真人真事改篇﹕師生戀﹕《最接近的陌生距離》: 序章

觀塘海濱公園。

「你班人咁耐架？」我望住錶，唔耐煩咁講。

時間係下午5點鐘，天色開始變得橘黃，太陽都落山了。

今日係成班老友中學畢業後第一次見面大日子，咁多年冇見，唔知佢地變成點呢？不過我知惟一冇變嘅係，呢班人永遠都係鍾意遲到。

老實講，我呢幾日忐忑緊好唔好出席今次聚會，因為我好怕呢啲場合會變成鬥叻大會，不過因一啲原因，我決定嚟呢次中同聚會。





或者，今日我可以見返一位我好牽掛嘅人。

「哥哥⋯⋯」

喺我望住個海，感受下個海風時，我感到有人拉緊我衫尾。回頭一望，係一位完全唔識既小朋友。

「你好啊！」我蹲下身，輕輕摸佢頭，道：「你爸爸媽媽呢？你係咪走失咗呀？」

個小朋友將鞋盒咗大嘅盒遞咗比我，話：「送比你架！」





我收過份禮物後，個小朋友急急腳咁走咁。我望住盒禮物，只係一個平平無奇嘅啡色盒，但上面有一個用幼麻繩縛成嘅結，結上面扣咗張卡。

我將張卡翻轉，讀一讀背後嘅字：「坐低慢慢睇。」

咁神秘？ 咪住先⋯⋯啲字跡⋯⋯？！

我坐喺海旁嘅梯級，打開個盒。發現入面仲有一個好靚、好精美嘅手工盒。形狀四四方方咁，一隻手揸得晒，成個魔方咁。個四方盒係冇蓋嘅，頂部上面有個扣。我檢查好個結構後，發現呢個盒係暗藏機關。頂上面嘅扣就係緊緊咗將四方盒嘅邊「鎖」住。扣嘅旁邊有個寫咗「拉開佢啦！」四隻字嘅箭嘴。

當我拉開個扣時，我就嚇咗一跳！佢好似花朵綻開咁樣彈開！而家個盒好似一張平面咁攤開晒。手工非常仔細，每一個公仔、每一隻字都係由人手去寫、去雕砌。最令我驚訝嘅係，呢個細細地嘅盒仔原來係一個相冊，唔單止放咗好多相，亦都有唔少機關，令到啲相片可以好生動咁表達出黎。





整呢個盒禮物嘅人一定係為咗今日，而且佢係特意整比我。

佢，好想我記起一啲事，一個人，一段回憶。

我眼前除咗係一片色彩繽紛嘅畫面外，亦都係燦爛嘅中學回憶。

「2009年」我被盒入面嘅可愛圖案所指引，定神望住一張班相。

嗰年我係班長，我坐咗喺我鍾意嘅人旁邊。相中嘅佢所展現笑容令我牽掛咗好多年。

我抬頭遠望海港嘅對岸，眼前有一段影像慢慢咁浮現。

就好似一套電影嘅開始，我眼前漸漸變黑，人群嘅聲音消失，另一種聲音響起⋯⋯

= = = =

本故事同時於Penana及個人IG中連載。

IG: ar_hong_91

#小說 #文字 #文學 #愛情 #故事 #師生戀 #講故佬#小甜