搭喺手臂上

「你去廁所有必要帶埋呢個咩⋯？」張萱淇嘅目光無奈咁落喺邱茗然手上嘅校裙

「就係順便拎埋嘛～可能會見到其他人呢～」邱茗然笑容滿面咁講道，聲線裏都夾雜咗一絲期待

張萱淇陪邱茗然行去洗手間嘅方向，當就嚟經過E班嘅時候，張萱淇特登先行兩步望一望，探一探風聲

「好受歡迎。」張萱淇向前行兩步望到佢要望嘅嘢就一個180度轉身行番去邱茗然嘅面前講咗一句

「唔知你講咩～」邱茗然當唔明張萱淇講嘅嘢

但當行到E班嘅課室門口嘅時候，邱茗然都係下意識咁朝課室內望咗一眼，見到一堆人圍喺殷書賢嘅座位

「突然多人到咁嘅⋯」邱茗然望到一大堆女仔圍住一個位嘅時候喺心裏默默講道

邱茗然面無表情咁拉住張萱淇轉身就行番去課室嘅方向

「算啦，唔去啦。」邱茗然輕哼一聲，「唔急啦突然。」




IG Link: https://www.instagram.com/nd_cotttoncandy/?hl=zh-tw