有一晚，我打飛機打到條jer斷左: （65）

格格同佢細佬，代表其他斯比列特星人，去說服班外星人。

結果雙方傾嚟傾去都係傾唔埋欄，班外星人依然企到好硬。

我就提議話：「軟嘅唔得，就嚟硬架啦，直接打瓜佢地，攞返啲能量返嚟。」

「係得嘅早就做左啦，」格格答我，「一旦佢地死左，啲能量都會跟住消失。」

「咁好惡搞喎。」



「其實班外星人一開始係因為咩目的，而要吸走舊石嘅能量？」Kevin好奇一問。

「佢地未吸能量之前，本來只係個紙板卡通人，吸左之後先變成左3D立體，我估佢地係唔想就咁打回原形。」我回應Kevin。

「係，無錯，其實佢地同我地斯比列特人有啲似，都係天生身體有缺陷，我地斯比列特人係肢體分離，而佢地天生就處於平面形態。」格格補充。

「但2D平面形態都無乜嘢啫，而且佢地又係卡通樣。」Kevin自告奮勇，「不如等我試下說服佢地。」

「你？你得唔得架？」我有啲懷疑。



「試過咪知。」

於是乎，百變小櫻Kevin就喺格格嘅陪同下，去到班外星人面前講數。

我無跟埋過去，因此就唔知佢地嘅談話內容。

淨係離遠見到雙方喺度吱吱喳喳，好似爭持得幾激烈。

過左只係短短十分鐘，Kevin同格格笑笑口咁返埋嚟：「哈哈！搞掂啦，佢地肯交返啲能量出嚟。」



我嚇左一跳，感到十分意外：「你講左啲咩咁犀利，咁樣都氹得掂佢地？」

「我同佢地講，地球人好鍾意佢地呢種可愛卡通樣，只要肯變返2D，咁我就帶佢地返地球，到時拍片擺上youtube，實會大受歡迎。」

「你話帶佢地返地球？」

「係呀！我覺得掂架，淨係嗰隻卡通貓都cute過hello kitty啦，當拍卡通片咁放上網，肯定有好多人like。」

雖然我對Kevin呢個做法有少少保留，不過又係得呢個方法，先至氹到班外星人妥協，既然係咁都無辦法啦。