【校園】想成為您的治癒: 146. 重要的事
殷書賢幫同學寫完校服，抬頭企番好嘅時候，見到邱茗然拎住校裙但就擰轉身走
「今日冇選修嘅堂⋯」殷書賢望向寫喺黑板嘅時間表，「佢係唔係打算搵我寫校服⋯？」
「殷書賢！寫埋我呢件！」企喺佢隔離嘅同學拍一拍佢，然後將校服遞到佢手上
「吓⋯？」殷書賢呆咗一下，然後即刻回神，「哦好呀。」
「嬲啦嬲啦⋯」邱茗然見到嘅嘢，啱啱張萱淇都望得好清楚，「咁多女仔喺度，呷醋啦～」
邱茗然若無其事咁將校裙摺好先放番喺書包，但心情就點都提唔起勁一樣
「你係怕尷尬嘅話，點解你就唔叫佢放學見？」張萱淇提議道，「你地平時都會放學見。」
「今日都冇選修科嘅堂。」邱茗然望向黑板，今日咁啱就係冇選修嘅堂
「唉～你喺IG搵佢咪得囉～」張萱淇無奈咁嘆一口氣講道，「又唔係冇佢IG！」
「叮噹叮噹⋯叮噹叮噹～」喺鐘聲響起嘅一刻，殷書賢放喺褲袋嘅手機就震咗一下
原來係IG嘅通知：「放學喺天台等，有好～重要嘅嘢要搵你！！！」
「好重要嘅嘢？」殷書賢望住message有啲困惑，正想諗下有咩係好重要嘅嘢嘅時候，殷書賢即刻喺心入面打斷自己嘅想法：「唔好諗多⋯！」
⋯
「咔—」
殷書賢按照住同邱茗然喺IG上講好嘅嘢，喺放學之後嚟到學校嘅天台，算係喺畢業前最後一次上嚟天台
「咦～」邱茗然喺鐵門閂上之前將門推開探頭望出嚟，「你早我一步到喎～」
「嗯⋯」殷書賢望住邱茗然行入天台嘅範圍，佢定睛望住邱茗然，佢唔知邱茗然做咩突然叫佢上嚟
殷書賢望住一臉輕鬆自如嘅邱茗然，佢等緊邱茗然話佢知叫佢上嚟嘅原因，佢輕輕握一下拳，感覺到手心莫名咁出汗
「你做咩突然叫我喺度等？」殷書賢仍然冷靜咁問邱茗然
「有好重要嘅事要做！」邱茗然講道，殷書賢有啲緊張亦有啲疑惑，「我嘅校裙未比你寫⋯！我亦未寫你嘅裇衫！」
「吓⋯？」殷書賢愣一愣，然後無奈一笑，「就係咁？小息嚟搵我都可以。」
「我唔好意思嚟搵你⋯因為今日冇選修科嘅堂⋯」邱茗然有啲尷尬咁笑道，「我咁樣嚟搵你，好似有啲尷尬⋯」
邱茗然手上拎住校裙，殷書賢對於邱茗然嘅解釋除咗無奈就係無語，有咩好唔好意思？
個個都係咁樣搵佢寫，等佢一直見到邱茗然行過但又唔叫佢嘅時候，仲諗咗一日點解邱茗然唔嚟搵佢寫校服
「係唔係寫呀？」殷書賢伸出手，示意邱茗然將校裙遞比佢
「嗯！」邱茗然即刻將對摺咗嘅校裙遞比殷書賢，「我特登留咗個衫袖位比你！學霸大人，你快啲寫啲咩嚟祝福一下我啦！」
「我可以寫咩嚟祝福你⋯？」殷書賢拎起Marker筆，然後順手咁將自己嘅裇衫遞比邱茗然，「你寫。」
「好呀！」邱茗然接過裇衫，蹲喺長櫈前拎起Marker，不過佢諗緊寫咩好
邱茗然喺諗緊寫咩比殷書賢嘅時候定睛望住佢，望住殷書賢拎起marker筆，但都係冇咩頭緒嘅苦惱表情
「殷書賢！快啲寫啦！我特登嚟搵你寫㗎！」邱茗然輕哼一聲講道
「我以為你小息會嚟搵我⋯」殷書賢笑一笑後，不以為意一樣細聲講道，「明明見到你行過但又掉頭走。」
「一大堆人圍住你張枱⋯！我點敢叫你？」邱茗然帶住小情緒咁望殷書賢一眼，但佢又唔想將佢嘅小情緒擺得咁明顯
殷書賢望一望邱茗然，然後喺收回目光嘅同時，臉上掛上淡淡嘅笑容：「冇所謂啦，宜家都寫到。」
殷書賢提起筆，喺邱茗然特登留比佢寫嘅衫袖位寫：「祝你DSE考得好入到大學，數學都拎到4」
殷書賢好好咁幫邱茗然摺番好件衫，然後等邱茗然寫完，佢好奇咁望下邱茗然想喺佢嘅裇衫上寫啲咩
邱茗然諗咗好一陣之後，拎起筆寫道：「祝學霸大人DSE全部5**」
「搞掂啦～」邱茗然滿意咁笑道，然後將裇衫還番比殷書賢
「Okay，咁可以番屋企未？」殷書賢微微點頭，將裇衫接番好放番入書包
「可以啦～」邱茗然比咗個Okay手勢，然後一臉認真咁講道：「任務完成！」
兩人一齊行到去巴士站，邱茗然自然地望向遠處巴士會駛嚟嘅方向，想睇下巴士幾時到；殷書賢嘅視線朝遠處水平望去，喺未見到巴士嘅身影前，殷書賢嘅視線微微向下望
「今日係最後一次一齊搭車啦～」邱茗然收回視線，一個回頭望向殷書賢
邱茗然嘅語氣聽起嚟好輕鬆，佢側着頭望住殷書賢，想睇下佢會係咩反應
「都係⋯」殷書賢自然地將視線收回，好似咩都冇發生過一樣，自然咁垂頭輕輕一笑，「中六過得真係快⋯」
「但今年都好有意思呀～唔係平平凡凡咁過。」邱茗然嘅笑微微提起，停頓思考一下之後摸一摸校呔嘅呔結，「我覺得今年過得好開心！」
「我都覺得今年雖然好辛苦又好大壓力⋯」殷書賢微微點頭後抬頭望向邱茗然，停頓思考咗一陣之後將視線移開，望向天空，「但過得好開心⋯」
邱茗然望住殷書賢嘅側面，想喺最後見面嘅時間記住佢要記住嘅事，下次再見就係畢業禮，已經係半年後嘅事⋯
中六嘅時間，話開始就開始，話結束就結束⋯
IG Link: https://www.instagram.com/nd_cotttoncandy/?hl=zh-tw